ភ្នំពេញៈ តារាសម្តែងស្រីវ័យក្មេង ដែលចូលចិត្តចូលរួម ជាមួយការងារមនុស្សធម៌ កញ្ញា ហង្ស ម៉ារីនី បានបង្ហើបប្រាប់ឲ្យដឹងថា មានមានគោលបំណង យករូបភាពនិងវីដេអូ សប្បុរសធម៌ ដែលនាងធ្លាប់ចូលរួម ធ្វើកន្លងមកទៅដាក់ប្រកួត នៅក្នុង Page របស់សម្តេច តេជោ ហ៊ុន សែន ក្នុងបំណងចង់ទទួលបាន រង្វាន់ពីសម្តេច ដើម្បីបន្តសកម្មភាពមនុស្សធម៌បន្តទៀត ។

បើតាម Facebook ដែលអតីត Freshie girl កញ្ញា ហង្ស ម៉ារីនី សរសេរបង្ហោះ នៅលើបណ្តាញនេះថា « ខ្ញុំចង់យក Video នេះដាក់ប្រកួតប្រជែង នៅក្នុង Page របស់សម្តេច តេជោ, តើបងប្អូនទាំងអស់គ្នាគាំទ្រនាងខ្ញុំរឺទេ? សូមជួយ comment ប្រាប់នាងខ្ញុំផង គោលបំណង បើសិនជានាងខ្ញុំទទួលការគាំទ្រច្រើន ហើយឈ្នះក្នុងកម្មវិធីនេះ រាល់រង្វាន់ជ័យលាភីទាំងអស់ នាងខ្ញុំ និង បរិច្ចាគទាំងស្រុង ១០០%ជូនប្រជាជន ខ្វះខាត និងទីទ័លក្រ នៅប្រទេសកម្ពុជា យើងទាំងអស់តែម្តង» ។

កាលពីអំឡុងចុងខែមករា កន្លងទៅនេះ សម្តេចតេជោ ហ៊ុន សែន បានប្រកាសថា នឹងធ្វើការផ្តល់រង្វាន់ជា មេដាយ និងប័ណ្ណសរសើរដល់យុវជនណា ដែលទទួលបានការគាំទ្រច្រើនជាងគេ ក្នុងការផ្ញើររូប ឃ្លីបសំឡេង ឃ្លីបវីដេអូ រូបគំនូរ ដើម្បីចូលរួមប្រកួតប្រជែង ទាក់ទងនឹងប្រធានបទ ការគោរពច្បាប់ចរាចរណ៍ អំពើល្អចំពោះមនុស្សចាស់ជរា និងជនពិការ អំពើល្អចំពោះកុមារ និងស្ត្រីទន់ខ្សោយ ការជួយគ្នានៅពេលមាន គ្រោះថ្នាក់ចរាចរណ៍ ការចូលរួមរើសសំរាមសម្អាតទីក្រុង និងតាមទីធ្លាសាធារណៈ ការទប់ស្កាត់ និង លុបបំបាត់គ្រឿងញៀន និងការឈប់ជក់បារីជាដើម ។

ដោយសារតែហេតុនេះហើយ ទើបធ្វើឲ្យតារាសម្តែងកញ្ញា ហង្ស ម៉ារីនី មានបំណងចង់ចូលរួម ជាមួយការប្រកួតប្រជែងនេះ ដើម្បីយកប្រាក់រង្វាន់ទៅ បន្តសកម្មភាពមនុស្សធម៌បន្តទៀត ៕

ផ្តល់សិទ្ធដោយ ដើមអម្ពិល