ការពិតដ៏សំខាន់ទំាង៦យ៉ាង ជុំវិញការបាត់យន្តហោះម៉ាឡេស៊ី

ការពិតដ៏សំខាន់ទំាង៦យ៉ាង ជុំវិញការបាត់យន្តហោះម៉ាឡេស៊ី

ការធ្លាក់យន្តហោះម៉ាឡេស៊ីប៊ូអ៊ីង ៧៧៧-២០០អ៊ីអាកាលពីយប់រំលងអាធ្រាត្រឈានចូលថ្ងៃសៅរ៍កន្លងទៅនេះបានបង្កើតភាពអាថ៌កំបាំងបំផុត ខណៈមកទល់នឹងថ្ងៃនេះគេមិនទាន់រកឃើញស្រមោលយន្តហោះនេះនៅឡើយ។ ការបាត់ខ្លួនយន្តហោះខាងលើ បានបង្កើតព្រឹត្តិការណ៍ និងភាពងឿងឆ្ងល់មិននឹកស្មានដល់ដល់ពិភពលោកទាំងមូល។

យន្តហោះ ៧៧៧-២០០អ៊ីអា ម៉ាឡេស៊ីដែលបានបាត់ខ្លួន

សូមចុចអាន៖ បាត់យន្តហោះម៉ាឡេស៊ីគឺជារឿងអាថ៌កំបាំងបំផុត!

ជុំវិញភាពការបាត់ខ្លួនដោយអាថ៌កំបាំងនេះ មានចំណុចចំនួន៦ដែលត្រូវបានគេលើកឡើងយកមកវិភាគសម្រាប់មិត្តអ្នកអានស្វែងយល់ និងពិចារណាទាំងអស់គ្នានៅពេលនេះ ថាតើយន្តហោះប៊ូអ៊ីង ៧៧៧ ពិតជាបានផ្ទុះធ្លាក់ បាត់ខ្លួន រងការគំរាមកំហែងរបស់ក្រុមភេរវករ ឬយ៉ាងណា?

ទី១ គ្រប់យន្តហោះប៊ូអ៊ីង ៧៧៧ត្រូវបំពាក់ដោយប្រអប់ខ្មៅ
គ្រប់យន្តហោះទំហំធំអាចផ្ទុកអ្នកដំណើររាប់រយនាក់ប្រភេទនេះត្រូវបំពាក់ដោយប្រអប់ខ្មៅសម្រាប់ផ្ដល់ទិន្នន័យផ្សេងពីការធ្លាក់យន្តហោះ។ ដូច្នេះ ទោះបីជាយន្តហោះនេះផ្ទុះ ឬ មានកម្លាំងគ្រាប់បែកខ្លាំងប៉ុណ្ណាក៏ដោយ ក៏វាមិនអាចកម្ទេចប្រអប់ខ្មៅនេះបានដែរ។

ការពិតទី២ ប្រអប់ខ្មៅជាទូទៅត្រូវបញ្ជូនបណ្ដាញសញ្ញាប្រតិបត្តិការយ៉ាងហោចណាស់៣០ថ្ងៃបន្ទាប់ពីការធ្លាក់ ឬផ្ទុះ
វាពិតជាសំណាងអាក្រក់បំផុតក្នុងករណីនេះដែលក្រុមអ្នករុករកមិនអាចរកឃើញសញ្ញាណអ្វីនោះឡើយសូម្បីតែបន្តិចពីប្រអប់ខ្មៅបំពាក់លើយន្តហោះនេះ។ ក៏ប៉ុន្តែ វាជាករណីពិសេសត្រូវតែកើតមានឡើង ព្រោះថា គ្មានសញ្ញាណទំនាក់ទំនងពីប្រអប់ខ្មៅ មានន័យថា វាពិតជាបានបាត់ មិនដំណើរការ ឬ ក៏ត្រូវបំផ្លាញដោយកម្លាំងមហិមាណាមួយហួសពីដែនសមត្ថភាពក្រុមវិស្វករផលិតយន្តហោះនេះ។

