តុលាការចោទប្រកាន់គ្រូបង្រៀនដែលពិន័យ ឱ្យសិស្សប្រុសស្រាត សំពត់សិស្សស្រីនៅ ស្រុករំដួលហើយ

តុលាការចោទប្រកាន់គ្រូបង្រៀនដែលពិន័យ ឱ្យសិស្សប្រុសស្រាត សំពត់សិស្សស្រីនៅ ស្រុករំដួលហើយ

ខេត្តស្វាយរៀង ៖ នៅថ្ងៃទី៥ វិច្ឆិកា ២០១៥ វេលាម៉ោង៥ល្ងាច លោកព្រះរាជអាជ្ញារងអមសាលា ដំបូងខេត្តស្វាយរៀងបានធ្វើការ ចោទប្រកាន់លោក ដួង សានេត គ្រូបង្រៀនថ្នាក់ទី២ នៃសាលាបឋមសិក្សាហ៊ុន សែន វត្តថ្មី ហើយគឺចោទពីបទផ្តើមគំនិត ក្នុងអំពើអាស់ប្រឆាំង នឹងអនីតិជន ក្រោម១៥ឆ្នាំ ។

ទាក់ទិនករណីនេះដែរ លោក ផាន់ រតនា ព្រះរាជអាជ្ញារងអមសាលាដំបូងខេត្តស្វាយរៀង បានមាន ប្រសាសន៍ឲ្យដឹងថា លោកបានចោទប្រកាន់ ជនសង្ស័យឈ្មោះ ដួង សានេត ភេទប្រុស អាយុ៤៣ឆ្នាំ ពីបទផ្តើមគំនិតក្នុងអំពើអាស់ប្រឆាំងនឹង អនីតិជនក្រោម១៥ឆ្នាំ និងបានដាក់សំណើទៅ លោកចៅក្រមស៊ើបសួរ សុំឲ្យលោក ចៅក្រមឃុំខ្លូនបណ្តោះអាសន្នចំពោះ ជនត្រូវចោទរួចហើយ ក៏ប៉ុន្តែជនត្រូវចោទ នៅក្រៅឃុំបណ្តោះអាសន្នសិន ដោយសារសំណុំរឿងស៊ើបអង្កេត ដាក់សំណើទៅលោក ប្រធានតុលាការ ហើយលោកប្រធាន តុលាការពុំទាន់ចាត់របៀបឲ្យលោកចៅក្រម រូបណាកាន់សំណុំរឿងនេះទេ ហើយឃុំខ្លួន ឬមិនឃុំ សូមរង់ចាំសប្តាហ៍ក្រោយ នៅពេលលោកចៅក្រមស៊ើបសួរ ដំណើរការនិតិវិធី ។

សូមរំលឹកផងដែរថា កាលពីថ្ងទី១៨ ឧសភា ២០១៥ មាតាបិតាសិស្សបានចោទប្រកាន់លោក ដួង សានេត គ្រូបង្រៀនថ្នាក់ទី២ នៃសាលាបឋមសិក្សា ហ៊ុន សែន វត្តថ្មី ស្ថិតក្នុងឃុំសង្កែ ស្រុករំដួល ថា បានដាក់ទណ្ឌកម្មសិស្សស្រីអាយុ១១ឆ្នាំ គ្រាន់តែមិនចេះអានអក្សរ ត្រូវដាក់ទណ្ឌកម្មដោយ ឲ្យសិស្សប្រុសសម្រាត សំពត់សិស្សស្រីរបូតដល់កែងជើងនៅ មុខមិត្តរួមថ្នាក់ ធ្វើឲ្យមាតាបិតាសិស្ស ខឹងសម្បារ ហើយសុំឲ្យមន្ទីរអប់រំយុវជន និងកីឡាខេត្តដក ឬបញ្ឈប់លោកគ្រូ ដួង សានេត ចេញពីសាលាបឋមសិក្សាហ៊ុន សែន វត្តថ្មី ។

រហូតដល់ថ្ងៃទី៥ វិច្ឆិកានេះ លោកព្រះរាជអាជ្ញាបានចោទប្រកាន់រួចរាល់ហើយ ដូច្នេះលោក ដួង សានេត មិនអាចរួចផុតពី សំណាញ់ច្បាប់ឡើយ ៕