ព្រោះតែភាសា ធ្វើឲ្យនិស្សិតម្នាក់ទទួលបានការងារបង្កើត Website ខ្នាតធំលេចមុខនៅចិន

ព្រោះតែភាសា ធ្វើឲ្យនិស្សិតម្នាក់ទទួលបានការងារបង្កើត Website ខ្នាតធំលេចមុខនៅចិន

ការលំបាកពេលខ្លះពិតជាអាចធ្វើឲ្យមនុស្សមានការផ្លាស់ប្ដូរពិតមែន។ ជាក់ស្ដែង អតីតនិស្សិតអាហារូបករណ៍នៅសាកលវិទ្យាល័យភូមិន្ទភ្នំពេញ ជំនាញវិទ្យាសាស្ត្រកុំព្យូទ័រ (IT) មានស្រុកកំណើតនៅស្រុកស្ទឹងត្រង់ ខេត្តកំពង់ចាម លោក ចាន់ដា សេងគីម អាយុ២២ឆ្នាំ បច្ចុប្បន្នជានិស្សិតឆ្នាំទី៣ ផ្នែកសុវត្ថិភាពព័ត៌មានវិទ្យា ( Information Security) នៃ University of Electric Science and Technology of China មិនត្រឹមទទួលបានអាហារូបករណ៍ទៅសិក្សានៅប្រទេសចិនក្នុងឆ្នាំ២០១០ប៉ុណ្ណោះទេ ប៉ុន្តែថែមទាំងបានក្លាយជាអ្នកកាន់កាប់ខាង System Management and Network Management ក្នុងក្រុម Biao Ji Li ទៀតផង។

Sengkim2

លោក ចាន់ដា សេងគីម

Sengkim3

លោក ចាន់ដា សេងគីម (ទី៣រាប់ពីស្ដាំ) ជាមួយក្រុមរបស់លោក

ទម្រាំមកដល់ពេលនេះ សេងគីមបានចាប់ផ្ដើមគ្រប់យ៉ាងពីចំណុចសូន្យទាំងអស់ ដោយលោកមិនចេះភាសាចិនសូម្បីមួយម៉ាត់ និងមិនស្គាល់អ្នកណាម្នាក់នៅទីនោះសោះ។

នៅសាកលវិទ្យាល័យនោះ មេរៀនត្រូវបានបង្រៀនជាភាសាចិន ហើយគ្រប់ឯកសារទាំងអស់សុទ្ធតែជាភាសាចិន និងពាក្យមួយចំនួនជាពាក្យបច្ចេកទេសធ្វើឲ្យលោកពិបាកយល់។ ជួនកាល សេងគីមធ្វើភាសាកាយវិការ និងសុំជំនួយពីនិស្សិតដែលរៀនជាមួយគ្នាឲ្យពន្យល់។ មានពេលខ្លះ គីមថែមទាំងវង្វេងផ្លូវទៀតផង តែសំណាងល្អបានតាក់ស៊ីជូនមកវិញ។

ក្រោយមកដើម្បីជម្នះនូវបញ្ហាជាច្រើននេះ សេងគីមបានរៀបចំពេលវេលា និងវិធីសាស្ត្រថ្មីៗដោយ ពង្រឹងស្វ័យសិក្សា ព្រោះបើមិនចេះភាសាចិនទេ ច្បាស់ជាឆ្នាំបន្ទាប់ត្រូវជួបហានិភ័យធំហើយ។

សេងគីមថា៖ ” ខ្ញុំយកការអានឲ្យក្លាយជាទម្លាប់ដូចជាអត្ថបទព័ត៌មាន ឬអានសៀវភៅជាដើម ដើម្បីឲ្យភាសាចិនរីកចម្រើនឆាប់រហ័ស។ អត្ថបទណា ឬប្រយោគណាដែលមិនសូវយល់ ខ្ញុំត្រូវអានម្ដងហើយម្ដងទៀតទាល់តែយល់អត្ថន័យ។ ម៉្យាងទៀត ខ្ញុំរំលឹកម្ដងហើយម្ដងទៀតនូវមេរៀនដែលបានរៀននៅសាលា កំណត់កាលវិភាគសិក្សាប្រចាំថ្ងៃ។ លើសពីនេះ ព្យាយាមសិក្សាជាក្រុមជាមួយមិត្តរួមថ្នាក់ដើម្បីទទួលបានបទពិសោធន៍ និងវិធីសាស្ត្រសិក្សាពីនិស្សិតចិន “។

ឆ្លងកាត់ការប្រឹងប្រែង និស្សិតរូបនេះទទួលបានលទ្ធផលល្អគ្រប់ឆមាស និងទទួលបានការសរសើរពីសំណាក់គ្រូ ព្រមទាំងមិត្តរួមដេប៉ាតេម៉ង់ទាំងអស់។

