ម្ចាស់​បទ “Baby I’m Sorry” ​លោក សារុន កល្យាណ ហៅ Jimmy Kiss បាន​ត្រៀម​ខ្លួន​រួច​ជាស្រេច​ហើយ​ដើម្បី​ចូលរួម​កម្មវិធី “ស្ដាប់​ចម្រៀង​របស់​ខ្ញុំ”។ ទន្ទឹមគ្នា​នេះ ​លោក​ជំរុញ​ឲ្យ​មហាជន​ចូលរួម​ទាំង​អស់​គ្នា ដើម្បី​លើក​កម្ពស់​វិស័យ​សិល្បៈ​ព្រោះ​កម្មវិធី​ “ស្ដាប់​ចម្រៀង​របស់​ខ្ញុំ” គឺ​ជា​កម្មវិធី​​ប្រលង​ជ្រើសរើស​ការ​បង្កើត​ទំនុក​ភ្លេង និង ចម្រៀង​ថ្មី ដោយ​មិន​មាន​ការ​លួច​ចម្លង​ពី​ណា​នោះ​ទេ។

“ជា​មោទនភាព​ណាស់​សម្រាប់​ខ្ញុំ ​មាន​ឱកាស​បាន​ចូល​រួម​ច្រៀង​នៅ​ក្នុង​កម្មវិធី​ប្រកួត​ផ្ដាច់​ព្រ័ត្រ​ “ស្ដាប់​ចម្រៀង​របស់​ខ្ញុំ” ព្រោះ​កម្មវិធី​នេះ ​បាន​បំផុស​ឲ្យ​យុវវ័យ​ទាំង​អស់​​ចាប់​ផ្ដើម​បង្កើត​នូវ​អ្វី​ដែល​ថ្មី​ គឺ​ថ្មី​ទាំង​ទំនុក​ភ្លេង​ និង ច្រៀង”។ លោក Jimmy Kiss និយាយ​បន្ថែម។

ដើម្បី​លើក​ទឹក​ចិត្ត​នឹង​ជា​កម្លាំង​ចិត្ត​ដល់​កម្មវិធី “ស្ដាប់​ចម្រៀង​របស់​ខ្ញុំ” នោះ លោក Jimmy Kiss បាន​ទទូច​ឲ្យ​យុវវ័យ​ទាំង​អស់​ទៅ​ចូលរួម​កម្មវិធី​ប្រកួត​ផ្ដាច់​ព្រ័ត្រ​ “ស្ដាប់​ចម្រៀង​របស់​ខ្ញុំ” នៅ​មជ្ឈមណ្ឌល​កោះ​ពេជ្រ​អាគារ A  នា​ថ្ងៃ​ទី ២៧ ខែ​កក្កដា ឆ្នាំ ២០១៤។

លោក Jimmy Kiss វ័យ​ ២៨ ឆ្នាំ មាន​ស្រុក​កំណើត​ក្នុង​រាជធានី​ភ្នំពេញ និង មាន​ឈាម​ជ័រ​ជា​អ្នក​សិល្បៈ​មួយ​រួប​បាន​និយាយ​ថា ​បទ​ដែល​លោក​ច្រៀង​នៅ​ក្នុង​កម្មវិធី “ស្ដាប់​ចម្រៀង​របស់​ខ្ញុំ​” នៅ​វគ្គ​ប្រកួត​ផ្ដាច់​ព្រ័ត្រ​នេះ គឺ​បទ “Baby I’m Sorry” ដែល​​បទ​នេះ កំពុង​ទទួល​ការ​ពេញ​និយម​ក្នុង​ចំណោម​យុវវ័យ​ព្រោះ​បទ​នេះ​ជា​ការ​តែង​និពន្ធ​ទំនុក​ច្រៀង​ និង ទំនុក​ភ្លេង​ថ្មី ពី​ស្នាដៃ​កូនខ្មែរ។

