ស្តាយពេក ! ស្ត្រីម្នាក់ ស្រែកទ្រហោយំ

ស្តាយពេក ! ស្ត្រីម្នាក់ ស្រែកទ្រហោយំ

រាជធានីភ្នំពេញ ៖ វាពិតជាគួរអោយសង្វេគខ្លាំងណាស់ ដែលយើងបានឃើញ និងឮអ្នករងគ្រោះទ្រហោយំនៅនឹងមុខដោយសារតែស្តាយរបស់របរដែលបាត់បង់ទៅនោះ ដូចជាស្ត្រីម្នាក់នេះបានទ្រហោយំបន្ទាប់ពីត្រូវរងគ្រោះដោយសារតែចោរឆក់កាបូបយកទៅបាត់ ។

ហេតុការណ៍ចោរឆក់កាបូបនេះបានកើតឡើងកាលពីវេលាម៉ោង៩ និង៥០នាទីយប់ ថ្ងៃទី១៨ ខែមេសា ឆ្នាំ២០១៦ នៅតាមបណ្តោយវិថីព្រះមុនីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក ។

រូបភាព៖ ស្រ្តីដែលត្រូវចោរឆក់

ស្ត្រីរងគ្រោះដោយចោរឆក់នេះឈ្មោះ ឆាយ វ៉ាន់ធូ អាយុ៣៨ឆ្នាំ ជាអាជីវករលក់ដូរនៅផ្សារថ្មី ស្នាក់នៅក្នុងបុរីសូនី សង្កាត់ស្ទឹងមានជ័យ ។

ប្រភពព័ត៌មានបានឲ្យដឹងថា នៅមុនពេលកើតហេតុគេឃើញស្ត្រីរូបនោះបានជិះម៉ូតូ១គ្រឿងផលិតនៅប្រទេសកូរ៉េ ពាក់ស្លាកលេខ ឆ-4979-ភព១ ធ្វើដំណើរតាមវិថីព្រះមុនីរ៉េត ក្នុងទិសដៅពីកើតទៅលិច គោលបំណងត្រឡប់ទៅផ្ទះវិញ ខណៈមកដល់ចំណុចកើតហេតុជិតដល់ស្ពានអាកាសស្ទឹងមានជ័យ ស្រាប់តែមានជនសង្ស័យម្នាក់ជិះម៉ូតូស្របគ្នាមកធ្វើសកម្មភាពឆក់កាបូបបានសម្រេច រួចជិះគេចខ្លួនឡើងលើស្ពានអាកាសទៅបាត់ ។

ស្ត្រីរងគ្រោះបានយំរៀបរាប់ឲ្យដឹងថា នៅក្នុងកាបូបដែលត្រូវចោរឆក់នោះមានទូរស័ព្ទ២គ្រឿង, កាតទូរស័ព្ទមួយចំនួន, ប្រាក់សរុបប្រមាណជិត១០០០ដុល្លារ ព្រមទាំងឯកសារគេជំពាក់ប្រាក់មួយចំនួន ។

បន្ទាប់ពីរងគ្រោះ គេឃើញស្ត្រីរូបនោះស្រែកទ្រហោយំរកនគរបាលខណ្ឌទួលគោកឲ្យជួយ ។ លុះក្រោយមកទើបនគរបានចុះទៅដល់នាំទៅសាកសួរ ។

ប្រភព ៖ កោះសន្តិភាព

កំណត់ហេតុខ្មែរឡូត

គួររំលឹកផងដែរថា កាលពីពេលថ្មីៗកន្លងទៅនេះ ចោរឆក់វ័យក្មេងម្នាក់ បានសារភាព នៅចំពោះមុខកម្លាំង នគរបាលខណ្ឌដូនពេញ ក្រោយពីបានឃាត់ខ្លួន នៅចំណុច ផ្លូវលេខ១៤៨ កែងផ្លូវលេខ១៣ សង្កាត់ផ្សារកណ្តាល២ នៅម៉ោងប្រមាណ ១១៖៤០នាទី ថ្ងៃទី១ ខែមេសា ឆ្នាំ២០១៦ ថាក្នុងរយៈពេល៧ខែ កន្លងមកនេះ បានធ្វើសកម្មភាពឆក់ ក្នុងភូមិសាស្រ្តរាជធានីភ្នំពេញ ចំនួនជិត២០០ដង។

