ដើររកប្រពន្ធ ដាក់អាវុធតាមខ្លួន ក្លាយជាអ្នកទោស

ដើររកប្រពន្ធ ដាក់អាវុធតាមខ្លួន ក្លាយជាអ្នកទោស

ខេត្តព្រៃវែង ៖ សមត្ថកិច្ចចម្រុះ ស្រុកពាមជរ បានឃាត់ខ្លួនបុរសម្នាក់ និងកសាងសំណុំរឿង បញ្ជូនទៅសាលាដំបូង បន្ទាប់ពីត្រួតពិនិត្យ ឃើញមានកាំភ្លើង អាកាកាត់ស្វាយ ១ដើម រួមជាមួយ គ្រាប់កាំភ្លើង ចំនួន២៩គ្រាប់ នៅនឹងខ្លួន ។

បុរសម្នាក់នេះ ឈ្មោះ សំ ធី អាយុ៤៦ឆ្នាំ មានទីលំនៅ ក្នុងភូមិព្រែកសំរោង ឃុំព្រែកសំរោង ស្រុកស្អាង ខេត្តកណ្តាល ត្រូវបានឃាត់ខ្លួន កាលពីវេលា ម៉ោង១១យប់ ថ្ងៃទី៣ កុម្ភៈ នៅផ្លូវលំក្នុង ភូមិវាលរបងលើ ឃុំអង្គរអង្គ ស្រុកពាមជរ ។

ប្រភពព័ត៌មានពីសមត្ថកិច្ច បានឲ្យដឹងថា នៅវេលាម៉ោង១១យប់ ថ្ងៃទី៣ កុម្ភៈ ខណៈកម្លាំងសមត្ថកិច្ច កំពុងដើរល្បាត នៅតាមដងផ្លូវ ស្រាប់តែប្រទះឃើញ បុរសរូបនេះ ជិះម៉ូតូ១គ្រឿង ម៉ាកសេ១០០ អត់ស្លាកលេខ ធ្វើដំណើរតែម្នាក់ឯង និងមានដឹកការុង១ នៅពីមុខ ដែលមើលពីក្រៅ ដូចជាវត្ថុរឹង ។ ដោយឃើញបែបនេះ ធ្វើឱ្យសមត្ថកិច្ចមានការសង្ស័យ ក៏ឃាត់ត្រួតពិនិត្យ និងដឹងថា នៅក្នុងការុងនោះ គឺជាកាំភ្លើង១ដើម ម៉ាកអាកាកាត់ស្វាយ និងមានគ្រាប់ ជាច្រើនទៀត ។

ប្រភពដដែលបន្តថា ក្រោយពីត្រូវឃាត់ខ្លួន និងតាមចម្លើយ សាកសួរបឋម ជននេះឆ្លើយថា ខ្លួនមកតាមរកប្រពន្ធឈ្មោះ ហាស់ សារ៉េន អាយុ៣៥ឆ្នាំ ដែលបានរត់ចោលខ្លួនជាប្តី ហើយមកសម្ងំ រស់នៅក្នុង ភូមិវាលរបងលើនេះ ។ ប្រភពព័ត៌មាន ពីសមត្ថកិច្ចបញ្ជាក់ថា ទោះបីជាចម្លើយ របស់បុរសនេះ ពិតឬមិនពិត យ៉ាងណាក៏ដោយ ប៉ុន្តែការដាក់អាវុធជាតិផ្ទុះ ដែលគ្មានលិខិតស្នាម ត្រឹមត្រូវតាមខ្លួន គឺជារឿងខុសច្បាប់ ដូច្នេះសមត្ថកិច្ច ត្រូវតែឃាត់ខ្លួនកសាងសំណុំរឿង ទៅតាមនីតិវិធី ។

ដោយឡែក សាធារណមតិខ្លះ បានលើកឡើងថា បើជននេះ គ្រាន់តែតាមរកប្រពន្ធ តើយកកាំភ្លើង មកតាមធ្វើអ្វី ឬមួយពេលរកឃើញហើយ បាញ់សម្លាប់ចោល? ឯមតិខ្លះទៀត លើកឡើងថា ចម្លើយរបស់ជនសង្ស័យ អាចគ្រាន់តែជាលេស ដោះសារ ក្រោយពេលត្រូវចាប់ខ្លួន ប៉ុណ្ណោះ ប៉ុន្តែចេតនាពិត គឺអាចមានបំណងអ្វីផ្សេង ក៏ថាបាន ។

ទោះជាយ៉ាងណាក៏ដោយ ប្រជាពលរដ្ឋ ក៏មានការត្រេកអរ ផងដែរ ដែលសមត្ថកិច្ច ឃាត់ខ្លួនជនរូបនេះ បានមុន គឺអាចទប់ស្កាត់ បាននូវហេតុការណ៍អាក្រក់ៗ ដែលយើងនឹកស្មានមិនដល់ ៕