កុំភ្លេច! អាហារល្បីរបស់កូរ៉េគ្រោងនឹងសម្ពោធ នៅថ្ងៃតែមួយនឹងផ្សារទំនើប AEONសប្ដាហ៍ក្រោយ

កុំភ្លេច! អាហារល្បីរបស់កូរ៉េគ្រោងនឹងសម្ពោធ នៅថ្ងៃតែមួយនឹងផ្សារទំនើប AEONសប្ដាហ៍ក្រោយ

នៅសល់មួយសប្ដាហ៍ទៀតប៉ុណ្ណោះ យុវវ័យទាំងអស់នឹងអាចភ្លក់រសជាតិអាហារ Fastfood ដ៏ល្បីរបស់កូរ៉េ ពីហាង LOTTERIA ខណៈហាងនេះគ្រោងនឹងបើកសម្ពោធទទួលអតិថិជននៅថ្ងៃតែមួយ នឹងផ្សារទំនើប AEON mall។ ផ្សារទំនើប AEON mall ដែលត្រូវបានចាត់ទុកជាផ្សារធំបំផុត នៅប្រទេសកម្ពុជា និងបានបើកឲ្យចូលទស្សនាកាលពីចុងសប្ដាហ៍មុន។

ក្នុងតួនាទីជាប្រធានតំណាង នៃក្រុមហ៊ុន Yinkok Food Corp. ដែលបានចុះកិច្ចព្រមព្រៀងជាមួយហាង LOTTERIA ដើម្បីផលិតអាហារដ៏មានឱជារស នៅទីក្រុងសេអ៊ូល ប្រទេសកូរ៉េ កាលពីពេលថ្មីៗនេះ លោក គួច សុខលី បានចំណាយពេល ផ្ដល់បទសម្ភាសដល់ Sabay ទាក់ទងនឹងដំណើរការលើកដំបូងរបស់ LOTTERIA នៅកម្ពុជាដូចតទៅ៖

Sokly

លោក គួច សុខលី

lotteria-0084-1-NEW1

Sabay៖ ជម្រាបសួរលោក ! តើរហូតមកដល់ពេលនេះហាង LOTTERIA បានត្រៀមលក្ខណៈអ្វីខ្លះ ហើយ សម្រាប់ថ្ងៃទទួលអតិថិជនលើកដំបូង?

លោក គួច សុខលី៖ បាទ ជម្រាបសួរ ! រហូតមកដល់ពេលនេះ ក្រុមហ៊ុនយើងបានរៀបចំគ្រប់គ្រាន់អស់ហើយ ទាក់ទងនឹងការបង្ហាត់បង្វឹកបុគ្គលិក។ ទាំងអស់ហ្មឹង គឺយើងបានបញ្ជូនបុគ្គលិកយើងទៅហ្វឹកហាត់ការងារនៅប្រទេសកូរ៉េ រយៈពេល៤០ថ្ងៃ ហើយមានបុគ្គលិកយើងមួយចំនួនទៀតនៅស្រុកខ្មែរ។ ខាង LOTTERIA ក៏បានបញ្ជូនក្រុមការងារពីកូរ៉េចំនួន៧ ទៅ៨ នាក់ ដើម្បីធ្វើការហ្វឹកហាត់ ព្រមទាំងរៀបចំជ្រើសរើសនូវ Menu ដែលសាកសមសម្រាប់ទីផ្សារស្រុកខ្មែរហ្មឹង ក៏យើងបានធ្វើរួចរាល់ដែរ។ អញ្ចឹងទាំងអស់ហ្មឹងគឺយើងរៀបចំបាន ៩៥%ហើយ។

Sabay៖ តើលោកមានការបារម្ភទេ ទាក់ទងនឹងការផ្គត់ផ្គង់វត្ថុធាតុដើម?

