តារាចម្រៀង ជុន សុធី ក្លាយជាអ្នកដឹកនាំអ្នកសិល្បៈទៅសម្តែងនៅបរទេស

តារាចម្រៀង ជុន សុធី ក្លាយជាអ្នកដឹកនាំអ្នកសិល្បៈទៅសម្តែងនៅបរទេស

រាជធានីភ្នំពេញ ៖ លោកជុន សុធី ជាតារាចម្រៀងតែងតែមានឱកាសចូលរួមក្នុងកម្មវិធីប្រគំតន្ត្រីរបស់ទូរទស្សន៍ជាញឹកញាប់ ព្រមទាំងមានឱកាសទៅសម្តែងនៅក្រៅប្រទេសជា រឿយៗ ។ ជោគជ័យលើអាជីពសិល្បៈ តែលោកសុធី មិនជោគជ័យលើជីវិតស្នេហាទេ ។ ចូលវ័យកណ្តាល លោកសុធី ជំពប់រឿងស្នេហាបែកបាក់ ចំបែងចិត្តដល់ទៅ២លើក ។ មេរៀនព្រាត់ស្នេហ៍ដល់ទៅ២លើកនោះ នៅមិនទាន់ធ្វើឱ្យលោកសុធី រាងចាលឡើយ ដោយលោកនៅតែមានជំនឿចិត្តថា ថ្ងៃណាមួយនឹងរកបានគូគាប់លុះអវសានជីវិតមិនខាន។

លោកជុន សុធី ជាតារាចម្រៀងមួយដួងដែលអ្នកក្នុងសង្គមសិល្បៈជាច្រើនស្រឡាញ់រាប់អាន មិនថាតារាថ្មី ឬតារាចាស់ទេ ។ ក្រៅពីជាតារាចម្រៀងជាយូរឆ្នាំមកហើយនោះ លោកក៏ជាអ្នករៀបចំឱ្យអ្នកសិល្បៈមានឱកាសចេញទៅសម្តែងនៅក្រៅប្រទេសផងដែរ ពិសេសឱកាសទៅសម្តែងនៅដែនកោះអូស្ត្រាលី ។ មួយរយៈចុងក្រោយនេះ មិនសូវឃើញបង្ហាញមុខតាមកញ្ចក់ទូរទស្សន៍ដោយសារតែលោកសុធី រវល់ចាត់ចែងកម្មវិធីដឹកនាំតារាទៅសម្តែងនៅប្រទេសអូស្ត្រាលីជាច្រើនខែមកហើយ ។ លោកសុធី មិនប្រកាន់ថាតារាល្បីមានឈ្មោះលំដាប់ប្រទេស ឬតារាថ្មីទេ គឺលោកតែងតែផ្តល់ឱកាសបានទៅច្រៀងរកប្រាក់កម្រៃនៅបរទេស សំខាន់ឱ្យតែអ្នកមានទេពកោសល្យ និងច្រៀងពីរោះ គឺលោកនឹងផ្តល់ឱកាស ។

បើតាមប្រភពអ្នកសិល្បៈនៅកៀកកិតតារាចម្រៀងប្រុសរូបនេះ ឱ្យដឹងថា លោកសុធី ហាក់មិនសូវមានសំណាងល្អក្នុងរឿងស្នេហាទេ ។ កាលពីជួបស្នេហាលើកទី១ ជាមួយនារីនៅប្រទេសអូស្ត្រាលី លោកសុធី បានភ្ជាប់ពាក្យ និងរង់ចាំតែថ្ងៃរៀបការ តែមិនដឹងជាយ៉ាងម៉េច បែរទៅជាជូរចត់ ឈានដល់បែកបាក់ផ្តាច់ពាក្យគ្នាទៅវិញ ។ ក្រោយមកតារាចម្រៀងរូបនេះជំពប់ស្នេហ៍ជាមួយនារីម្នាក់នៅក្នុងស្រុក ជាអ្នករៀបចំពីរបៀបបដិសណ្ឋារកិច្ចភ្ញៀវនៅសណ្ឋាគារ ដោយបានរៀបការនាអំឡុងខែមិថុនា ឆ្នាំ២០១៣ ។ ជីវិតអាពាហ៍ពិពាហ៍នេះបានបែកបាក់លែងលះគ្នាវិញដោយស្របច្បាប់ បន្ទាប់ពីរស់នៅជុំគ្នាបាន១១ខែ ។

លោកជុន សុធី ពេលបង្ហាញមុខនៅក្នុងកម្មវិធីសម្តែងអបអរបុណ្យចូលឆ្នាំថ្មីឱ្យទូរទស្សន៍សុីធីអិន កាលពីថ្ងៃទី៥ មីនា ឆ្នាំ២០១៤ ធ្វើឱ្យអ្នកសិល្បៈភ្ញាក់ផ្អើលសួរនាំចង់ដឹងពីសុខទុក្ខរបស់លោក ។ ចំណែកអ្នកសារព័ត៌មានបាននាំគ្នាទៅសួរនាំ និងចង់ដឹងពីរឿងរ៉ាវកន្លងមក ពិសេសចង់ឱ្យលោកបកស្រាយរឿងស្នេហាដែលមិនសមប្រកបម្តងហើយម្តងទៀតនោះ។ លោកជុន សុធី បានបកស្រាយប្រាប់អ្នកសារព័ត៌មានកោះសន្តិភាពថា លោកដឹកនាំតារាថ្មីចាស់ទៅសម្តែងនៅក្រៅប្រទេសតាំងពីឆ្នាំ២០០៥មក ព្រោះស្គាល់អ្នកនៅទីនោះទុកចិត្តឱ្យលោកធ្វើការងារនេះ ។ ការងាររបស់លោកតែងតែជោគជ័យមិនមានបញ្ហាទេ ទើបគេផ្តល់ឱកាសឱ្យលោកដឹកនាំតារាពីស្រុកខ្មែរទៅសម្តែងនៅបរទេស ។ ក្នុងឆ្នាំនេះលោកបាននាំតារាចម្រៀង តារាសម្តែងទៅសម្តែងដូចជានាងលីលី អ្នកនាងសំ ប៉ូលីដា នាយក្រិន ព្រមទាំងតារាថ្មីមួយដួងទៀត ។ ជាទូទៅលោកនាំយកតារាថ្មីទៅសម្តែងដើម្បីឱ្យមានឱកាសបញ្ចេញទេពកោសល្យ និងរកប្រាក់កម្រៃ។

លោកបាត់មុខពីពិភពសិល្បៈមួយរយៈកន្លងមក ដោយសារជាប់រវល់ទៅប្រទេសអូស្ត្រាលី ទើបតែត្រឡប់មកវិញកាលពីពេល ថ្មីៗនេះ ។ លោកមិនដាច់ចិត្តបោះបង់ចោលអាជីពសិល្បៈឡើយ ។ ចំពោះរឿងស្នេហាលោកសុធី ដែលក្រៅពីអាជីពសិល្បៈ ក៏ជាយោធានៅបញ្ជាការដ្ឋានកងទ័ពជើងគោកផងនោះ ឱ្យដឹងថា ទោះបីលោកបែកបាក់ស្នេហាពីរលើកមកហើយក្តី ប៉ុន្តែលោកនៅតែរំពឹងថា នឹងស្វែងរកបាននារីល្អម្នាក់ធ្វើជាគូអនាគត ៕ By: Koh Santipheap Daily