កូនប្រុសថៅកែហាងថតរូបត្រូវអាវុធហត្ថ ចាប់ខ្លួនពីបទដាក់ថ្នាំ សណ្ដំរំលោភរួចប្លន់យក ទ្រព្យសម្បត្តិ

កូនប្រុសថៅកែហាងថតរូបត្រូវអាវុធហត្ថ ចាប់ខ្លួនពីបទដាក់ថ្នាំ សណ្ដំរំលោភរួចប្លន់យក ទ្រព្យសម្បត្តិ

រាជធានីភ្នំពេញ ៖ បុរសម្នាក់ជាកូនថៅកែហាងថតរូបត្រូវបានកម្លាំងកងរាជអាវុធហត្ថ ខណ្ឌ៧មករាធ្វើការ ឃាត់ខ្លួនបន្ទាប់ពីទទួល ពាក្យបណ្ដឹងពីនារីរងគ្រោះ ថាបានដាក់ថ្នាំសណ្ដំ រួចនាំនាងទៅរំលោភនៅក្នុង ផ្ទះសំណាក់ឡាក់គី២ ព្រមទាំងប្លន់យក ទូរស័ព្ទដៃ និងគ្រឿងអលង្ការ អស់ពីខ្លួនថែមទៀតផង ។

សមត្ថកិច្ចអាវុធហត្ថខណ្ឌ៧មករាបានឲ្យដឹងថា ជនសង្ស័យឈ្មោះ បូរ ចំរើន ភេទប្រុស អាយុ៣៨ឆ្នាំ មានទីលំនៅផ្ទះលេខ១៨៩ មហាវិថីព្រះមុនីវង្ស សង្កាត់អូរឫស្សី៤ ខណ្ឌ៧មករា រាជធានីភ្នំពេញ ជាកូនប្រុសថៅកែហាងថតរូប ត្រូវបានចាប់ខ្លួនកាលពីវេលាម៉ោង៤ និង៣០នាទីរសៀល ថ្ងៃទី១៤ ខែមករា ឆ្នាំ២០១៦ នៅតាមបណ្តោយផ្លូវលេខ១០៧ សង្កាត់មនោរម្យ ខណ្ឌ៧មករា ខណៈជនសង្ស័យកំពុងជិះរថយន្តដល់ទីនោះ ។ ចំណែកនារីរងគ្រោះ ស.ស.ច.ដ. អាយុ២៩ឆ្នាំ មុខរបររកស៊ី ។

យោងតាមពាក្យបណ្តឹងនារីរងគ្រោះបានបញ្ជាក់ថា កាលពីថ្ងៃទី១០ ខែមករា ឆ្នាំ២០១៦ នាងបាន ទៅចូលរួមកម្មវិធីខួបកំណើត មិត្តភក្តិមួយកន្លែង ដោយនៅពេលនោះ នាងបានជួបជុំ និងស្គាល់ជនសង្ស័យ ហើយនៅ ពេលចេញពីកម្មវិធីខួបកំណើតនោះ ដោយសាររូបនាងពុំមាន យានជំនិះធ្វើដំណើរត្រឡប់ ទៅផ្ទះវិញទើបបុរស សង្ស័យឲ្យនាងជិះរថយន្តទៅផ្ទះជាមួយ ។

ប្រភពបន្តថា លុះធ្វើដំណើរដល់ពាក់កណ្តាលផ្លូវជនសង្ស័យបានបបួលនាងហូបអាហារ ជាមួយគ្នាដោយ សន្យាថានឹងឲ្យលុយ ២០០ដុល្លារដល់នាង ។ លុះនាងចុះហូប អាហាររួចហើយ ស្រាប់តែទន់ដៃទន់ជើង លែងដឹងខ្លួនតែម្តង ។ ក្រោយមកពេលនាង ស្វាងដឹងខ្លួនវិញស្រាប់ តែឃើញនៅក្នុងផ្ទះសំណាក់ ឡាក់គី២ទាំង កាយអាក្រាត ព្រមទាំងបាត់បង់កាបូបលុយ ដែលក្នុងនោះមានទូរស័ព្ទ អាយហ្វូន១គ្រឿង នាឡិកាដៃ១ ខ្សែ.កមាស១ខ្សែ និងប្រាក់២៨០ដុល្លារ ។ គ្រានោះទើបនាងដឹងថា ខ្លួនបានចាញ់បោកជនសង្ស័យ ហើយក៏មកដាក់ពាក្យ ប្តឹងនៅអធិការដ្ឋានកងរាជអាវុធហត្ថខណ្ឌ៧មករា ដើម្បីឲ្យជួយអន្តរាគមន៍ ។

រហូតដល់ម៉ោង៤ និង៣០នាទីរសៀល ថ្ងៃទី១៤ ខែមករា ឆ្នាំ២០១៦ ទើបសមត្ថកិច្ចចាប់ខ្លួន ជនសង្ស័យបាន និងកសាងសំណុំរឿង បញ្ជូនទៅតុលាការដើម្បី ចាត់ការតាមនីតិវិធីច្បាប់ ៕