ខេមរៈ សិរីមន្តកាន់ប្រាក់ ១០០០ ដុល្លារ ជូន កាកបាទក្រហម

ខេមរៈ សិរីមន្តកាន់ប្រាក់ ១០០០ ដុល្លារ ជូន កាកបាទក្រហម

តារាចម្រៀង លោក ខេមរៈ សិរីមន្ត បានកាន់ប្រាក់ចំនួន ១០០០ ដុល្លារ ឡើងជូនសម្ដេច ហ៊ុន សែន នាយករដ្ឋមន្ត្រី ដើម្បីដាក់បញ្ចូលក្នុងមូលនិធិសប្បុរសធម៌កាកបាទក្រហមកម្ពុជា កាលពីព្រឹកមិញនេះ។

ថវិកា ១០០០ ដុល្លារនេះ ត្រូវបានលោកនាំយកទៅជូន សម្ដេច ហ៊ុន សែន ក្នុងទិវា ប្រារព្ធខួបលើកទី ១៥១ ឆ្នាំនៃទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា នៅទីស្នាក់ការកណ្ដាលកាកបាទក្រហមកម្ពុជា រាជធានីភ្នំពេញ កាលពីព្រឹកមិញនេះ។

ខេមរៈ សិរីមន្ត បានប្រាប់ Sabay តាមទូរសព្ទ ថា ថវិកា ១០០០ ដុល្លារនេះ គឺ ជាប្រាក់ផ្ទាល់ខ្លួនរបស់លោក ហើយក៏ជាលើកទី១ ដែលលោកបានជួយជាប្រាក់ ដល់កាកបាទក្រហម អឌ្ឍចន្ទក្រហម។ “កន្លងមកខ្ញុំជួយ កាកបាទក្រហមកម្ពុជា តែតាមការច្រៀង concert ទេ អត់ដែលបានជួយជាប្រាក់អីទេ តែឆ្នាំនេះខ្ញុំចង់ជួយជាប្រាក់ ខ្ញុំចង់ធ្វើបែបនេះយូរហើយ ខ្ញុំឡើងយកទៅជូន សម្ដេច និង លោកជំទាវ ផ្ទាល់តែម្ដង “។

សិរីមន្តបានបន្តទៀតថា ការជួយកាកបាទក្រហមកម្ពុជានេះ លោកគិតថា ថវិកាដែលលោកជួយនេះ នឹងជួយដល់ជនរងគ្រោះផ្ទាល់តែម្ដង ត្បិតអីនៅពេលមានគ្រោះមហន្តរាយនានា មានតែ កាកបាទក្រហមទេ ដែលទៅជួយមុនគេ ហេតុនេះលោកមិនព្រួយពីការបាត់ថវិកាលោកឡើយ។

លោក ខេមរៈ សិរីមន្ត បាននិយាយទៀតថា លោកនិឹងបន្តជួយដល់ កាកបាទក្រហមកម្ពុជា នៅឆ្នាំក្រោយៗ ទៀត ទៅតាមលទ្ធភាពរបស់លោក ក្នុងនោះដែរ តារាចម្រៀងល្បីឈ្មោះរូបនេះ ក៏បានស្នើដល់ ទស្សនិកជនក៏ដូចជា សប្បុរសជនផ្សេងទៀត មេត្តាផ្ដល់មូលនិធិដល់កាកបាទក្រហមកម្ពុជា ទាំងអស់គ្នា ទោះតិចក្ដីច្រើនក្ដី៕

ប្រភព Sabay

មុន បន្ទាប់

មតិយោបល់