ធ្វើការជាមួយមនុស្សខ្ជិលគួរប្រើវិធីសាស្ត្រដូចម្តេចខ្លះ?

ធ្វើការជាមួយមនុស្សខ្ជិលគួរប្រើវិធីសាស្ត្រដូចម្តេចខ្លះ?

តើអ្នកពិតជាធ្វើការជាមួយមនុស្សដែលមិនខំប្រឹងប្រែងធ្វើការទាំងចិត្តទាំងថ្លើមមែនដែរទេ? ប្រហែលជាគេចំនាយពេលឥតប្រយោជន៍ច្រើនក្នុងមួយថ្ងៃៗក្នុងការលេងហ្គេមកម្សាន្ត ឬនិយាយទូរស័ព្ទជាមួយមិត្តភក្តិ។ ឬប្រហែលជាប្រើការសម្រាកពីការងារច្រើន ព្រមទាំងសប្បាយចិត្តនឹងការងារដែលមានម៉ោងកាន់តែតិចបំផុតហើយមើលទៅ។

បើសិនជាអ្នកធ្វើការជាមួយមនុស្សធននេះ អ្នកទំនងជាមានភាពស៊ាំចិត្តខ្លាំងណាស់ហើយ។ ការធ្វើការជាមួយមនុស្សម្នាក់ដែលខ្ជិលតែងតែជាមនុស្សម្នាក់ត្រូវប្រកួតប្រជែង ប៉ុន្តែវាក៏ធ្វើអោយថយចុះផលិតផលដែលអាចធ្វើបាន និងការលើកទឹកចិត្តដល់មនុស្សផ្សេងៗទៀតក្នុងការិយាល័យ។

ទោះបីជាយ៉ាងណាក៏ដោយ បើសិនជាអ្នកមិនមែនចៅហ្វាយនាយម្នាក់នោះទេ តើមានអ្វីខ្លះដែលអ្នកអាចធ្វើបានទៅ? តើអ្នកគួរតែអត់ទ្រាំនឹងមនុស្សខូចបែបនេះដែរទេ ឬអ្នកគួរតែប្រឈមមុខនឹងស្ថានភាពបែបនេះ?

ជម្រើសរបស់អ្នក

បើសិនជាអ្នកធ្វើការជាមួយមនុស្សខ្ជិលម្នាក់ អ្នកប្រហែលជានឹងមានជម្រើសជាច្រើន។ ជម្រើសដំបូងរបស់អ្នកគឺមិនខ្វល់នឹងស្ថានភាពរបស់គេ ហើយគិតតែរឿងខ្លួនឯងទៅបានហើយ។ បើសិនជាមនុស្សខ្ជិលនោះមិនបង្កបញ្ហាដល់អ្នកទេ វាប្រហែលជាជម្រើសដ៏ល្អ។

ចូរប្រាកដថា វាគឺជារឿងដែលរំខាននិងមិនយុត្តិធម៌សោះដែលគេកំពុងតែធ្វើការងារដែលបង្កនូវភាពស៊ាំចិត្តប៉ុណ្ណោះ។ ប៉ុន្តែ ជាយថាហេតុ សកម្មភាពមិនត្រឹមត្រូវរបស់គេនឹងប្រាប់អោយគេដឹងដោយខ្លួនឯង។ មានន័យថា អ្នកគ្រាន់តែផ្តោតសំខាន់ចំពោះការងាររបស់អ្នកដើម្បីធ្វើការអោយបានល្អទៅ ហើយ ចូរប្រាកដថា អ្នកបានទទួលស្គាល់នូវអ្វីដែលអ្នកសាកសមនឹងទទួលបាន។

ទោះបីជាយ៉ាងណាក៏ដោយ បើសិនជាមនុស្សខ្ជិលនោះកំពុងតែមានឥទ្ធិពលអវិជ្ជមានចំពោះការងាររបស់អ្នក ឬសមាជិកក្រុមរបស់អ្នក អ្នកគួរតែធ្វើ្វអ្វីមួយហើយ។ ដូច្នេះ ជម្រើសមួយផ្សេងទៀតគឺទទួលយកការងារដែលមនុស្សខ្ជិលនោះមិនធ្វើ។ ការធ្វើបែបនេះនឹងមានប្រយោជន៍កាន់តែប្រសើរចំពោះការងារដែលធ្វេសប្រហែស ប៉ុន្តែវាគ្រាន់តែបន្ថែមស្ត្រេស និងភាពស៊ាំចិត្តដល់អ្នកប៉ុណ្ណោះ ព្រោះអ្នកត្រូវធ្វើអោយការងារនោះកាន់តែល្អបន្ថែមទៀត។