ជនសង្ស័យ ប៊ុន ណាឃីន ភេទប្រុស អាយុ១៦ឆ្នាំ ដែលបច្ចុប្បន្នស្នាក់នៅផ្ទះលេខA១៦ ផ្លូវលេខ៥ សង្កាត់ឫស្សីកែវ ខណ្ឌឫស្សីកែវ បានសារភាពថា រូបគេបានចេញ ធ្វើសកម្មភាពឆក់ ចាប់តាំងពីខែតុលា ឆ្នាំ២០១៥ ហើយបើគិតមកទល់ ពេលឃាត់ខ្លួននេះ គឺបានធ្វើសកម្មភាព ឆក់ចំនួនជិត២០០ដង ដែលភាគច្រើន គឺឆក់នៅម្តុំសាលាវិទ្យាល័យព្រះស៊ីសុវត្ថិ ហើយលុយដែលបាន មកពីការឆក់ភាគច្រើន យកទៅប្រើប្រាស់គ្រឿងញៀន និងមួយចំនួនទៀត យកទៅលេងល្បែង។

សូមបញ្ជាក់ថា ក្នុងប្រតិបត្តិការ ឃាត់ខ្លួនចោរឆក់វ័យក្មេងនេះ កម្លាំងនគរបាល បានដកហូតម៉ូតូ១គ្រឿង ម៉ាកZOOMER X ពណ៏ខ្មៅ ស្លាកលេខភ្នំពេញ 1FT:6240។

រូបភាព៖ ចោរឆក់វ័យក្មេងម្នាក់

ជាមួយគ្នានេះដែរ កាលពីវេលាម៉ោង៦និង៥០នាទីយប់ថ្ងៃទី៩ មីនា នៅក្នុងបរិវេណមណ្ឌលកម្សាន្តកោះពេជ្រមុខអគារL ស្ថិតក្នុងសង្កាត់ទន្លេបាសាក់ ខណ្ឌចំការមន នារីវ័យក្មេងម្នាក់ ខណៈទៅដល់មុខរោងការ នៅកោះពេជ្រអគារL ទាញទូរស័ព្ទរកមិត្តភក្កិចេញមកទទួល ត្រូវជនសង្ស័យឆក់បានសម្រេច តែជិះរត់គេចខ្លួន មិនបានសម្រេច ត្រូវសន្តិសុខកោះពេជ្រ ឃាត់ខ្លួនប្រគល់ឲ្យសមត្ថកិច្ច។

ជនសង្ស័យ ឈ្មោះ សេង រ៉ា វុធ អាយុ២៥ឆ្នាំ ស្នាក់នៅសង្កាត់ទួលស្វាយព្រៃ២ ខណ្ឌចំការមន មានស្រុកកំណើតនៅ ភូមិតាខ្មៅ ក្រុងតាខ្មៅ ខេត្តកណ្តាល ។ ចំណែកម្ចាស់ទូរស័ព្ទ ឈ្មោះ តាំង ឈីវគឹម អាយុ២៤ឆ្នាំ ស្នាក់នៅផ្ទះលេខ៤ សង្កាត់បឹងត្របែក ខណ្ឌចំការមន ។

នារីម្ចាស់ទូរស័ព្ទបាននិយាយថា មុនពេលកើតហេតុ នាងមកហូបការមិត្តភក្កិនៅកោះពេជ្រអគារL ខណៈមកដល់មុខរោងការ នាងក៏យកទូរស័ព្ទម៉ាក iPhone 6 Plus ទូរស័ព្ទទៅរកមិត្តភក្កិឲ្យចេញមកទទួល ស្រាប់តែលេចមុខជនសង្ស័យម្នាក់ជិះម៉ូតូម៉ាកហុងដាឌ្រីម ស៊េរីរី២០១៦ ពណ៌ខ្មៅ អត់ស្លាកលេខ មកជិតនិងធ្វើសកម្មភាពឆក់ទូរស័ព្ទពីនាងបានសម្រេចហើយ តែជនសង្ស័យជិះម៉ូតូរត់គេចខ្លួន ភ្លាមៗនោះសន្តិសុខរបស់មណ្ឌលកម្សាន្តកោះពេជ្រ និងកម្លាំងល្បាតរបស់ខណ្ឌចំការមនអន្តរាគមន៍ដេញចាប់បាន ត្រូវប្រជាពលរដ្ឋស្វាគមន៍មួយដៃមួយជើងម្នាក់បែកឈាមពេញមុខ ។

នាងបន្តថា ចំណែកទូរស័ព្ទ និងប្រាក់អាមេរិក៥០ដុល្លារ ទុកសម្រាប់ចងដៃការដែលចោរឆក់យកទៅនោះ នៅតែបាត់ដដែលរកមិនឃើញ ។

ក្រោយពេលកើតហេតុ ម្ចាស់ទូរស័ព្ទបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលទន្លេបាសាក់ ដើម្បីឱ្យសមត្ថកិច្ចកសាងសំណុំរឿងចាត់ការតាមច្បាប់ ៕

រូបភាព៖ ចោរឆក់ទូរស័ព្ទដៃ iPhone 6 Plus