រាជធានីភ្នំពេញ៖  ថ្ងៃទី២៨ ខែកញ្ញា ឆ្នាំ២០១៥ ក្រុមហ៊ុនសាណូហ្វីកម្ពុជា ដែលជាសាខា​មួយនៃ​ក្រុមហ៊ុនថែទាំសុខភាពឈានមុខគេលំដាប់​ពិភពលោក បានរៀបចំយុទ្ធនាការមួយ ដើម្បីលើកកម្ពស់​ការយល់ដឹង​ស្តីពី ជម្ងឺឆ្កែឆ្កួត​ក៏ដូចជាចូលរួម ក្នុងទិវាពិភពលោកប្រឆាំងជម្ងឺឆ្កែឆ្កួត ឆ្នាំ ២០១៥  ក្រោមប្រធានបទ ​“រួមគ្នាបញ្ចប់ជម្ងឺឆ្កែឆ្កួត” ដោយមានការចូលរួម ពីសំណាក់បុគ្គលិកគ្រប់ជាន់ថ្នាក់ និង អ្នកតំណាងមកពី​វិទ្យា​​ស្ថាន​ប៉ាស្ទ័រកម្ពុជា និងអ្នកសារព័ត៌មាន ដែលធ្វើឡើងនៅការិយាល័យរបស់ខ្លួន នៅរាជធានី​ភ្នំពេញ។ 

ក្រុមហ៊ុន សាណូហ្វីកម្ពុជា ដែលស្ថិតនៅតាមបណ្តោយផ្លូវក្រមួន.ស

ជម្ងឺឆ្កែឆ្កួត គឺជាជម្ងឺបណ្តាលមកពីវីរុសដែលអាចបង្ការបាន ប៉ុន្តែកាចសាហាវ ដែលបាននឹង​កំពុងសម្លាប់​មនុស្ស ពី៣៥,០០០ ទៅ៥០,០០០នាក់ ទូទាំងពិភពលោក ជារៀង​រាល់ឆ្នាំ។ យោងតាមការសិក្សា ​របស់វិទ្យាស្ថានប៉ាស្ទ័រកម្ពុជា ក្នុងចន្លោះពីថ្ងៃទី១ ខែមករា ដល់ទី៣១ ខែធ្នូ ឆ្នាំ២០១៤ មានមនុស្ស​ចំនួន ២១,៧៨២នាក់ ត្រូវបានបញ្ជូនមក ឬ​ មកដោយខ្លួនឯង ដល់មជ្ឈមណ្ឌលបង្ការជម្ងឺឆ្កែឆ្កួតនៃវិទ្យាស្ថានប៉ាស្ទ័រកម្ពុជា ដើម្បីចាក់ថ្នាំបង្ការជម្ងឺឆ្កែឆ្កួត សរុបមាន ចំនួន ១២៦,៣៨២លើក។ ជម្ងឺនេះអាចត្រូវបានចម្លងតាមរយៈឆ្កែ និងឆ្មានៅពេលវាខាំ ឬក្រញ៉ៅ ឬ លិតត្រង់កន្លែងមានរបួសបានដោយងាយ ដោយវាចម្លងវីរុស Lyssaviruses។ នៅពេលដែលអ្នកត្រូវបានខាំដោយសត្វឆ្កែ ឬ​​​​​​​​​​​​​​ ឆា្មដែលមានជម្ងឺនេះ ទឹកមាត់វានឹងចម្លងវីរុសនោះ ទៅជាជាលិកាក្រោមស្បែក និង​សាច់ដុំ។ ជារៀងរាល់ឆ្នាំ ស្ទើរតែគ្រប់ប្រទេស រដ្ឋាភិបាល អង្គការ និងស្ថាប័ននានា ប្រារព្ធ និងរៀបចំបង្កើតកម្មវិធី “ទិវាពិភពលោកប្រឆាំងជម្ងឺឆ្កែឆ្កួត” ដើម្បីពង្រីក​វិសាល​ភាព នៃការយល់ដឹងអំពីជម្ងឺឆ្កែឆ្កួតនេះ និងបន្តលើកកម្ពស់នូវវិធីបង្ការ និងការពារនៅតាមតំបន់សហគមន៍​ ដែលងាយនឹងរងគ្រោះពីជម្ងឺនេះផងដែរ។