លោក គួច សុខលី៖ ចំពោះវត្ថុធាតុដើមគឺយើងមានជម្រើសច្រើនយ៉ាង។ តែអ្វីដែល LOTTERIA កម្ពុជាជ្រើសរើសយកហ្មឹងគឺលក្ខណៈ Cooperate សុទ្ធសាធតែម្តង។ អញ្ចឹងប្រសិនបើមានតម្រូវការ លើសពីអ្វី ដែលយើងគ្រោងទុក។ ឧទាហរណ៍ថា ក្នុងរយៈពេលបីខែយើងត្រូវអស់ចំនួនប៉ុណ្ណឹង។ ប៉ុន្តែតម្រូវការជាក់ស្តែងអាចលើសពីនេះ យើងអាចជួបបញ្ហាតិចតួច។ តែសំខាន់ក្រុមការងារយើងគាត់ឃ្លាំមើលជាប់នៅពេល ដែលយើងចាប់ផ្ដើមដំណើរការ ថាតើតម្រូវការនេះឆ្លើយតបដូចការគ្រោងទុកដែរទេ? ។ អញ្ចឹងខ្ញុំ គិតថាបញ្ហាជួបនឹងការខ្វះខាតសម្ភារៈ ដែលយើងត្រូវនាំចូលមកយើងនឹងអាចជួប តែយើងនឹងព្យាយាម ថាតើជួបបញ្ហា ក្នុងកម្រិតណា។

Sabay៖ ផ្សារ AEON មានក្តីរំពឹង ទទួលបានអតិថិជនចូលទៅទស្សនាផ្សារនេះ រហូតដល់ ១០ លាន នាក់ ក្នុង១ឆ្នាំ។ ចុះ LOTTERIA មានក្តីរំពឹងរបស់ខ្លួនយ៉ាងដូចម្ដេចដែរ?

លោក គួច សុខលី៖ តាមជាក់ស្ដែងអ្វី ដែលយើងគ្រោងទុកសម្រាប់ LOTTERIA មួយនេះ យើងយកតែ ២ ឬ ៣ ភាគរយ នៃការគ្រោងទុករបស់ AEON ប៉ុណ្ណោះ។ ដោយសារនៅក្នុងណឹងទី១ ១០លាននាក់ នៅក្នុងហ្មឹងមាន ៥០ % ដែលគាត់ចូលសម្រាប់ញ៉ាំ។ ៥០ % ទៀតគាត់ដើរសម្រាប់ទិញអីចឹង។ ដូច្នេះ ចូលទៅសម្រាប់ញ៉ាំ យើងនឹងបែងចែក ៥០% រួមនឹងកន្លែងកម្សាន្តផេ្សងៗ ដទៃទៀត ។ ចឹងត្រលប់មកវិញ យើងរំពឹងទុកថា ២ ឬ ៣ ភាគរយប៉ុណ្ណោះ។ នេះមិនមែនជាតួលេខហួសហេតុពេកទេ ព្រោះនេះគឺជាចំនួនតួចជាងគេ។ ម្យ៉ាងតួលេខ ក្នុងរយៈពេលបីខែក៏យើងកំណត់រួចរាល់ហើយស្របគ្នាទៅនឹងអ្វីដែល AEON រំពឹងទុកដែរ។ ដូច្នេះបើ AEON ប្រែងប្រួល ទាំងយើងក៏នឹងមានការជជែកគ្នាតាមហ្មឹងដែរ។ ខ្ញុំជឿជាក់ថា យើង នឹងទទួលបានការគាំទ្រពីអតិថិជន ដោយសារ LOTTERIA ក៏មាននៅប្រទេសជិតខាង មានប្រទេសជប៉ុន ប្រទេសវៀតណាម ភូមា និងប្រទេសចិនអីចឹង។ ដូច្នេះទាំងអស់នេះយើងឆ្លុះបញ្ចាំងទាំងរស់ជាតិ រួមនឹងគ្រឿងផ្សំ ។ ម្យ៉ាងក៏មាន Menu ច្រើនជាងកន្លែងផេ្សងមាន ក្នុងនោះមិនមែនពាក់ព័ន្ធតែ Hamburger តែមួយមុខទេ។ វាមានបង្អែមជាច្រើនមុខទៀត ដែលជាតម្រូវការរបស់ប្រជាពលរដ្ឋនៅតំបន់អាស៊ីរបស់យើងតែម្តង។ ទាំងយុវវ័យ និងមនុស្សចាស់។ អញ្ចឹងអ្វី ដែលយើងទទួលមតិ Feedback ពីអតិថិជនធ្វើការងារនៅលើ Online គឺយើងទទួលបាននូវ Feedback ល្អៗច្រើន ហើយ ដែលមានប្រជាជនយើងទៅប្រទេសកូរ៉េ ក៏គាត់ធ្លាប់ស្គាល់ LOTTERIA។ អញ្ចឹងគាត់រំពឹងថា អ្វីដែលយើងធ្វើហ្មឹង វានឹងមានគុណភាពដូចនៅប្រទេសកូរ៉េ ហើយគាត់គឺជាអតិថិជនរបស់យើងតែម្តង។