លោក​ Jimmy ដែល​ជា​កូន​ប្រុស​បង្កើត​របស់​ លោក វ័រ សារុន ​អ្នក​ចម្រៀង​ជើង​ចាស់​ដែល​ល្បី​ល្បាញ​តាម​រយៈ​បទ ម៉ាក់ស៊ី និង​ បទ​ ញៀន​បារី​ បាន​និយាយ​បន្ត​ថា រហូត​មក​ទល់​នឹង​ពេល​នេះ ​លោក និពន្ធ​បទ​ចម្រៀង​ដែល​ជា​ស្នាដៃ​ថ្មី​ផ្ទាល់​ខ្លួន​​មិន​ចម្លង​ពី​គេ​បាន​ ជាង ២០ ​បទ ​រួច​មក​​ហើយ។ បទ​ចម្រៀង​ជា​ស្នាដៃ​និពន្ធ​ផ្ទាល់​ខ្លួន​កំពុង​ទាក់ទាញ​ការ​ចាប់​អារម្មណ៍​​ខ្លាំង​ក្នុង​ស្រទាប់​មិត្ត​យុវវ័យ​មាន​ដូច​ជា​ បទ Baby I’m Sorry និង ​​បទ​ កុំ​អាណិត​បង ជាដើម។

លោក Jimmy Kiss បាន​ប្រឡូក​ចូល​ក្នុង​ពិភព​សិល្បៈ​លើក​ដំបូង​ក្នុង​ឆ្នាំ ២០០៦-២០០៧ ប៉ុន្តែ ហាក់​មិន​បាន​ជោគជ័យ​លោក​បាន​ផ្អាក​ហើយ​បាន​ចាប់​អាជីព​ការងារ​ជា​អ្នក​ដឹកនាំ​ភ្ញៀវ​ទេសចរណ៍​ឲ្យ​ក្រុម​ហ៊ុន​មួយ។

នៅ​ដើម​ឆ្នាំ ២០១៤ នេះ​ លោក​បាន​សាកល្បង​ប្រឡូក​ក្នុង​វិស័យ​សិល្បៈ​ឡើង​វិញ​​ដោយ​បាន​ផលិត​ចម្រៀង​ដោយ​ខ្លួន​ឯង​​តាម​រយៈ​គម្រោង​ Songkites  ហើយ​ឃើញ​ថា មហាជន​មាន​ការ​គាំទ្រ​ច្រើន ម៉្លោះ​ហើយ​លោក​និយាយ​ថា៖ “ខ្ញុំ​នឹង​ចាប់​អាជីព​ជា​អ្នក​ចម្រៀង​ឲ្យ​ជាប់​ប្រសិន​បើ​មាន​ការ​គាំទ្រ​ច្រើន​បែប​នេះ ខ្ញុំ​នឹង​ទៅ​រៀន​បន្ត​ទាក់ទង​នឹង​សិល្បៈ​ ដើម្បី​ឲ្យ​មាន​អាជីព​មួយ​រឹងមាំ​សម្រាប់​ថ្ងៃ​អនាគត”។

ក្នុង​ទិសដៅ​លើក​កម្ពស់​វិស័យ​សិល្បៈ​ លោក Jimmy បាន​លើក​ឡើង​ថា ការ​ចូលរួម​គ្រប់​សកម្មភាព​សិល្បៈ​គឺជា​រឿង​ចម្បង​នៅ​ក្នុង​ការ​គាំទ្រ និង លើក​ស្ទួយ​វិស័យ​សិល្បៈ។ ដូច្នេះ​កម្មវិធី​ស្ដាប់​ចម្រៀង​របស់​ខ្ញុំ​ គឺ​ជា​ផ្នែក​មួយ​នៃ​កម្មវិធី​រើស​អ្នក​ដែល​មាន​សមត្ថភាព​ពិត​ប្រាកដ​នៅ​លើ​ការ​តែង​និពន្ធ និង ទំនុក​ភ្លេង​ថ្មី ម៉្លោះហើយ យុវវ័យ​គួរតែ​ចូលរួម​កម្មវិធី​នេះ​ទាំង​អស់​គ្នា​ដើម្បី​ចូលរួម​និង​លើក​ស្ទួយ​វិស័យ​សិល្បៈ​ខ្មែរ​ឲ្យ​មាន​មុខ​ទាំង​ក្នុង​ស្រុក និង នៅ​លើ​ឆាក​អន្តរជាតិ៕

ប្រភព: sabay