លោកស្រី NGUYEN THI NGOC Minh ដែលជានាយិកាក្រុមហ៊ុនសាណូហ្វីកម្ពុជា  បានមាន​ប្រសាសន៍ថា៖ ពួកយើងមានសេចក្តីសោមនស្សរីករាយ និងមោទនភាពយ៉ាងខ្លាំង ​ដែលបានរៀបចំនូវព្រឹត្តិការណ៍នេះ នៅប្រទេសកម្ពុជាក្នុងគោលបំណង​ផ្សព្វផ្សាយ និងបង្កើនចំណេះដឹង អំពីជម្ងឺឆ្កែឆ្កួតជូនដល់សាធារណៈជនទូទៅ។ ហើយឆ្នាំនេះ ក្រុមហ៊ុនសាណូហ្វី​ បានចេញនូវយុទ្ធនាការថ្មីមួយ ដែលខុសប្លែកពីឆ្នាំមុនៗ ដោយផ្តោតសំខាន់ទៅលើការចែក ជូនចំណេះដឹងជាសាធារណៈអំពីបញ្ហា សុខភាព តាមរយៈ ខិតប័ណ្ណព័ត៌មានដែលអ្នកអានអាច ស្វែងរកព័ត៌មានសំខាន់ រួមមានដូចជា​ ប្រភពនៃការឆ្លងជម្ងឺនេះ​ របៀបការពារ​ពីការចម្លង​ និងវិធីសាស្ត្របង្ការបន្តបន្ទាប់ទៀត។ ក្រុមហ៊ុន​សាណូហ្វី ក៏បានចុះទៅកាន់តំបន់​ និងសហគមន៏ផ្សេងៗគ្នា​​ដែលបងប្អូនប្រជាជននៅទីនោះ ងាយនឹងរងគ្រោះថ្នាក់ពីជម្ងឺឆ្កែឆ្កួតនេះ​ ដើម្បីផ្សព្វផ្សាយ និង​លើក​កម្ពស់ការយល់ដឹងរបស់ពួកគាត់ ទាក់ទងនឹងជម្ងឺនេះ ក៏​ដូច​ជា​​ផ្តល់នូវការជួបសំណេះ​សំណាល ​ជាមួយពួកគាត់ ដើម្បីស្វែងយល់បន្ថែមពីស្ថានភាពជម្ងឺនេះ​ក្នុង​តំបន់សហគមន៍របស់គាត់ផងដែរ។

យោងតាមអង្គការសុខភាព ពិភពលោក ៤០% នៃជនរងគ្រោះពីជម្ងឺនេះ គឺក្មេងដែលមានអាយុក្រោម ១៥ឆ្នាំ។ ហើយជារៀងរាល់ឆ្នាំ មានមនុស្សច្រើនជាង ១៥លាននាក់ទូទាំងពិភពលោក ដែលបាន​ចាក់វ៉ាក់សាំង​ការពារជម្ងឺនេះ ក្រោយពេលសត្វខាំ។ គួរបញ្ជាក់ថា ប្រសិនបើអ្នកត្រូវបានខាំ ឬក្រញ៉ៅ ឬ បានរងរបួសតាមរូបភាពណាមួយក្តី ដោយសត្វឆ្មា ឬ ​​​ជាពិសេសឆ្កែដែលអ្នកគិតថាវាឆ្កួត អ្នកត្រូវ​ប្រញាប់ទៅជួបគ្រូពេទ្យកាន់តែឆាប់កាន់តែល្អ។ ប្រសិនបើអ្នក​មិនបានចាក់វ៉ាក់សាំងការពារត្រឹមត្រូវ ហើយរង់ចាំរហូតដល់ចេញរោគសញ្ញានោះ  អ្នកនឹងប្រឈមគ្រោះថ្នាក់ខ្ពស់ដល់បាត់បង់ជីវិត។ ប្រសិនបើអ្នកសង្ស័យថា អ្នកបានឆ្លងជម្ងឺនេះ សូមទៅពិគ្រោះយោបល់ ជាមួយវេជ្ជបណ្ឌិតជាបន្ទាន់ ដើម្បីទទួលបាននូវដំបូន្មាន ឬការចាក់វ៉ាក់សាំងបង្ការ។