ទីតាំងដែលគេសង្ស័យថា ជាកន្លែងយន្តហោះបាត់ចេញពីរ៉ាដា

សូមចុចអាន៖ បាត់ខ្លួនយន្តហោះម៉ាឡេស៊ីមួយទាំងកណ្តាលអាធ្រាត្រ ធ្វើឲ្យគេសង្ស័យពីវាសនាអ្នកដំណើរជាង ២០០ នាក់

ទី៣ បំណែកយន្តហោះធ្លាក់ត្រូវអណ្ដែតលើផ្ទៃទឹក
ជារឿងមួយដែលមិនអាចប្រកែកបានព្រោះថា បើយន្តហោះនេះពិតជាបានផ្ទុះមែននោះ នៅពេលនេះក្រុមអ្នកស្រាវជ្រាវច្បាស់ជារកឃើញបំណែកយន្តហោះ សម្ភារៈផ្សេងៗក្នុងយន្តហោះ ឬអីវ៉ាន់របស់អ្នកដំណើរ អណ្ដែតនៅលើផ្ទៃសមុទ្រជាមិនខាន។ ផ្ទុយទៅវិញ កុំថាឡើយសំណល់បាក់បែកយន្តហោះ សូម្បីតែដានបន្តិចបន្តួចពីការធ្លាក់យន្តហោះនេះក៏គេរកមិនឃើញដែរ។

ទី៤ តើយន្តហោះនេះអាចត្រូវគេបាញ់ទម្លាក់ដោយមីស៊ីលដែរឬទេ?
ទ្រឹស្ដីមួយចំនួនបានលើកឡើងថា យន្តហោះនេះអាចត្រូវបាញ់កម្ទេចដោយមីស៊ីល ត្បិតអីមីស៊ីលអាចកម្ទេចយន្តហោះឲ្យនៅសល់បំណែកតូចៗបាន ដែលពិបាករកឃើញបំផុត។ តែវាមិនអាចទៅរួចនោះឡើយ ព្រោះថា មីស៊ីលមិនអាចលាក់បាំងពីការជាប់របស់ប្រព័ន្ធរ៉ាដាបានទេ មិនថាមីស៊ីលនោះបាញ់ចេញពីដី ពីទឹក ឬ ពីអាកាសយ៉ាងណាក៏ដោយ ប្រសិនបើវាហោះឡើងមែននោះ។

ទិសដៅដែលយន្តហោះ ប៊ូអ៊ីង ៧៧៧-២០០អ៊ីអាហោះឆ្ពោះពីម៉ាឡេស៊ីទៅទីក្រុងប៉េកាំង

សូមចុចអាន៖ មិនមានពលរដ្ឋខ្មែរនៅលើយន្តហោះម៉ាឡេស៊ីដែលបាត់ខ្លួននោះទេ

ទី៥ វាមិនមែនជារឿងអាថ៌កំបាំងនោះទេ ប្រសិនបើយន្តហោះនេះធ្លាក់នៅចំទីតាំងដែលបាត់ខ្លួន
អ្នកស៊ើបអង្កេតជាក្រុមជំនាញមានសមត្ថភាពខ្ពស់ដែលអាចសិក្សា ឬ គណនាយ៉ាងជាក់លាក់ក្នុងការកំណត់ទីតាំង រយៈចម្ងាយ ល្បឿនយន្តហោះដែលបានបាត់ធ្លាក់នេះ ប៉ុន្តែ ករណីយន្តហោះប៊ូអ៊ីង ៧៧៧ ពិតជាធ្វើឲ្យពួកគេទាល់តំរិះ និយាយមិនចេញ ព្រោះក្រុមការងារបានចុះស៊ើបអង្កេតក្នុងតំបន់សង្ស័យអស់ហើយ តែនៅតែគ្មានតម្រុយណាមួយដែលអ្នកទាំងនោះពើបប្រទះទេ។