Sabay៖ តើអាចជាសញ្ញា នៃការងើបឡើងសេដ្ឋកិច្ចកម្ពុជាដែរឬយ៉ាងណា ខណៈច្រើនឆ្នាំមកហើយ ដែល LOTTERIA មានវត្តមាននៅប្រទេសមានសក្ដានុពលសេដ្ឋកិច្ច?

លោក គួច សុខលី៖ ខ្ញុំគិតថា តាំងពីឆ្នាំ១៩៩០ រហូតមកដល់បច្ចុប្បន្ន ពីមួយឆ្នាំទៅមួយឆ្នាំសេដ្ឋកិច្ចរបស់កម្ពុជាមានការផ្លាស់ប្តូរ។ កាលណាសេដ្ឋកិច្ច និងជីវភាពរបស់ប្រជាពលរដ្ឋក៏មានការផ្លាស់ប្តូរ ចំណង់ចំណូលចិត្តរបស់គាត់ក៏មានការផ្លាស់ប្តូរផងដែរ។ បើយើងមើលពីឆ្នាំ២០០០ មកដល់បច្ចុប្បន្ន គឺមានការប្លែកច្រើនទាំងការរស់នៅ ទាំងម្ហូបអាហារ។ ពីមុនហាងកាហ្វេ យើងមានតែ ៤ ទៅ៥ ប៉ុណ្ណោះ ក្នុងរាជធានីភ្នំពេញ នៅឆ្នាំ២០០០ ឥឡូវ បើរាប់គឺរាប់អត់អស់ទេ។ អញ្ចឹងតម្រូវការរបស់អតិថិជន ការផ្លាស់ប្តូររសជាតិរបស់អតិថិជន គឺទៅតាមសេដ្ឋកិច្ច និងអ្វីដែលគាត់មាន។ បន្ទាប់ពីនោះយើងក៏មានភ្ញៀវទេសចរណ៍ ដែលគាត់អញ្ជើញចូលមកកម្ពុជា ក្នុងណឹង យើងក៏មានភ្ញៀវមកពីកូរ៉េ ក្នុងចំណាត់ថ្នាក់លេខ៣ ឬ លេខ ៤ ។ ដូច្នេះវាកាន់តែនាំឲ្យ LOTTERIA ទទួលនូវភាពជោគជ័យ។ ខ្ញុំគិតថា នេះគឺជាមោទនភាពរបស់កម្ពុជាផងដែរ ព្រោះបើសិនជាទីផ្សាររបស់លោកអត់ទាន់ល្អ អញ្ចឹងក្រុមហ៊ុនរបស់គេ ក៏អត់ឲ្យម៉ាកយីហោរបស់គេមកយើងដែរ។ ទាំងអស់ហ្មឹងគឺយើងអាចផ្អែកទៅលើកត្តាសេដ្ឋកិច្ចនេះឯង ព្រោះយើងអត់មានទីផ្សារគ្រប់គ្រាន់។ អញ្ចឹងត្រលប់មកវិញខ្ញុំគិតថាជាមុខមាត់របស់កម្ពុជា ដែលយើងមានម៉ាកយីហោជាច្រើន ចូលមកកម្ពុជា ដូចគ្នានឹង LOTTERIA ដែលបានសម្រេចចិត្តប្រគល់ម៉ាកយីហោរបស់គេមកយើង។ តាមពិតទៅទម្រាំបាន ម៉ាកយីហោ នេះយើងបានចចារគ្នាជិត២ ឆ្នាំ។ អញ្ចឹងការសម្រេចចូលមកកម្ពុជានៅពេលនេះ ខ្ញុំគិតថា ជាពេលវេលាដ៏ស័ក្តសមបំផុត។

