មណ្ឌលគិរី៖ ជនសង្ស័យ រំលោភក្មេងស្រីអាយុ១២ឆ្នាំ ជនជាតិភ្នងបានសម្រេច នៅស្រុកកែវសីម៉ា កាលពីថ្ងៃទី២៤ ខែសីហា ឆ្នាំ២០១៥ នៅគ្រាដែលក្មេងស្រី រងគ្រោះកំពុងស្ទូចត្រី ត្រូវបានកម្លាំងនគរបាលស្រុក សហការជាមួយ កម្លាំងនគរបាល ថ្នាក់ខេត្ត ចាប់ខ្លួនបានហើយនៅម៉ោងជិត ៧យប់ថ្ងៃទី ២៥ ខែសីហា ឆ្នាំ២០១៥នេះ។

លោក សូ សុវណ្ណ ស្នងការរងខេត្ត បានប្រាប់ឲ្យដឹងថា ដោយមានការបញ្ជាផ្ទាល់ពី លោក ញ៉ែម វ៉ាន់នី ស្នងការខេត្តមណ្ឌលគិរី ឲ្យធ្វើការស្រាវជ្រាវរកចាប់ខ្លួនជនសង្ស័យ ក្នុងករណីរំលោភក្មេងស្រីខាងលើនោះ កម្លាំងនគរបាលបានធ្វើការ ស្វែងរកចាប់ ខ្លួនជនសង្ស័យបាន និងនាំខ្លួនទៅសួរនាំ នៅអធិការស្រុកកែវសីម៉ា។  

លោក សូ សុវណ្ណ បានបញ្ជាក់ទៀតថា ជនសង្ស័យល្មោភកាមរូបនេះ មានឈ្មោះ ឡែម សាន ភេទប្រុស អាយុ៣២ឆ្នាំ ជនជាតិ ខ្មែរមុខរបរ កសិករ រស់នៅឃុំជាមួយក្មេងស្រីរងគ្រោះ។ ចំពោះមុខសមត្ថកិច្ច ជនសង្ស័យរូបនេះ បានសារភាពថា ខ្លួនពិត ជាបានប្រព្រឹត្ត អំពើរំលោភក្មេងនេះពិតមែន ហើយនៅថ្ងៃស្អែក ជនសង្ស័យរូបនេះ និងធ្វើការបញ្ជូន ទៅកាន់ស្នងការខេត្ត ដើម្បីចាត់ការបញ្ជូនបន្តទៅកាន់ សាលាដំបូងខេត្តចាត់ការតាមផ្លូវច្បាប់៕

ផ្តល់សិទ្ធដោយ ដើមអម្ពិល