ចង់ផ្តាច់បារី ត្រូវធ្វើដូចម្តេច?

ចង់ផ្តាច់បារី ត្រូវធ្វើដូចម្តេច?

ការញៀនបារី គឺជាការញៀនទៅនឹងផលិតផលថ្នាំជក់ ដែលបណ្តាលមកពីជាតិនីកូទីននៅក្នុងបារីនោះ។ ការញៀនជាតិនីកូទីន មានន័យថា អ្នកមិន អាចបញ្ឈប់ការប្រើប្រាស់សារធាតុនេះបាន បើទោះបីជាវាអាចបណ្តាលអោយមានគ្រោះថ្នាក់ដល់សុខភាពក៏ដោយ។ ជាតិនីកូទីន ធ្វើអោយប៉ះពាល់ដល់រាងកាយ និងអារម្មណ៍ស្មារតី ប៉ុន្តែ ពេលខ្លះ វាអាចធ្វើអោយអ្នកជក់សប្បាយរីករាយ។ នៅពេលជាមួយគ្នានេះដែរ ការឈប់ជក់បារី អាចបណ្តាលអោយមានរោគសញ្ញាដូចជា ឆាប់ខឹង តប់ប្រមល់ និងថប់បារម្មជាដើម។

ដើម្បីឈប់ជក់បារីក្នុងរយៈពេលយូរបាន សូមពិចារណាអំពីគន្លឹះទាំងនេះ ៖
•    ការជម្រុញចិត្តខ្លួនឯង ៖ សម្រេចចិត្តថាឈប់ ហើយកំណត់កាលបរិច្ឆេទ និងបង្កើតផែនការ ដើម្បីបញ្ឈប់។ ចាប់ផ្តើមដោយការគិតអំពីអារម្មណ៍ផ្សេងគ្នាដែលអ្នកអាចនឹងទទួលបានពីការជក់បារី។ បន្ទាប់មក ធ្វើបញ្ជីនៃមូលហេតុ ដែលអ្នកត្រូវតែឈប់ជក់បារី។
•    កុំបាក់ទឹកចិត្ត ប្រសិនបើអ្នកមិនអាចធ្វើបាន ៖ ចូរចាំថា វាជារឿងធម្មតា ដែលពេលខ្លះអ្នកមិនអាចឈប់ជក់បាន។ ប៉ុន្តែ គោលបំណងរបស់អ្នកគឺ ឈប់ជក់បារីតែម្តង សូម្បីតែការជក់បារីបន្តិច ឬម្តងម្កាលក៏អាចមានគ្រោះថ្នាក់។ អ្នកអាចរៀនពីបទពិសោធកន្លងមក អំពីអ្វីដែលនាំអោយអ្នកជក់ឡើងវិញ ហើយព្យាយាមដោះស្រាយវា។
•    កំណត់មូលហេតុ ដែលបង្កអោយអ្នកជក់បារីឡើងវិញ ៖ នេះនឹងជួយអ្នកក្នុងការដោះស្រាយបញ្ហា និងមានផែនការក្នុងការដោះស្រាយ ជាមួយនឹងស្ថានភាពដែលមានហានិភ័យខ្ពស់។
•    ស្វែងរកការគាំទ្រ ៖ ការគាំទ្រផ្នែកសង្គម គឺជាគន្លឹះមួយក្នុងការសម្រេចបាននូវការឈប់ជក់បារីរហូត។ សំណូមពរអោយក្រុមគ្រួសារ មិត្តភក្តិ និងសហការីគាំទ្រ និងការលើកទឹកចិត្តដល់រូបអ្នក៕
ប្រភព៖ Health.com.kh

មុន បន្ទាប់

មតិយោបល់