ការបណ្តោយអោយមនុស្សខ្ចិលនោះបន្តទម្លាប់ការងារអាក្រក់របស់គេបន្តទៀតក៏អាចផ្តល់នូវឥទ្ធិពលអវិជ្ជមានចំពោះកេរ្តិ៍ឈ្មោះអ្នក ឬក្រុមរបស់អ្នក។ ជម្រើសចុងក្រោយ ហើយក៏ជាជម្រើសដ៏ល្អបំផុត នោះគឺ ផ្តល់នូវទំនុកចិត្តលើខ្លួនឯងដើម្បីបញ្ចេញសកម្មភាពដោយផ្ទាល់ទៅលើមនុស្សដែលខ្ជិលច្រអូសមួយនោះតែម្តង។

និយាយគ្នាដោយបើកចំហ

ចូរចាប់ផ្តើមជួបនិយាយគ្នាជាមួយមនុស្សខ្ជិលនោះតែពីរនាក់។ ដំបូងឡើយ ចូរពន្យល់អំពីសកម្មភាពភាពរបស់គេដែលកំពុងតែមានឥទ្ធិពលចំពោះអ្នក និងសមាជិកក្រុមរបស់អ្នកផ្សេងៗទៀត។ ចូរលើកឡើងនូវថ្ងៃខែ ឬស្ថានភាពណាមួយជាក់លាក់ដែលអ្នកអាចនិយាយបកស្រាយអោយគេដឹងថាវាគឺបែបនោះមែន។

ឧទាហរណ៍ បើសិនជាគេដឹងថាវាជាការរៀបចំបទបង្ហាញមួយសម្រាប់ការប្រជុំអាទិត្យមុន និងធ្វើមិនទាន់ ចូរប្រាប់អោយគេដឹងថាអ្នកបានចំនាយពេលយ៉ាងយូរដើម្បីបំពេញការងារនោះជំនួសវិញ។ ការដែលធ្វើអោយគេដឹងអំពីសកម្មភាពខ្វះមុខខ្វះក្រោយបែបនេះនឹងជះឥទ្ធិពលដល់គេបាន។

រឿងនេះអាចមាននូវការសន្ទនាដ៏ពិបាកមួយ ប៉ុន្តែចូរសម្តែងនូវការគោរពអោយបានពេញលេញ និងមានសុជីវធម៌ ព្រមទាំងព្យាយាមចៀសអោយបាននូវអារម្មណ៍ឆេវឆាវ ឬខឹងសម្បារ។

បើសិនជាអ្នកភ័យ ឬមិនប្រាកដនូវអ្វីដែលអ្នកនឹងត្រូវនិយាយនោះ ចូរសាកល្បងនិយាយសមជាមុនសិន។ អ្នកក៏ប្រហែលជាចង់រំលឹកឡើងវិញនូវជំនាញទំនាក់ទំនងរបស់អ្នកដើម្បីអោយប្រាកដថា អ្នកអាចមានទំនុកចិត្តលើខ្លួនឯង។

បើសិនជាមនុស្សខ្ជិលម្នាក់នោះឧស្សាហ៍បោះបង់ចោលការទំនួលខុសត្រូវរបស់គេមកអោយអ្នកវិញ វាក៏គួរតែដល់ពេលបញ្ឈប់សកម្មភាពបែបនេះហើយ។ ចូរអោយគេដឹងអោយច្បាស់លាស់ថា អ្នកនឹងមិនអាចធ្វើរឿងនេះសម្រាប់គេទៀតឡើយ។ ចូរសង្កត់ធ្ងន់ថា បើសិនជាអាកប្បកិរិយារបស់គេមិនផ្លាស់ប្តូរទេ អ្នកនឹងគ្មានជម្រើសអ្វីក្រៅពីប្រាប់ប្រធានគ្រប់គ្រងរបស់អ្នកឡើយ។

មនុស្សខ្ជិលម្នាក់នោះប្រហែលជាមិនឆ្លើយតបនូវគំនិតវិជ្ជមានចំពោះការសន្ទនានេះទេ។ ដូច្នេះចូរត្រៀមលក្ខណៈទុកជាមួយអោយហើយទៅ អ្នកប្រហែលជាចង់សិក្សាពីរបៀបដោះស្រាយជាមួយនឹងម្នាក់ដែលពិបាកនិយាយគ្នាក្នុងគេហទំព័រយើងបន្ថែមទៀតហើយ។ បើសិនជាអ្វីៗទៅជាការក្តៅក្រហាយហើយ ចូរបញ្ចប់ការសន្ទនាមួយនេះ ហើយដើរចេញ ព្រោះការបង្កជម្លោះគ្មានអ្វីជាផលចំនេញនោះទេ។

