ត្រីកោណស្នេហា ប្រហារជីវិត ភរិយាដើម

ត្រីកោណស្នេហា ប្រហារជីវិត ភរិយាដើម

ខេត្តបន្ទាយមានជ័យ ៖ មានហេតុការណ៍មួយ បង្កឲ្យមានការភ្ញាក់ផ្អើល ទាំងយប់ ក៏ព្រោះតែប្រពន្ធ បានឃើញប្តីបើកឡានដឹកស្រីស្នេហ៍ដើរលេង មកហូបអាហារ នៅផ្សាររាត្រី ក៏ជិះម៉ូតូតាមពីក្រោយទាន់ ក៏មានការវាយប្រតប់គ្នា រវាងប្រពន្ធដើម និងស្រីសេ្នហ៍ ប្តីមានការភ័យស្លន់ស្លោរ ដាក់លេខថយក្រោយ ជាន់មួយទំហឹង បណ្តាលឲ្យស្ត្រីជាប្រពន្ធ បុកកៀបនឹងបង្គោលស៊ីម៉ង់ត៍ បាក់ឆ្អឹងជំនីមួយចំហៀង ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្ត ដឹកមកសង្គ្រោះបន្ទាន់ តែជាអកុសល នាងត្រូវបានស្លាប់ យ៉ាងអាណោចអាធ័ម ពេលដឹកមកដល់មន្ទីរពេទ្យបង្អែក ក្រុងសិរីសោភ័ណ បន្សល់ទុកកូនប្រុសស្រី ចំនួន២នាក់ ឯឪពុកក៏ប្រឈម នឹងជាប់ពន្ធនាគារ។

ហេតុការណ៍បង្កឲ្យមាន ការភ្ញាក់ផ្អើលនេះ បានកើតឡើង នៅវេលាម៉ោង៧យប់ ថ្ងៃទី១៨ ខែកុម្ភៈ ឆ្នាំ២០១៦ នៅផ្សាររាត្រី ស្ថិតក្នុងភូមិព្រៃប្ញស្សី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ ស្ត្រីជាប្រពន្ធដើម ដែលស្លាប់មានឈ្មោះ មាស សារី អាយុ២៩ឆ្នាំ នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ចំណែកបុរសជាប្តីបង្កល្មើស ឈ្មោះ សាន ស៊ីម ហៅ ចក់ អាយុ៣៦ឆ្នាំ នៅភូមិទឹកថ្លា សង្កាត់ទឹកថ្លា ក្រុងសរីសោភ័ណ ខេត្តបន្ទាយមានជ័យ ជាជាងធ្វើចេតិយ។

បើតាមសាក្សី នៅកន្លែងកើតហេតុ បាននិយាយថា មុនពេលកើតហេតុ មានរថយន្ត១គ្រឿង បានបើកមកឈប់មុខ ផ្ទះរបស់គាត់ នៅនឹងផ្សាររាត្រី ស្ថិតក្នុងភូមិព្រៃប្ញស្សី សង្កាត់ព្រះពន្លា ស្រាប់តែពេលនោះ ក៏មានស្ត្រីម្នាក់បានជិះម៉ូតូ តាមពីក្រោយរថយន្ត ស្រីក្នុងឡាន បានទម្លាក់កញ្ចក់ចុះ ស្ត្រីជាប្រពន្ធ បានឡើងលើឈ្នាន់ ជាន់ចូលក្នុងរថយន្ត ក៏បានប្រវ៉ាយប្រតប់គ្នា ប្តីឃើញដូច្នោះ ក៏ថយរថយន្តយ៉ាងលឿន ទាំងប្រពន្ធកំពុងតែ ប្រវ៉ាយប្រតប់គ្នាដែលប្រពន្ធដើម នៅខាងក្រៅ គោលបំណងដើម្បី ឲ្យប្រពន្ធលោតចុះ ក៏បណ្តាលឲ្យបុកកៀប នឹងបង្គោលស៊ីម៉ង់ត៍កម្ពស់១ម៉ែត្រ និងបុករោងដែក បណ្តាលបាក់ដួលរលំ និងបែកពោង ក្មេងលោតលេង នេះសំណាងល្អ មិនបង្កឲ្យក្មេងៗ ជាង១០នាក់ កំពុងលោតលេង លើពោងគ្មានគ្រោះថ្នាក់ តែឪពុកម្តាយ ព្រលឹងនៅចុងសក់ ផងដែរ។

បើតាមសំដីរបស់ឈ្មោះ សាន ស៊ីម ជាប្តីនោះ បាននិយាយប្រាប់ថា មុនពេលកើតហេតុ រូបគេបានស៊ីការ មិត្តភ័ក្ត្រ ចេញពីស៊ីការ បានបើករថយន្តម៉ាក នីសាន់ណាវ៉ារ៉ា ពណ៌ប្រផេះ ពាក់ស្លាកលេខ ភ្នំពេញ 2A-6906 ដែលខ្លួនទើបតែទិញ នាំស្រីស្នេហ៍របស់គេ ឈ្មោះនាង មុំ ជាស្រីខារ៉ាអូខេ នៅសណ្ឋាគាររុងរឿង ដើរលេងទៅ ភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ លុះពេលត្រឡប់មកវិញ វេលាម៉ោង៧យប់ ថ្ងៃដដែលក៏នាំនាងទៅហូបបាយ នៅផ្សាររាត្រី ស្រាប់តែឃើញប្រពន្ធជិះម៉ូតូ ខ្លួនក៏ឈប់ ពេលនោះស្ត្រីជាប្រពន្ធ បានវាយប្រតប់គ្នាជាស្រីស្នេហ៍ របស់ខ្លួន ប៉ះនឹងចង្កឹះលេខ ខ្លួនភ័យផងនោះ ក៏ច្រឡំជាន់ហ្គែរ ថែមទៀត។

ស្ត្រីរងគ្រោះ បើតាមការពិនិត្យ ពីលោកគ្រូពេទ្យ បាននិយាយថា ជនរងគ្រោះបានបាក់ជំនី ទាំងអស់ ផ្នែកខាងឆ្វេងបណ្តាល ឲ្យរងរបួសធ្ងន់ រហូតដល់ស្លាប់ ដែលគ្រូពេទ្យ មិនអាចជួយសង្គ្រោះបាន។

មន្ត្រីនគរបាលចរាចរណ៍ខេត្ត បានបញ្ជាក់ថា បុរសជាប្តី ត្រូវបាននាំមកសួរ នៅការិយាល័យចរាចរណ៍ ជើងគោកខេត្ត និងកំពុងរៀបចំសំណុំរឿង បញ្ជូនខ្លួនទៅ សាលាដំបូងខេត្ត ដើម្បីចាត់ការ តាមនិតិវិធីច្បាប់៕