Sengkim1

អាស្រ័យហេតុនេះហើយ សេងគីមត្រូវបានគ្រូណែនាំឲ្យចូលរួមក្នុងក្រុមសិក្សាស្រាវជ្រាវ ” Biao Ji Li” អំពីការសរសេរ Website ខ្នាត Enterprise ជាមួយនឹងនិស្សិតចិនខ្លាំងៗដទៃទៀតនៅក្នុងសាកលវិទ្យាល័យ។ ទោះជាយ៉ាងណាក៏ដោយ ដើម្បីចូលក្រុមនេះបានត្រូវឆ្លងកាត់ការធ្វើតេស្តបីដង គឺលើកទី១ សរសេរកូដ (Code) មកអនុវត្តទៅលើ Huffman និង Algorithm។ លើកទី២ គេអោយឯកសារពីរបីជាភាសាអង់គ្លេស បន្ទាប់មកត្រូវសរសេរកូដដើម្បីធ្វើ Statistic ទៅលើពាក្យនីមួយៗថាតើពាក្យមួយហ្នឹងត្រូវបានប្រើប្រាស់ប៉ុន្មានដង ត្រូវបានប្រើប្រាស់នូវ Fileមួយណា នៅបន្ទាត់ទីប៉ុន្មាន។ ចំណែកលើកទី៣ គេអោយសរសេរអំពី Socket Communication on Linux ក្នុងនោះគឺមានការទាក់ទងគ្នារវាង Server និង Client។

សេង គីម និយាយបន្ថែមថា៖ ”ខ្ញុំបានខិតខំប្រឹងប្រែងអស់ពីសមត្ថភាពស្រាវជ្រាវរកកម្មវិធី Software ថ្មីដើម្បីសម្រេចកិច្ចការដែលប្រធានក្រុមដាក់ឲ្យ បំពេញឲ្យចប់មុនពេលវេលាកំណត់ដើម្បីទទួលបានការទទួលស្គាល់ ទំនុកចិត្តពីមិត្តរួមក្រុម និងអ្នកដឹកនាំក្រុម។ ជាលទ្ធផលខ្ញុំក៏ទទួលបានការទុកចិត្ត និងត្រូវបានអនុញ្ញាតឲ្យចូលរួមធ្វើគម្រោងធំៗដូចជា Website របស់សាលាជាមួយនឹងមិត្តរួមក្រុម។ ហើយសព្វថ្ងៃខ្ញុំកាន់កាប់ខាង System Management and Network Management ។ នៅពេលដែលក្រុមមានបញ្ហាទាក់ទងរឿងខាងលើ ខ្ញុំគឺជាអ្នកដោះស្រាយ”។

ឥលូវនេះ ក្រៅពីទទួលបាននូវចំណេះដឹងថ្មីៗជាច្រើនទាំងជំនាញក្នុងការសរសេរ Website ខ្នាតធំ ការសហការជាក្រុម ការទំនាក់ទំនងជាមួយម្ចាស់គម្រោងហើយ សេងគីមក៏ទទួលបានប្រាក់កម្រៃសមរម្យផងដែរ និងអត្ថប្រយោជន៍មួយទៀតគឺធ្វើឲ្យលោកអាចនិយាយភាសាចិនបានយ៉ាងស្ទាត់ជំនាញ។

សូមអាន៖ សិស្សពូកែធ្លាប់ប្រលងនៅអ៊ីរ៉ង់បានពិន្ទុលើសិស្សខ្មែរផ្សេងទៀត រកបានការងារធ្វើផុយៗនៅប្រទេសមហាអំណាច!

ទោះជាពេលខ្លះមានការមមាញឹកពីការងារក៏ដោយ ក៏និស្សិតរូបនេះមិនភ្លេចការងារនៅសាលាដែរ។ សេងគីមបានបែងចែកពេលវេលាច្បាស់លាស់ដើម្បីរក្សាលទ្ធផលសិក្សាកុំឲ្យធ្លាក់ចុះ។ នៅពេលដែលមានការរវល់ លោកបានឆ្លៀតយកពេលសម្រាក និងពេលវេលាកម្សាន្តយកមកមើលមេរៀនសាលា និងធ្វើ Homework។

សេងគីមយល់ឃើញថា ការធ្វើបែបនេះគឺជាវិធីមួយដ៏ល្អបំផុតសម្រាប់និស្សិតសាកលវិទ្យាល័យគ្រប់រូប ជាពិសេសនិស្សិតផ្នែកព័ត៌មានវិទ្យា ពីព្រោះវាអាចជួយលើកតម្កើងនូវការអនុវត្តផ្ទាល់នូវអ្វីដែលយើងបានសិក្សានៅសាលា និងទទួលបាននូវចំណេះដឹងថ្មីច្រើនដែលយើងមិនអាចទទួលបានពីសាលា ហើយជាបទពិសោធន៍ការងារដែលធ្វើឲ្យមានភាពងាយស្រួលរកការងារធ្វើក្នុងថ្ងៃអនាគត៕

ប្រភពពីះsabay

មុន បន្ទាប់

មតិយោបល់