ប្រសិនបើអ្នកសង្ស័យថា មានការ​ជម្ងឺឆ្កែ​ឆ្កួត​នៅក្នុងសហគមន៍របស់អ្នក អ្នកត្រូវបង្ខាំងសត្វឆ្កែរបស់អ្នកទុកក្នុងបរិវេណផ្ទះ និងចាក់ថ្នាំបង្ការជម្ងឺ​ឆ្កែឆ្កួតដល់ឆ្កែរបស់អ្នក ដើម្បីការពារក្រុមគ្រួសាររបស់អ្នក ហើយសូមទៅជួបជាមួយ​វេជ្ជបណ្ឌិត ដើម្បីពិគ្រោះយោបល់ ឬចាក់វ៉ាក់សាំងជាបន្ទាន់ ប្រសិនបើចាំបាច់។​  

បុគ្គលិកគ្រប់ជាន់ថ្នាក់របស់ក្រុមហ៊ុន និង អ្នកតំណាងមកពី​វិទ្យា​​ស្ថាន​ប៉ាស្ទ័រកម្ពុជា

អំពីក្រុមហ៊ុនសាណូហ្វី

ក្រុមហ៊ុនសាណូហ្វី ដែលជាក្រុមហ៊ុនឪសថឈានមុខគេលើពិភពលោក បានរកឃើញ, និងកែច្នៃ ព្រមទាំងចែកចាយផលិតផលដែលផ្តោតសំខាន់លើតំរូវការរបស់អ្នកជំងឺជាចំបង។ ក្រុមហ៊ុន សាណូហ្វី មានចំនុចស្នូលសំខាន់ៗចំនួន៧ ក្នុងវិស័យថែទាំសុខភាព ដែលមានដូចជា ដំណោះស្រាយនៃជំងឺទឹក​នោមផ្អែម, ការចាក់វ៉ាក់សាំងការពារទៅលើមនុស្ស​ ​ថ្នាំបង្កើតថ្មីៗ ​តំហែទាំសុខភាពសម្រាប់អតិថិជន, ទីផ្សារថ្មីៗ, សុខភាពសត្វ និង Genzyme ។ ក្រុមហ៊ុនសាណូហ្វី បានចុះបញ្ជីនៅទីក្រុង​ប៉ារីស (EURONEXT: SAN) និងនៅទីក្រុងញូវយ៉ក (NYSE: SNY)។

អំពីក្រុមហ៊ុនសាណូហ្វីកម្ពុជា

ក្រុមហ៊ុនសាណូហ្វី មានវត្តមាននៅក្នុងប្រទេសកម្ពុជាចាប់តាំងពីឆ្នាំ ១៩៩២ តាមរយៈ​ការិយាល័យ​តំណាង Roussel​ ​Uclaf ហើយបានក្លាយជា Société Roussel Cambodge ក្នុងឆ្នាំ១៩៩៣។ តាំងពីថ្ងៃទី១ ខែមករាឆ្នាំ ២០១១, Roussel​​ Cambodge ត្រូវបានប្តូរឈ្មោះទៅជាសាណូហ្វីកម្ពុជា​បន្ទាប់ពីមានការសម្រេចចិត្តពីក្រុមឱសថសាស្រ្តរបស់ប្រទេសបារាំងក្នុងការបើកសាខាក្នុងស្រុក។ ដោយមាន វ៉ាក់សាំងជាង ២០មុខនិងផលិតផលឱសថ ជាង៨០មុខ​ មិនតែប៉ុណ្តោះ សាណូហ្វី កម្ពុជាបានជាប់​ចំណាត់​ថ្នាក់ជាក្រុមហ៊ុនផលិតផលឱសថកំពូលដែលឈានមុខគេក្នុងចំណោមក្រុមហ៊ុនឪសថ នៅក្នុងប្រទេសកម្ពុជាពីសំណាក់ការគាំ ពីទ្របុគ្គលិកប្រមាណ១០០នាក់ ជាមួយការខិតខំប្រឹងប្រែងដើម្បីធានាឲ្យបាន នូវគុណភាពទៅកាន់អ្នកជំងឺឲ្យទទួលបាន ការព្យាបាលយ៉ាងយកចិត្តទុកដាក់៕

ខ្មែរឡូត