ព័ត៌មានថ្មីចុងក្រោយលើករណីបាត់ខ្លួនយន្តហោះម៉ាឡេស៊ី

ព័ត៌មានថ្មីចុងក្រោយលើករណីបាត់ខ្លួនយន្តហោះម៉ាឡេស៊ី

ផ្អែកតាមប្រសាសន៍របស់នាយករដ្ឋមន្ត្រីម៉ាឡេស៊ីលោក Najib Razak ជើងហោះហើរMH 370 ត្រូវបានគេសន្និដ្ឋានថា បានបញ្ចប់ដំណើររបស់វាជាមួយអ្នកដំណើរ២៣៩នាក់នៅភាគខាងត្បូងមហាសមុទ្រឥណ្ឌា។ ការលើកឡើងរបស់នាយករដ្ឋមន្ត្រីខាងលើធ្វើឡើងដោយផ្អែកទៅលើទិន្នន័យចុងក្រោយដែលផ្ដល់ដោយក្រុមហ៊ុនផ្កាយរណបមួយរបស់អង់គ្លេស។ ជុំវិញហេតុការណ៍នេះ Sabay បានលើកយកពីចំណុចសំខាន់ៗជុំវិញករណីនេះដូចតទៅ៖

តើផ្កាយរណបអង់គ្លេសបានបង្ហាញពីលទ្ធផលអ្វីខ្លះ?
ផ្អែកតាមក្រុមហ៊ុនផ្កាយរណបអង់គ្លេស Inmarsat បានឲ្យដឹងថា ផ្កាយរណបរបស់ខ្លួនបានចាប់បានដានយន្តហោះម៉ាឡេស៊ីប៊ូអ៊ីង ៧៧៧ បញ្ចប់ដំណើររបស់វាភាគខាងត្បូងមហាសមុទ្រឥណ្ឌា ពោលគឺនៅចម្ងាយប្រមាណជាង២.៤០០គីឡូម៉ែត្រភាគនិរតីដែនគោកPert របស់អូស្ត្រាលី។ ផ្កាយរណបនេះបានបញ្ជាក់ថា យន្តហោះនេះបានធ្លាក់នៅចន្លោះម៉ោង៨:១០នាទី និង ម៉ោង៩:១៥នាទីព្រឹកត្រូវនឹងម៉ោងក្នុងស្រុក។

យន្តហោះម៉ាឡេស៊ីប៊ូអ៊ីង ៧៧៧ដែលបាត់ខ្លួន

តើពេលនេះ ទីតាំងរុករកយន្តហោះម៉ាឡេស៊ីធ្វើឡើងនៅកន្លែងណា?
ការរុករកតាមទិសដៅទៅភាគខាងជើងត្រូវបានលុបចោល។ ក្រុមរុករកបានបង្វែរទិសដៅមកផ្ដុំគ្នានៅទីតាំងដែលសង្ស័យថា យន្តហោះនេះធ្លាក់នៅភាគខាងត្បូងមហាសមុទ្រឥណ្ឌា ដែលនៅពេលនេះទីតាំងរុករកមានទំហំរហូតដល់ជាង១,៦លានគីឡូម៉ែត្រការ៉េ ពោលគឺមានទំហំប្រហែលនឹងរដ្ឋAlaska របស់អាមេរិក។

ទោះបីជាវត្ថុឬ បំណែកជាច្រើនត្រូវបានរកឃើញជាបន្តបន្ទាប់ដោយផ្កាយរណប និងក្រុមកងទ័ពជើងអាកាសអូស្ត្រាលីយ៉ាងណាក៏ដោយ ប៉ុន្តែកប៉ាល់ និងនាវារុករកពិតជាពិបាកចូលកៀកកើយវត្ថុទាំងនោះណាស់ ដើម្បីកំណត់ថា តើវាជាបំណែកយន្តហោះនេះឬ យ៉ាងណា? ទន្ទឹមនឹងនេះ បញ្ហាអាកាសធាតុសំបូរទៅដោយភ្លៀងធ្លាក់ មានខ្យល់បក់ខ្លាំងនៅតំបន់នេះ បានក្លាយជាឧបសគ្គធំមួយទៀតដែលត្រូវបានក្រុមអ្នករុករកអូស្ត្រាលីពន្យារពេលកាលពីម្សិលមិញ។

