ជាងដែកភ្លាត់ស្នៀត មិនបានប្រយត្ន័ត្រូវខ្សែភ្លើងឆក់

ជាងដែកភ្លាត់ស្នៀត មិនបានប្រយត្ន័ត្រូវខ្សែភ្លើងឆក់

ខេត្តកំពង់ចាម ៖ កូនជាងផ្សារដែកម្នាក់ឈ្មោះ យោគ សេង អាយុ១៨ឆ្នាំ មានស្រុកកំណើតនៅភូមិឈ្នះជ័យលើ ឃុំរាធរ ស្រុកព្រះស្តេច ខេត្តព្រៃវែង បានភ្លាត់ស្នៀតដោយលើកដែក ចូលដែនអគ្គីសនីខ្សែកាបបណ្តាលឲ្យឆក់ខ្លោចមួយកំណាត់ខ្លួន ពេលកំពុងតែបំពេញការងារ ។ ហេតុការណ៏នេះកើតឡើងនៅវេលាម៉ោង៩និង១០នាទីព្រឹក ថ្ងៃទី៥ ខែមិថុនា ឆ្នាំ២០១៦ នៅភូមិកកោះ ឃុំមៀន ស្រុកព្រៃឈរ ត្រូវបានដឹកតាមរថយន្តសាមុយ មកសង្គ្រោះជាបន្ទាន់នៅមនី្ទរពេទ្យខេត្ត ។

តាមបុរសឈ្មោះ សេក ផាត អាយុ៣៧ឆ្នាំ ជាងផ្សារដែកនៅស្រុកព្រៃឈរ ប្រាប់ឲ្យដឹងថា នៅកន្លែងរោងម៉ាស៊ីនកិនស្រូវឈ្មោះ ស្រ៊ុន ក្នុងភូមិកកោះ ឃុំមៀន បានហៅរូបលោកឲ្យមកផ្សារតសំយាបដំបូលរោងម៉ាស៊ីនកិនស្រូវ ដែលមានកំពស់ប្រហែល៦ម៉ែត្រ ដោយកូនប្រុសឈ្មោះ សេង បានធ្វើការជាមួយដែរនាព្រឹកថ្ងៃខាងលើ ។ ជាងផ្សារដែកឈ្មោះ សេក ផាត ប្រាប់បន្តថា ក្នុងពេលដែលកំពុងតែធ្វើការបានជាង១ម៉ោងកូនប្រុសបានយកដែកនៅលើដំបូលទាញហុចចុះមកក្រោម ដើម្បីឲ្យកូនជាងដែកទទួលយកជាបន្តបន្ទាប់។

ក្នុងពេលនោះដោយបានលើកដែកជ្រុង១ដើម ចុះមកដីហើយចុងដែកនោះ គឺនៅចម្ងាយប្រហែល១ ម៉ែត្រដល់ខ្សែកាបបង្គោលបេតុងអគ្គីសនី ដែលនៅជាប់នឹងផ្លូវជាតិលេខ៧ ជាហេតុបណ្តាលឲ្យឆក់បែកផ្កាភ្លើងព្រាត ហើយកូនប្រុសបានដួលមកលើដំបូលមិនទាន់នឹងដល់ផង គាត់ជាឪពុក នៅក្បែរបានស្ទុះទ្រទាន់ពេលវេលា ។ បន្ទាប់មកបានសែងទម្លាក់ចុះមកដី បង្កឲ្យមានការភ្ញាក់ផ្អើលដល់អ្នកភូមិផងរបងក្បែរនោះ នាំគ្នាជួយសង្គ្រោះបឋមដោយបានយកខ្សាច់មកកប់ ប្រហែលជាកន្លះម៉ោងរាងបានធូរស្រាលក៏ប្រញាប់ហៅរថយន្តសាមុយ របស់មន្ទីរពេទ្យបង្អែកស្រុកព្រៃឈរ មកដឹកយកមកសង្គ្រោះនៅមន្ទីរពេទ្យខេត្ត ។

គួររំលឹកថា កាលពីវេលាម៉ោង៤និង៤៥នាទីរសៀលថ្ងៃទី១៣ ខែឧសភា ឆ្នាំ២០១៦ នៅត្រង់ចំណុចភូមិតាមូត ឃុំគរ ស្រុកព្រៃឈរ មានករណីឆក់ខ្សែភ្លើង លើក្រុមគ្រួសារមួយមានឈ្មោះ ឈុន នី ភេទប្រុស អាយុ ៤០ឆ្នាំនិងប្រពន្ធឈ្មោះ ខែម ចាន់ធា អាយុ៣៨ឆ្នាំ និងកូនស្រីឈ្មោះ ឈីន នីតា អាយុ១០ឆ្នាំ និងអ្នកជិតខាងឈ្មោះ ស្រី និច ភេទស្រី ដែលមកជួយក៏ត្រូវបានចរន្តភ្លើងឆក់ដែរ ។ ក្នុងហេតុការណ៏នោះ ត្រូវបានអ្នកជិតខាង រត់ទៅបិទឌីសង់ទ័រទាន់ពេលវេលា ហើយបញ្ជូនជនរងគ្រោះមកសង្គ្រោះនៅមន្ទីរពេទ្យខេត្ត ផុតពីគ្រោះថ្នាក់ដល់អាយុជីវិត ៕

ប្រភព ៖ កោះសន្តិភាព

កំណត់ហេតុខ្មែរឡូត៖

ទាក់ទងនឹងករណីនេះដែរ បុគ្គលិកក្រុមហ៊ុនអគ្គិសនីអានកូ ផ្នែកតភ្លើងម្នាក់ត្រូវចរន្តអគ្គិសនីឆក់ជាប់នៅលើបង្គោលភ្លើង បង្កការភ្ញាក់ផ្អើលទាំងព្រឹកកាលពីវេលាម៉ោងជាង១០ ថ្ងៃទី០៣ ខែមិថុនា ឆ្នាំ២០១៦ នៅភូមិបាលិលេយ្យ១ សង្កាត់និងក្រុងប៉ោយប៉ែត។ នៅកន្លែងកើតហេតុគេឃើញជនរងគ្រោះ សំយ៉ុងក្បាលចុះមកក្រោម តែមិនធ្លាក់ទេព្រោះមានខ្សែក្រវាត់ចង្កេះភ្ជាប់ទៅនឹង បង្គោលភ្លើងហើយអ្នកស្រុកនាំគ្នាឈរមើលព្រោងព្រាតរហូតអ្នកខ្លះ សង្ស័យថាជនរងគ្រោះទំនងជាឈានដល់ស្លាប់ទៀតផង។

យ៉ាងណាក៏ដោយក្រោយពី ក្រុមបុគ្គលិកតភ្លើងរួមអាជីពបិទភ្លើង ហើយនាំគ្នាឡើងទៅជួយស្រាប់តែជនរងគ្រោះដឹងខ្លួនឡើងវិញ ទើបរួចផុតជីវិត។ ជនរងគ្រោះខណៈចុះមកដល់ដីមិនផ្តល់អត្តសញ្ញាណទេ ដោយគ្រាន់និយាយយ៉ាងខ្លីថា ពេលឡើងតភ្លើងនោះជើងរបស់គាត់ប៉ះនឹងខ្សែភ្លើង ហើយដៃគាត់តោងចំម៉ាស់ទើបឆក់ចរន្ត យ៉ាងដូច្នេះ៕

ខ្មែរឡូត

មុន បន្ទាប់

មតិយោបល់