ក្មេងប្រុសម្នាក់ ត្រូវភ្លើងឆេះស្លាប់ ដោយសារ អ្នកស្រវឹង ជិះម៉ូតូ ទៅបុកកន្លែងលក់សាំង

ក្មេងប្រុសម្នាក់ ត្រូវភ្លើងឆេះស្លាប់ ដោយសារ អ្នកស្រវឹង ជិះម៉ូតូ ទៅបុកកន្លែងលក់សាំង

ខេត្តកំពត ៖ ក្មេងប្រុស-ស្រី២នាក់ ត្រូវភ្លើងឆាបឆេះពេញខ្លួន ក្នុងនោះក្មេងប្រុសម្នាក់បានស្លាប់ បន្ទាប់ពីបុរសស្រវឹងជិះម៉ូតូ ទៅបុកដបមានសាំង កំពុងដាក់លក់ នៅមុខផ្ទះ ដែលហេតុការណ៍នេះ កើតឡើង កាលពីវេលាម៉ោង០៧ និង៣០នាទីយប់ ថ្ងៃទី២១ កុម្ភៈ ២០១៦ ស្ថិតនៅជិតច្រកទ្វារព្រំដែន អន្តរជាតិព្រែកចាក ក្នុងភូមិថ្កូវ ឃុំប្ញស្សីស្រុកខាងលិច ស្រុកកំពង់ត្រាច ។

ប្រភពឱ្យដឹងថា ក្មេងដែលត្រូវភ្លើងឆេះស្លាប់ ឈ្មោះហិន ស៊ីញ ភេទប្រុស អាយុ៨ឆ្នាំ និងម្នាក់ទៀត រងរបួសធ្នង់ឈ្មោះបាន ស្រីលាភ ភេទស្រី អាយុ៤ឆ្នាំ ទាំង២នាក់ មានទីលំនៅ ក្នុងភូមិកើតហេតុខាងលើ ។

ចំណែកបុរស២នាក់ ជិះម៉ូតូ ដែលគេដឹងថា ស្រវឹងនោះ ម្នាក់ឈ្មោះអែម គង់ ហៅគង់ អាយុ២៧ឆ្នាំ និងម្នាក់ទៀតរួមដំណើរជាមួយ មិនស្គាល់អត្តសញ្ញាណ មានទីលំនៅ ភូមិកោះគ្រឹស្នា ឃុំប្ញស្សីស្រុក ត្រូវបាននគរបាលឃាត់ខ្លួនបញ្ជូនទៅស្នងការដ្ឋានខេត្ត ដើម្បីរង់ចាំ ការដោះស្រាយ ។

ប្រភពបន្តថា មុនពេលកើតហេតុ គេឃើញបុរស ទាំង២នាក់ ជិះម៉ូតូក្នុងទិសដៅ ពីជើង ទៅត្បូង លុះមកដល់ចំណុចកើតហេតុ ក៏ជ្រុលចង្កូត ទៅដបប្រេងសាំង ដែលគេដាក់លក់នៅមុខផ្ទះ ហើយដួលរលំ ដបសាំង៣ដបស្រោចទៅលើប៊ូស៊ីម៉ូតូ ក៏ឆាបឆេះ ទៅលើក្មេងប្រុស-ស្រី ទាំង២នាក់តែម្តង ៕