រឿង “រនាតស្នេហ៍” ថតជួបខ្មោចមែនទែន តារាសម្ដែងច្រើននាក់ នាំគ្នាទៅស្រោចទឹក

រឿង “រនាតស្នេហ៍” ថតជួបខ្មោចមែនទែន តារាសម្ដែងច្រើននាក់ នាំគ្នាទៅស្រោចទឹក

តារាប្រុស-ស្រី នៅក្នុងរឿង “រនាតស្នេហ៍” បានទៅស្រោចទឹកបណ្ដោះគ្រោះ បន្ទាប់ពីល្បីថា តារាសម្ដែង និង អ្នកដឹកនាំរឿងបានជួបខ្មោចលង។ នេះបើតាមការឲ្យដឹងពី លោក សាវិន ហ្វីលីប តារាសម្ដែងនៅក្នុងរឿងមួយនេះ។

លោក សាវិន ហ្វីលីប បាននិយាយថា ការនាំគ្នាទៅស្រោចទឹកនោះ បានធ្វើឡើងក្នុងអំឡុងសប្ដាហ៍មុននៅ ក្នុងទីអារាមមួយជិតប្រាសាទបន្ទាយស្រី។ មូលហេតុ ដែលនាំឲ្យ តារាសម្ដែងទៅស្រោចទឹក ក៏ព្រោះរឿងមួយនេះ ពេលកំពុងថតជួបខ្មោចមែនទែន និង តាមក្បួនទស្សន៍ទាយឃើញថា ប្រសិនបើមិនធ្វើត្រឹមត្រូវតាមក្បួនខ្នាតនោះ និង មានការស្លាប់មនុស្សរហូតដល់ទៅ ៣ នាក់។

លោក សាវីន ហ្វីលីប បានឲ្យដឹងបន្ថែមថា ក្រោយពីស្រោចទឹករួច អ្នកដឹកបានឲ្យតារាសម្ដែងសម្រាកថតរហូតដល់ទៅ ៤ ថ្ងៃ ហើយបន្ទាប់មកបានធ្វើពិធីក្រុងពាលីសាជាថ្មី ដោយសរុបមក រឿង “រនាតស្នេហ៍” បានក្រុងពាលីចំនួន ៣ ដង មកហើយ។

ក្រោយពីក្រុងពាលីត្រឹមត្រូវតាមក្បួនខ្នាតមក តារាសម្ដែងទាំងអស់មានអារម្មណ៍ស្រស់ស្រាយវិញហើយ។ បច្ចុប្បន្នរឿងមួយនេះបានដំណើរការថតបានជាង ១០ ភាគ រួចហើយ ក្នុងចំណោមសាច់រឿងទាំងអស់មាន ៦០ ភាគ ដែលប្លង់ភាគច្រើនធ្វើនៅលើទឹកដីសៀមរាបទាំងអស់។

កាលពីសប្ដាហ៍មុននេះ អ្នកដឹកនាំរឿង បានឲ្យដឹងថា រឿង “រនាថតស្នេហ៍” បានធ្វើពិធីក្រុងពាលីចំនួនបីដង ក្នុងនោះធ្វើនៅកៀនស្វាយម្ដង និង នៅខេត្តសៀមរាប ចំនួន ២ ដង។ លោក សាន វិសាល បាននិយាយថា មូលហេតុដែលនាំឲ្យមានពិធីក្រុងពាលី រហូតដល់ទៅ ៣ ដងនេះ ក៏ព្រោះតែពេលដែលចេញថត តួសម្ដែងមួយចំនួនក៏ដូចជារូបលោក ត្រូវបានវិញ្ញាណខ្មោចចូលសន្ធិតស្ទើរគ្រប់ៗគ្នា។