“អាប៉ូយកូនឪ” ជាសាច់រឿងពិតប្អូនរបស់ នាយ ពែកមី?

“អាប៉ូយកូនឪ” ជាសាច់រឿងពិតប្អូនរបស់ នាយ ពែកមី?

ម្ចាស់បទ “អាប៉ូយកូនឪ” នាយ ពែកមី តារាកំប្លែងល្បីល្បាញក្នុងប្រទេសកម្ពុជាបានសារភាពប្រាប់ Sabay ថា ឈ្មោះអាប៉ូយគឺជាប្អូនប្រុសបង្កើតរបស់នាយ ប៉ុន្ដែ សាច់រឿងពិតតាមរយៈបទចម្រៀងនេះគឺមិនមែនជារឿងពិតរបស់អាប៉ូយនោះទេគ្រាន់តែយកឈ្មោះប៉ូយមកតំណាងប៉ុណ្ណោះ។

Apoy-1

រូបខាងឆ្វេង អាប៉ូយ និង នាយ ពែកមី

នាយពែកមី ដែលជាកូនច្បង ក្នុងចំណោមបងប្អូន ៧ នាក់ ក្នុងនោះ ប្រុស ៥ ស្រី ២ គឺ អាប៉ូយវ័យ ២៧ ឆ្នាំ ជាកូនទី ៤ ក្នុងគ្រួសារ មកពីខេត្តស្វាយរៀង។ “បងមើលរូបអាប៉ូយនៅក្នុង MV ឃើញហើយ អាហ្នឹងមុខវាខុសពីបងប្អូន ហើយឈ្មោះ និង ទឹកមុខវាមើលទៅចង់សើចហ្មង!”។ នេះជាពាក្យពេចន៍ចេញពីមាត់នាយពែកមី។

នាយ ពែកមី បាននិយាយថា ដោយសារឈ្មោះ និង ទឹកមុខគួរឲ្យចង់សើចបែបនេះហើយ ទើបអ្នកនិពន្ធយកឈ្មោះនេះមកតំណាងឲ្យបទចម្រៀងដើម្បីសរសេរចេញជាសាច់រឿងមួយដើម្បីចូលរួមផ្ដល់សារអប់រំពីមនុស្សម្នាក់មិនចេះធ្វើអីសោះ ហើយគិតតែពីលេង និង ចង់បានប្រពន្ធ។

“អ្នកនិពន្ធគេសរសេរពីចំណុចអវិជ្ជមានរំលេចចេញមក តែក្នុងន័យអប់រំ ពោលគឺ អ្នកនិពន្ធគេចេះបង្កប់អក្សរសិល្បិ៍ដើម្បីផ្ញើសារថា ធ្វើដូចអាប៉ូយមិនល្អនោះទេ”។ នាយ ពែក មី បញ្ជាក់បន្ថែម។

ទោះបីជាយ៉ាងណាក៏ដោយ នាយ ពែកមី បាននិយាយពីអត្តចរឹត អាប៉ូយ ដែលជាប្អូនបង្កើតខ្លួនឯងថា អាប៉ូយជាមនុស្សមិនសូវចេះនិយាយ ហើយក៏គ្មានទេពកោសល្យខាងសិល្បៈនោះទេ។ នាយ ពែកមី បានបញ្ជាក់ថា ចេះតែចង់ឲ្យប្អូនចូលសិល្បៈដែរ ប៉ុន្ដែបើគ្មានទេពកោសល្យនោះទេ គឺមិនអាចចូលបានដែរ ដែលផ្ទុយពី នាយគ្រឿន និង នាយក្រាន់ ដែលប្អូនប្រុសទាំងពីរនាក់នេះ មានទេពកោសល្យសិល្បៈពីកំណើតស្រាប់ ដូច្នេះ ងាយនៅក្នុងការបណ្ដុះបណ្ដាល។

Apoy

អាប៉ូយ ឈុតមួយសម្ដែងក្នុង MV (រូបថតYouTube)

នាយ ពែក មី ដែលផ្ដើមចេញពីកម្មករសំណង់ កម្មកររោងចក្រ និង កងទ័ពស្ម័គ្រចិត្ត នៅមុនចូលសិល្បៈ បានក្លាយទៅជាតារាកំប្លែងដ៏ល្បីល្បាញមួយរូបក្នុងព្រះរាជាណាចក្រកម្ពុជា ក្នុងរយៈពេលដ៏ខ្លី ឥឡូវនេះ នាយ ពែកមី បានក្ដាប់ឱកាសជាតារាចម្រៀងបន្ទាប់ពីបានចូលផលិតកម្ម Town កាលពីឆ្នាំ ២០១២។

នាឱកាសបុណ្យចូលឆ្នាំខ្មែរកាលពីឆ្នាំមុន នាយពែកមី បានដណ្ដើមទីផ្សារកប់ពពក ដោយស្ទើរគ្រប់ទីកន្លែងគេលាន់ឮបទ “ឲ្យប្រពន្ធស៊ីសៀង ឲ្យម្នាងស៊ីស៊ុប”។ បទចម្រៀងសម្រាប់អបអរចូលឆ្នាំខ្មែរ ឆ្នាំ ២០១៤ នេះវិញ នាយពែកមី នៅតែដណ្ដើមបានទីផ្សារខ្លាំង តាមរយៈបទ “ខ្ញុំចឹង” និង “អាប៉ូយកូនឪ”។

ដោយសារតែមានការគាំទ្រច្រើនបែបនេះ នាយពែកមី បានប្រាប់គេហទំព័រ Sabay ថា នាយនឹងចាប់អាជីពជាតារាចម្រៀងនេះឲ្យជាប់ ដើម្បីបន្ថែមលើអាជីពចាស់ជាតារាកំប្លែង។ “បើយើងចេះច្រើនយើងសម្បូរទីផ្សារ ច្រៀងក៏បាន លេងកំប្លែងក៏បាន តែខ្ញុំនឹងព្យាយាមរកអ្វីដែលថ្មីដើម្បីបម្រើអារម្មណ៍របស់ប្រិយមិត្តជានិច្ច”៕

ប្រភព Sabay

មុន បន្ទាប់

មតិយោបល់