ទី៦ ឬ ក៏យន្តហោះនេះត្រូវបានក្រុមភេរវជនប្លន់?
តើយន្តហោះនេះពិតជាត្រូវបានគេប្លន់ឬ យ៉ាងណា? សំនួរនេះមិនពិបាកឆ្លើយទេ ព្រោះថា ទោះបីជាប្រព័ន្ធរ៉ាដាត្រូវបានបិទនៅលើតួយន្តហោះ ក៏រ៉ាដានៅលើដីអាចចាប់បានដែរ ក្នុងការផ្ដល់សញ្ញា និង ត្រួតពិនិត្យការហោះហើររបស់យន្តហោះនេះ។ ដូច្នេះ ក្នុងករណីនេះ ការប្លន់យន្តហោះពិតជាមិនអាចទៅរួចនោះដែរ។ ក៏ប៉ុន្តែសម្រាប់យន្តហោះខាងលើ គឺវាបានបាត់ខ្លួនចេញពីរ៉ាដាតែម្ដង។

សង្ខេបជារួម តាមការលើកឡើងខាងលើនេះ គេអាចសន្និដ្ឋានបានថា យន្តហោះប៊ូអ៊ីង ៧៧៧នេះពិតជាបានបាត់ខ្លួន មិនមែនផ្ទុះ ឬធ្លាក់នោះឡើយ។ វាជាករណីស្មុគស្មាញ និងពិបាកពន្យល់បំផុត ដែលស្ថិតនៅជាភាពអាថ៌កំបាំងរហូតមកដល់ពេលនេះ។ដូច្នេះ ចម្លើយដ៏សមស្របមួយសម្រាប់ពេលនេះគឺមានតែរង់ចាំលទ្ធផល ស្រាវជ្រាវបន្តទៀតរបស់ក្រុមអ្នករុករកដែលមានរហូតដល់ទៅ១០ ប្រទេសកំពុងធ្វើការយ៉ាងសកម្មទាំងថ្ងៃទាំងយប់ប៉ុណ្ណោះ។ សមាសភាពទាំង ១០ប្រទេសនោះមាន ម៉ាឡេស៊ីខ្លួនឯង ចិន វៀតណាម អាមេរិក ឥណ្ឌូណេស៊ី ហ្វីលីពីន កូរ៉េ ជប៉ុន អូស្ត្រាលី និងចុងក្រោយបង្អស់គឺថៃ។

ទោះបីជាយ៉ាងណាក៏ដោយ តាមប្រភពព័ត៌មានចុងក្រោយបានឲ្យដឹងថា ក្រុមសាច់ញាតិជនរងគ្រោះចំនួន១៩គ្រួសារនៅតែអាចទាក់ទងដោយ ផ្ទាល់បានទៅបងប្អូនដែលបានបាត់ខ្លួន ក៏ប៉ុន្តែទូរសព្ទរោទិ៍គ្មានអ្នកលើក ហើយពួកគេកំពុងទទូចឲ្យក្រុមហ៊ុនអាកាសចរណ៍នេះ និងរដ្ឋាភិបាលម៉ាឡេស៊ីធ្វើការពន្យល់លំអិតពីករណីនេះ។

សូមបញ្ជាក់ថា យន្តហោះផ្ទុកអ្នកដំណើរ ២៣៩នាក់ ធ្វើដំណើរចេញពីទីក្រុងកូឡាឡាំពួរ ប្រទេសម៉ាឡេស៊ី បានបាត់ខ្លួនពីប្រព័ន្ធរ៉ាដាក្នុងរយៈពេល២ម៉ោង បន្ទាប់ពីចាកចេញពីទីក្រុង កូឡាឡាំពួរ ឆ្ពោះទៅកាន់ទីក្រុងប៉េកាំង កាលពីម៉ោង ១២ និង៤១នាទីរំលងអធ្រាត្រ ចូលថ្ងៃសៅរ៍ ទី ៨មីនា ២០១៤។ យន្តហោះនេះហោះចេញពីប្រព័ន្ធរាដ៉ា នៅម៉ោងប្រមាណជា ២ និង ៤០នាទីទៀបភ្លឺ៕