ការស្តាប់យ៉ាងសកម្ម

អ្នកប្រហែលជាគិតថាអ្នកធ្វើការជាមួយអ្នកជាមនុស្សខ្ជិលធម្មតាៗ ឬគ្រាន់តែមិនសូវខ្វល់តែប៉ុណ្ណោះ។ ប៉ុន្តែប្រហែលជាមានហេតុផលមួយផ្សេងទៀតដែលគេមិនព្រមធ្វើការ។ ប្រហែលជាគេមិនស្ថិតនៅក្នុងតួនាទីត្រឹមត្រូវ និងមានអារម្មណ៍រំភើបខ្លាំងចំពោះការងារនោះ។ គេប្រហែលជាមិនដឹងនូវគោលដៅប្រាកដណាមួយដែលគេត្រូវទទួលខុសត្រូវ ឬប្រហែលជាមមិនមានជំនាញក្នុងការធ្វើវាអោយការងារនោះមានប្រសិទ្ធភាព។ ឬ គេអាចដោះស្រាយជាមួយនឹងបញ្ហាស្ត្រេសជាច្រើនដូចជា ជំងឺក្នុងគ្រួសារ ឬបុគ្គល, ការលែងលះ ឬបញ្ហាជាមួយកូនៗជាដើម។

ចូរស្នើរអោយគេពន្យល់នូវរឿងរ៉ាវទាំងឡាយ ហើយចូរស្តាប់នូវអ្វីដែលគេនិយាយយ៉ាងប្រុងប្រយ័ត្ន។ អ្នកប្រហែលជាមានការភ្ញាក់ផ្អើលនៅពេលដឹងថា មានអ្វីជាច្រើនផ្សេងៗទៀតដែលអ្នកមិនអាចមើលនឹងភ្នែកឃើញ។ ពេលខ្លះគ្រាន់តែមានបំណងចង់ស្តាប់គេនិយាយអាចធ្វើអោយអ្វីៗផ្លាស់ប្តូរយ៉ាងធំធែងបាន។

រាយការណ៍ប្រាប់ចៅហ្វាយនាយ

បើសិនជាការខិតខំដ៏ល្អបំផុតរបស់អ្នកគ្មានប្រយោជន៍, មនុស្សខ្ជិលម្នាក់នោះនៅតែដដែល ហើយបើសិនជាភាពខ្ជិលរបស់គេនៅតែបង្កបញ្ជាសម្រាប់អ្នក ឬក្រុមការងារបស់អ្នក វាប្រហែលជាដល់ពេលនិយាយរឿងនេះប្រាប់ដល់ថ្នាក់លើហើយ។

មុនពេលអ្នកធ្វើបែបនេះ ចូររំលឹកដល់មនុស្សខ្ជិលម្នាក់នោះម្តងទៀតថា អ្នកគ្មានជម្រើសអ្វីក្រៅពីប្តឹងថ្នាក់លើទេបើសិនជាឥរិយាបថរបស់គេនៅតែមិនព្រមផ្លាស់ប្តូរ។

នៅពេលនេះ ចូរបង្កើតកំណត់ត្រាមួយអោយបានច្បាស់លាស់នូវអ្វីដែលមនុស្សខ្ជិលនោះបានធ្វើ ឬមិនបានធ្វើ។ បើសិនជាគេចំណាយពេលរហូតដល់ ពីរម៉ោង និងមិនព្រមចំនាយពេលធ្វើការ ចូរសរសេរវាចូលទៅ។ បើសិនជាគេកំពុងតែទូរស័ព្ទនិយាយរឿងផ្ទាល់ខ្លួន ឬបើកអ៊ីនធើណែត ចូរសរសេរពេលវេលា និងព័ត៌មានដែលពាក់ព័ន្ធ។

អ្នកប្រហែលជាចង់ធ្វើរឿងនេះរយៈពេលពីរបីសប្តាហ៍ដើម្បីទទួលបានភស្តុតាងគ្រប់គ្រាន និងដើម្បីផ្តល់ឱកាសដល់គេអាចកែប្រែកំហុសបានវិញ។

បើសិនជានៅតែគ្មានអ្វីកែប្រែទៀតទេ ចូររៀបចំជួបគ្នានឹងប្រធានអ្នកវិញទៅ។ ចូរពន្យល់អំពីស្ថានភាពអោយបានច្បាស់លាស់ និងដោយស្មោះត្រង់ ព្រមទាំងបញ្ជាក់អោយច្បាស់រាល់គម្រោងទាំងឡាយដែលអ្នកបានធ្វើចំពោះមនុស្សខ្ជិលនោះអោយផ្លាស់ប្តូរ។ ជាថ្មីម្តងទៀត ចូររក្សាអារម្មណ៍ស្ងប់ស្ងាត និងចៀសអោយផុតពីការឆេវឆាវក្នុងពេលនិយាយគ្នា៕

ប្រភព៖ Health.com.kh

មុន បន្ទាប់

មតិយោបល់