ផែនទីបង្ហាញពីទីតាំងដែលគេរកឃើញបំណែកជាច្រើននៅភាគខាងត្បូងមហាសមុទ្រឥណ្ឌា

តើឧបករណ៍អ្វីខ្លះត្រូវបានប្រើប្រាស់រុករកយន្តហោះនេះនៅមហាសមុទ្រឥណ្ឌា?
អាមេរិកបានបញ្ជូនរួចរាល់ហើយនូវឧបករណ៍ស្រាវជ្រាវបាតសមុទ្រដ៏ទំនើបចុងក្រោយរបស់ខ្លួន ដើម្បីជួយរុករកយន្តហោះនេះ។ ឧបករណ៍នេះត្រូវបានគេដាក់ចូលទៅក្នុងទឹកសមុទ្រអូសសណ្ដោងដោយនាវា ហើយវាមានសមត្ថភាពអាចស្រូបយកសញ្ញាផ្សេងៗ ដូចជាប្រអប់ខ្មៅរបស់យន្តហោះក្នុងជម្រៅរហូតដល់ជាង៦គីឡូម៉ែត្រ។

ឧបករណ៍ចាប់សញ្ញាឬ សំឡេង ក្នុងទឹកសមុទ្រ (Sonar)

ប្រទេសអូស្ត្រាលី ចិន អាមេរិក ជប៉ុន និងនូវែលហ្សេឡង់ កំពុងសហការគ្នារុករកយ៉ាងសកម្មនៅកន្លែងសង្ស័យខាងលើ។ តាមអាជ្ញាធរម៉ាឡេស៊ីយន្តហោះចំនួន១៤គ្រឿង និងនាវាចំនួន៩ កំពុងត្រូវបានប្រើប្រាស់សម្រាប់ប្រតិបត្តិការរុករកនៅភាគខាងត្បូងមហាសមុទ្រឥណ្ឌានេះ។

យន្តហោះជប៉ុនចូលរួមរុករកយន្តហោះខាងលើ

តើជនរងគ្រោះទទួលបានសំណងប៉ុន្មាន?

អ្នកច្បាប់អន្តរជាតិបានពន្យល់ថា ជនរងគ្រោះចំនួន២៣៩នាក់នៅលើយន្តហោះនេះអាចទទួលបានសំណងគិតជាទឹកប្រាក់ក្នុងម្នាក់ៗចាប់ពី៤ សែនទៅ ១០លានដុល្លារ។ ទោះបីជាយ៉ាងណាក៏ដោយ ក្រុមហ៊ុនអាកាសចរណ៍ម៉ាឡេស៊ីបានប្រកាសនៅសប្ដាហ៍នេះថា ជនរងគ្រោះម្នាក់ៗអាចទទួលបានសំណង៥.០០០ដុល្លារ ហើយសំណងបន្ថែមទំនងត្រូវបានក្រុមហ៊ុននេះផ្តល់ឲ្យនៅពេលក្រោយ។

ប្រាក់សំណងរបស់ក្រុមហ៊ុននេះ ត្រូវបានសាធារណជនរិះគន់ថា ពិតជាស្ដួចស្ដើងបំផុត ខណៈដែលជាពិសេសគ្រួសារជនរងគ្រោះវិញបានបដិសេធន៍ទទួលយកសំណងនេះ ដែលគេជឿជាក់ថា ពួកគេនឹងដាក់ពាក្យបណ្ដឹងទាមទារសំណងបន្ថែមទៀតនៅពេលខាងមុខ៕