12-03(72)

លោក គួច សុខលី ប្រធានតំណាងនៃក្រុមហ៊ុន Yinkok Food Corp ពេលចុះកិច្ចព្រមព្រៀងជាមួយប្រធានប្រតិបត្តិ Lotteria លោក Rho Il-sik

Sabay៖ កន្លងមកពលរដ្ឋមួយចំនួនមានការព្រួយបារម្ភចំពោះអាហារ មានសារធាតុ កូលេសស្តេរ៉ូលច្រើន។ សម្រាប់ អាហារ Fastfood នៅ LOTTERIA វិញបានគិតគូរយ៉ាងដូចម្ដេចដែរ?

លោក គួច សុខលី៖ បាទ ! បើយើងសិក្សាពីអាហារទាំងអស់ អាហារណាក៏អាចមានបញ្ហាដល់សុខភាពដែរ ប្រសិនជាយើងញ៉ាំច្រើនពេក។ ដូចយើងញ៉ាំបាយរាល់ថ្ងៃចឹង គ្រូពេទ្យក៏ហាមយើងអត់ឲ្យញ៉ាំបាយដែរ។ តែសំខាន់ដូចខ្ញុំនិយាយអញ្ចឹង LOTTERIA គឺយើងព្យាយាមយកសារធាតុណា ដែលប៉ះពាល់តិចបំផុត។ យើងបានយករូបមន្តតាមកូរ៉េ ដោយសារប្រទេសកូរ៉េ បានធ្វើការសិក្សាស្រាវជ្រាវជាច្រើននៅលើ Menu មួយៗ។ អញ្ចឹងចង់និយាយថា បើយើងចង់បានអាហារមួយ ដែលមានគុណភាពល្អ គឺយើងនឹងឃើញនូវតម្លៃថ្លៃបន្តិច។ អ្វីដែលក្រុមហ៊ុនធ្វើមិនមែនគិត តែក្រុមហ៊ុនមួយមុខនោះទេ តែយើងក៏បានគិតដល់សុខភាពរបស់ប្រជាពលរដ្ឋផងដែរ។ ដូច្នេះបើយើងសិក្សាឲ្យច្បាស់ប្រភេទ អាហារ Fastfood ពាក់ព័ន្ធនិង កូលេសស្តេរ៉ូល គឺអត់មានទេ គឺដោយសារបើយើងនិយាយបកមកវិញ នំប៉័ង គឺជាអាហារសុខភាព មួយ ហើយសាច់មិនមែនយើងប្រើសាច់ខ្លាញ់នោះដែរ។ អញ្ចឹងទាំងអស់ហ្មឹងបើយើងសរុបមកវិញ មិនប៉ះពាល់សុខភាពអីនោះទេ ។ អ្វីដែលព័ត៌មានផ្សាយកន្លងមក ដូចជានៅអាមេរិក Hamburger មួយគឺធ្វើ ៥ ទៅ៦ ជាន់ ឬ ៧ ទៅ៨ ជាន់ និយាយទៅគឺធំមែនទែន ។ ទំហំធំនេះយើងត្រូវតែប្រើសាច់ច្រើន ។ ដូច្នេះការញ៉ាំសាច់ច្រើនគឺអាចប៉ះពាល់ដល់សុខភាពយើងហើយ។ អញ្ចឹងបើយើងនិយាយពីផលប៉ះពាល់ទៅលើសុខភាពចំពោះការកើនឡើង ជាតិកូលេសស្តេរ៉ូលសឹងតែអត់មាន ពោលគឺដូចគ្នានឹងអាហារ ដែលយើងញ៉ាំរាល់ថ្ងៃដែរ។

ប្រភពះsabay

មុន បន្ទាប់

មតិយោបល់