ខេមរៈ សិរីមន្ត ស្នើតុលាការកំពូលពន្លឿនដំណោះស្រាយលើបណ្ដឹងសាទុក្ខ

ខេមរៈ សិរីមន្ត ស្នើតុលាការកំពូលពន្លឿនដំណោះស្រាយលើបណ្ដឹងសាទុក្ខ

ខេមរៈ សិរីមន្ត កាលពីពេលថ្មីនេះ បានធ្វើការស្នើដល់តុលាកំពូល ធ្វើយ៉ាងណាពន្លឿនដំណើរការបណ្ដឹងសាទុក្ខក្នុងករណីគ្រោះថ្នាក់ចរាចរ ដែលបានកើតឡើងចំពោះរូបលោក និងជនរងគ្រោះផ្សេងទៀត កាលពីឆ្នាំទៅនោះ។

ទោះបីជាយ៉ាងណា នៅក្នុងជំនួបជាមួយ Sabay តារាចម្រៀងល្បីឈ្មោះរូបនេះ បានបង្ហាញពីសុទិដ្ឋិនិយមលើដីកាសាទុក្ខ របស់តុលាការកំពូលថា នឹងមានយុត្តិធម៌ដល់រូបគេ និង ក្រុមគ្រួសារជនរងគ្រោះផ្សេងទៀត ដែលបានបានបាត់បង់ជីវិត ក្នុងករណីនេះមិនខាន។

ម្យ៉ាងទៀត ដំណើរការរឿងក្ដីនេះ បានអូសបន្លាយពេលជាងមួយឆ្នាំមកហើយ ដែលរូបលោក និង ជនរងគ្រោះផ្សេងទៀត នៅតែមិនទាន់បានទទួលយុត្តិធម៌ពេញលេញនៅឡើយ បើទោះបីជាបានឆ្លងកាត់សាលាដំបូងខេត្តព្រះសីហនុ និងសាលាឧទ្ធរណ៍ ទទួលបានលទ្ធផលវិជ្ជមានយ៉ាងណាក្ដី។

“ចង់ឲ្យមានចំណុចរួម ដើម្បីរកយុត្តិធម៌ដល់ជនរងគ្រោះទាំងអស់ ព្រោះយូរដែរហើយ”។ តារាចម្រៀងរួបនេះបន្តថា គ្រួសារខ្លះទៀត បានជួបការលំបាកកាន់តែខ្លាំងឡើងមួយកម្រិតទៀត ដោយសារអ្នកស្លាប់ក្នុងករណីគ្រោះថ្នាក់ចរាចរខាងលើ ជាអ្នកស្វែងរកចំណូលផ្គត់ផ្គង់គ្រួសារសំខាន់នោះ។ ជាក់ស្ដែងកូនប្រុសរបស់តារាកំប្លែងជើងចាស់លោកយាយ ណយ សំណាង ជាដើម។

“ប្រសិនបើមានយុត្តិធម៌ ធ្វើឲ្យគ្រួសារបានស្ងប់ចិត្ត ហើយអ្នកស្លាប់ក៏បានស្ងប់ចិត្តដូចគ្នាដែរ”។ តារាល្បីរូបនេះ បង្ហាញជំហរជឿជាក់លើដីកាសាទុក្ខ របស់តុលាការកំពូលថា ប្រាកដជាមានចំណុចរួមមួយ ដែលធ្វើឲ្យខាងលោកអាចទទួលយកបាន ដែលចាត់ទុកជា ដំណោះស្រាយបែបយុត្តិធម៌នោះ។

កាលពីយប់ថ្ងៃទី ៧ ខែមីនា ឆ្នាំ ២០១៣កន្លងទៅ មានគ្រោះថ្នាក់ចរាចរមួយដ៏រន្ធត់ បានកើតឡើងនៅលើកំណាត់ផ្លូវជាតិលេខ៤ បណ្ដាលឱ្យមានមនុស្សស្លាប់ និងរបួស ក្នុងនោះរួមមានកូនប្រុសរបស់តារាកំប្លែង នាយ កុយ កូនរបស់យាយ ណយ សំណាង អ្នករាំម្នាក់ទៀតឈ្មោះ សោម សុវណ្ណារិទ្ធិ រួមទាំងអ្នកបើកបរផងដែរ។ ចំណែកលោក ខេមរៈ សិរីមន្ត រងរបួសស្រាល ខណៈអ្នករួមដំណើរផ្សេងទៀតរងរបួសធ្ងន់។

សាលាឧទ្ធរណ៍បានប្រកាសសាលដីកាកាលពីថ្ងៃទី១២ខែកុម្ភៈ ឆ្នាំ២០១៤ ដោយតម្រូវឲ្យខាងក្រុមហ៊ុនSK ផ្ដល់សំណងទៅជនរងគ្រោះ ក្រុមតារាចម្រៀងលោក ខេមរៈ សិរីមន្ត ដោយសម្រេចតាមសាលក្រមរបស់សាលាដំបូងខេត្តព្រះសីហនុកាលពីថ្ងៃទី ១៩ ខែ សីហា ឆ្នាំ ២០១៣ កន្លងទៅ៕

ប្រភព Sabay

មុន បន្ទាប់

មតិយោបល់