ភ្នំពេញ៖ ឈានចូលដល់អាយុ២៦ឆ្នាំ តារាសម្តែង និងជាពិធីការិនី កញ្ញា ថន លក្ខិណា នឹងធ្វើខួបកំណើត លើករាសី នៅថ្ងៃទី២២ ខែធ្នូ ឆ្នាំ២០១៥ ខាងមុខនេះ។

ពីធីការិនីដែលពោរពេញទៅដោយសមត្ថភាព កញ្ញា ថន លក្ខិណា  ក្រៅពីជោគជ័យ លើអាជីពសម្តែង នាងក៏កំពុងជោគជ័យ ដោយវិវត្តខ្លួន ឈរឈ្មោះ ជាពិធីការិនីលំដាប់ យុគ ចិន្តា គង់ សុជាតិ   ខៀវ សានសាណា និងពិធីការិនីរលកក្រោយ កែវ ច័ន្ទនិមល ។

តួស្រីក្នុងរឿង «The Return»  ដែលជាវណ្ណកម្មរបស់ថៃ កាលពីពេលថ្មីៗនេះបានបង្ហាញខ្លួន យ៉ាងឆើតឆាយ ក្នុងខួបកំណើត តារាសម្តែង អ៊ឹម ជីវ៉ា  ដែលធ្វើឲ្យភ្ញៀវ ចូលញ៉ាំអាហារនៅភោជនីយដ្ឋាន Vfriend  ដកកចំហរមាត់ និងលួចសរសើរថា ពិតជាស្អាតរបស់គេមែន ។

ខួប ថន លក្ខិណា នៅឆ្នាំនេះ គឺខួបដ៏ធំបំផុត បន្ទាប់ខួបកំណើតដែលធ្វើឡើងកាលពីថ្ងៃទី៧ ខែធ្នូ ឆ្នាំ២០១២   ដោយខួបលើកនេះនាង នឹងធ្វើប្រហែលជាង ២០តុ ឯណោះ ។

បើតាមសម្តីរបស់ ថន តារា ត្រូវជាបងស្រីបង្កើត ថន លក្ខិណា បានប្រាប់មជ្ឈមណ្ឌលព័ត៌មាន ដើមអម្ពិល នៅរសៀលនេះ ឲ្យដឹងថា «ខ្ញុំមិនដឹងប្រាកដនោះទេ ដោយដំបូងឡើយថា ធ្វើតែ១៥តុ តែពេលនេះ សំបុត្រខួបកំណើត ឮថា កើនដល់ ៣០តុ   បើទោះបីជាបងប្អូនមែនពិត តែខ្ញុំមិនដឹងឲ្យច្បាស់ប្រាកដនោះទេ» ។

ទន្ទឹមជាមួយនឹងគ្នានេះដែរ អ្នកសិល្បៈម្នាក់ (សុំមិនបង្ហាញឈ្មោះ)  ក៏បានឲ្យដឹងថា «ខួបកំណើតលក្ខិណា គឺធ្វើចូលដល់ខ្ទង់ ៣០តុ ហើយការចំណាយដល់ខ្ទង់រាប់ពាន់ដុល្លារ» ។

បើទោះបីជាយ៉ាងនេះក្តី នៅរសៀលនេះ ខាងមជ្ឈមណ្ឌលព័ត៌មាន ដើមអម្ពិល មិនអាចសុំការស្រាយចម្ងល់ពីចំនួនតុ នៃពិធីខួបកំណើតរបស់នាង បាននៅឡើយទេ ខណៈដែលបណ្តាញទូរស័ព្ទ មិនអាចទំនាក់ទំនងបាន ៕

ផ្តល់សិទ្ធដោយ ដើមអម្ពិល