ចេញពីក្លិបដើរ ចុចទូរស័ព្ទ ទាំងកណ្តាលអធ្រាត្រ ត្រូវក្រុមចោរកាប់ របួសធ្ងន់ប្លន់ យកទូរស័ព្ទដៃ អាយហ្វូន

ចេញពីក្លិបដើរ ចុចទូរស័ព្ទ ទាំងកណ្តាលអធ្រាត្រ ត្រូវក្រុមចោរកាប់ របួសធ្ងន់ប្លន់ យកទូរស័ព្ទដៃ អាយហ្វូន

រាជធានីភ្នំពេញ ៖ នារីម្នាក់អន់ចិត្តនិង មិត្តភក្តិចេញពីក្នុង ក្លិបប៊សមកខាងក្រៅ និងដើរតាមផ្លូវ ត្រូវក្រុមចោរមួយក្រុមមានគ្នា៥នាក់ ជិះម៉ូតូ២គ្រឿងស្ទាក់ប្លន់ យកទូរស័ព្ទដៃអាយហ្វូន៥ តែនារីរងគ្រោះ មិនព្រមឱ្យក៏ត្រូវក្រុមចោរវាយ និងកាប់បណ្ដាលឱ្យរងរបួសធ្ងន់ ហើយក្រុមចោរប្លន់យក ទូរស័ព្ទគេចខ្លួនដោយសុវត្តិភាព។

ហេតុការណ៍នេះ បានកើតឡើងកាលពីវេលា ម៉ោង២រំលងអាធ្រាត្រឈាន ចូលថ្ងៃទី២៦ ខែមិថុនា ឆ្នាំ២០១៥ ត្រង់ចំណុចស្ដុបផ្លូវ ២០០៤ កែងផ្លូវណតប្រ៊ីត ស្ថិតក្នុងសង្កាត់ទឹកថ្លា ខណ្ឌសែនសុខ ។

នារីរងគ្រោះដែល រងរបួសធ្ងន់កំពុងធ្វើការ សង្គ្រោះបន្ទាន់ ត្រូវបានមិត្តភក្តិប្រាប់ឱ្យដឹងថាឈ្មោះ ម៉ាប់ អាយុប្រមាណ ២០ឆ្នាំ ស្នាក់នៅម្ដុំផ្លូវ២០០៤ សង្កាត់ទឹកថ្លា ខណ្ឌសែនសុខ ។

បើតាមសម្ដីរបស់មិត្តភក្តិ នារីរងគ្រោះដែលបាន នាំនាងមកមន្ទីរពេទ្យដើម្បី ធ្វើការសង្គ្រោះបន្ទាន់ បានឱ្យដឹងថា នៅមុនពេលកើតហេតុ គ្នារបស់គេប្រមាណ៤-៥នាក់ បាននាំគ្នាចូលទៅរាំលេង កម្សាន្តនៅក្នុងក្លិបប៊ស លុះដល់យប់ជ្រៅបន្តិចក៏ មានការទាស់សម្ដីគ្នាបន្តិចបន្តួច ធ្វើឱ្យនារីរងគ្រោះអន់ចិត្ត ក៏បានចេញមកក្រៅក្លិបមុន ហើយដើរតាមបណ្ដោយ ផ្លូវណតប្រ៊ីតឆ្ពោះទៅផ្លូវ២០០៤ ដោយដើរបណ្ដើរចុចទូរស័ព្ទ អាយហ្វូន៥បណ្ដើរ ស្រាប់តែលេចមុខក្រុមចោរមួយក្រុម មានគ្នា៥នាក់ជិះម៉ូតូស៊េរីទំនើប ២គ្រឿងបានជិះមក ក្បែរនារីរងគ្រោះ ហើយស្ទាក់បំរុងប្លន់យកទូរស័ព្ទ តែនារីរងគ្រោះមិនព្រម ប្រគល់ទូរស័ព្ទឱ្យក៏ត្រូវក្រុមចោរវាយ និងកាប់បណ្ដាលឱ្យ រងរបួសធ្ងន់ដេកដួលក្នុងថ្លុកឈាមក្បែរចញ្ចើមផ្លូវ ហើយក្រុមចោរក៏បានជិះម៉ូតូគេចខ្លួន បាត់ដោយសុវត្តិភាព ។

បន្ទាប់ពីកើតហេតុ អ្នកធ្វើដំណើរតាមផ្លូវ ក៏បានឈប់មើលនារីរងគ្រោះ ហើយមិត្តភក្តិរបស់នាង ក៏បានចេញក្រៅតាមរក ក៏ឃើញគេចោមរោមមើល ហើយក៏ដើរទៅមើលឃើញ នារីរងគ្រោះដេកក្នុងថ្លុក ឈាមរងរបួសធ្ងន់ ក៏ប្រញ៉ាប់ប្រញាល់ ដឹកតាមម៉ូតូរ៉ឺម៉កកង់៣បញ្ជូន មកមន្ទីរពេទ្យព្រះកុសុមៈ (លោកសង្ឃ) ដើម្បីធ្វើការសង្គ្រោះបន្ទាន់ ៕