បាត់កូនស្រី ២ថ្ងៃ ឪពុកម្តាយ កាន់រូបថត ទៅប្តឹងនគរបាល ប៉ុស្តិ៍ទួលសង្កែ ឱ្យជួយរក

បាត់កូនស្រី ២ថ្ងៃ ឪពុកម្តាយ កាន់រូបថត ទៅប្តឹងនគរបាល ប៉ុស្តិ៍ទួលសង្កែ ឱ្យជួយរក

រាជធានីភ្នំពេញ ៖ ក្មេងស្រីជំទង់ អាយុ១៤ឆ្នាំម្នាក់ បានបាត់ខ្លួន រយៈពេល២ថ្ងៃ មកហើយ ត្រូវបានឪពុកម្តាយកាន់រូបថត ទៅដាក់ពាក្យបណ្តឹង នៅប៉ុស្តិ៍នគរបាល រដ្ឋបាលទួលសង្កែ កាលពីវេលា ម៉ោង១សៀល ថ្ងៃទី១០ ខែកុម្ភៈ ដើម្បីឱ្យសមត្ថកិច្ច ជួយរក ។

ក្មេងស្រីដែលបាត់ខ្លួន ត្រូវបានក្រុមគ្រួសារ ឱ្យដឹងថា ឈ្មោះ ជួរ ស្រីម៉ី អាយុ១៤ឆ្នាំ ជាអ្នកជួយលក់ដូរ ឱ្យម្តាយមីង មានម្តាយ ឈ្មោះ ជៀម ច័ន្ទ អាយុ៤៥ឆ្នាំ ជាកម្មការិនី កាត់ដេរ និងឪពុកឈ្មោះ ជួរ កុសល អាយុ៤៨ឆ្នាំ ជាជាងផ្ទះ ស្នាក់នៅផ្ទះជួល ក្រុមទី៧ ភូមិទួលគោក សង្កាត់ទួលសង្កែ ខណ្ឌឫស្សីកែវ ។

ស្ត្រីជាម្តាយបាននិយាយថា កូនស្រីរបស់គាត់ បានស្នាក់នៅ ជួយលក់ដូរ ម្តាយមីង នៅសង្កាត់គីឡូម៉ែត្រ លេខ៦ ហើយទើបតែត្រឡប់ មកលេងផ្ទះ នៅក្នុងឱកាស បុណ្យចូលឆ្នាំ ចិន-វៀតណាម នេះ ។ នៅវេលាម៉ោង៦ និង២០នាទីល្ងាច ថ្ងៃទី៨ ខែកុម្ភៈ នាងបានសុំប្រាក់ ចំនួន៤ពាន់រៀល ទៅហូបបង្អែម ជាមួយមិត្តភក្តិ ស្រាប់តែបាត់រហូតមិនឃើញត្រឡប់ មកផ្ទះវិញ ទូរស័ព្ទក៏មិនចូល និងដើររកគ្រប់ទីកន្លែង ក៏មិនឃើញទៀត ។

ស្ត្រីជាម្តាយបន្តថា កន្លងមក កូនស្រីគាត់ មិនដែលមានរឿងអ្វី ឫក៍ខឹងឪពុកម្តាយ នោះទេ ។ បន្ទាប់ពីបាត់ខ្លួន ពួកគាត់ក៍បានសម្រេចចិត្ត យករូបថត មកប្តឹងនគរបាលប៉ុស្តិ៍ ឱ្យជួយរកតែម្តង ។

តាមប្រភពព័ត៌មាន បានឱ្យដឹងទៀតថា បន្ទាប់ពីដាក់ពាក្យបណ្តឹង រួចហើយ បងប្រុស បានព្យាយាមទូរស័ព្ទចូលហើយ ត្រូវក្មេងស្រីនិយាយថា ខ្លួនមិនចូលផ្ទះវិញទេ ដោយមូលហេតុ ខឹងនឹងឪពុកម្តាយ ព្រមទាំងនិយាយថា ចង់តែលោតទឹក សម្លាប់ខ្លួនទេ រួចក៏បិទទូរស័ព្ទទៅ ៕