ប៊ី លីហួរ ដើរអែប អ៊ឹម ជីវ៉ា លិចកើតបានធ្វើពិធីករបាត់

ប៊ី លីហួរ ដើរអែប អ៊ឹម ជីវ៉ា លិចកើតបានធ្វើពិធីករបាត់

តារាសម្ដែងថ្មី លោក ប៊ី លីហួរ ក្រោយពីបានដើរតាម លោក អ៊ឹម ជីវ៉ា មួយរយៈ ថ្មីៗនេះ តារារូបនេះ ត្រូវបាន លោក អ៊ឹម ជីវ៉ា នាំចូលធ្វើពិធីករនៅស្ថានីយទូរទស្សន៍ថ្មីមួយហើយ។

ស្ថានីយទូរទស្សន៍ថ្មីដែល លោក ប៊ី លីហួរ បានចូលធ្វើជាពិធីករនោះ មានឈ្មោះថា NTV ដែលកំពុងតែដំណើរការចាក់បញ្ចាំងសាកល្បងរាល់ថ្ងៃ ហើយកម្មវិធី ដែលលោកកាន់នោះ មានឈ្មោះថា “ជីវិតតារា” ។

“ជីវិតតារា” គឺជា កម្មវិធីមួយនិយាយសកម្មភាពទូទៅរបស់តារា ដែលមានរយៈពេល១ម៉ោងពេញ សម្រាប់ចាក់បញ្ចាំងរៀងរាល់ថ្ងៃ សៅរ៍ ម៉ោង ៥ ដល់ម៉ោង ៦ ល្ងាច ហើយមានពិធីករពិធីការិនីរហូតដល់ទៅ ៣ នាក់ ក្នុងនោះ មានរូបលោក កញ្ញា ណូម័រ និង លោក អ៊ឹម ជីវ៉ា។

លោក ប៊ី លីហួរ បានឲ្យដឹងបន្ថែមទៀតដា កម្មវិធីមួយនេះ ត្រូវបានចែកចេញជា ៤ វគ្គ ក្នុងនោះមាន វគ្គ បង្ហាញម៉ូដ វគ្គ កិច្ចសម្ភាសន៍ វគ្គធ្វើម្ហូប និង វគ្គ សកម្មភាពតារាជាដើម ហើយបច្ចុប្បន្នកម្មវិធីមួយនេះ ទើបតែថតបាន ៤ Show ប៉ុណ្ណោះ។

លោក ប៊ី លីហួរ ទទួលស្គាល់ថា ការងារសិល្បៈរបស់លោកដែលមានបច្ចុប្បន្ននេះ គឺពិតជា ក្រោមការជ្រោមជ្រែង ពីលោក អ៊ឹម ជីវ៉ា ពិតប្រាកដមែន ព្រោះរាល់សកម្មភាពគ្រប់យ៉ាងត្រូវបានរៀបចំដោយលោក អ៊ឹម ជីវ៉ា ដែលត្រូវជាបងជីដូនមួយរបស់លោកទាំងអស់។

លោក ប៊ី លីហួរ ក្រៅពីការងារជាពិធីករ និង សម្ដែងខារ៉ាអូខេ ម្ដងម្កាល តារាមានវ័យ ១៨ ឆ្នាំ មានដើមកំណើតក្នុងរាជធានីភ្នំពេញនេះ គឺជា និស្សិត ឆ្នាំ ទី១ ជំនាញគ្រប់គ្រង នៅសាកលវិទ្យាល័យមួយ។ ទោះបីជាមានខ្សែបែបនេះក្ដី ប្រសិនបើមិនមានសមត្ថភាព គឺ មិនអាចឈរជើងបានយូរឡើយ ដូចនោះ លោក ប៊ី លីហួរ បានលើកឡើងថា លោកត្រូវតែខិតខំឲ្យអស់ពីសមត្ថភាព មិនឲ្យអ្នកដែលជួយជ្រោមជ្រែងលោក អស់សង្ឃឹមឡើយ៕