បន្លំលួចលុយ ចំផ្ទះមាន កាមេរ៉ាសុវត្ថិភាព បានតែ១ថ្ងៃ សមត្ថកិច្ចក្របួចជាប់

បន្លំលួចលុយ ចំផ្ទះមាន កាមេរ៉ាសុវត្ថិភាព បានតែ១ថ្ងៃ សមត្ថកិច្ចក្របួចជាប់

ខេត្តព្រៃវែង ៖ ជនសង្ស័យជាមុខសញ្ញា ក្រុមកាច់សោ.កម៉ូតូ ដ៏សកម្មម្នាក់ ត្រូវសមត្ថកិច្ចឃាត់ខ្លួនបាន បន្ទាប់ពីធ្វើសកម្មភាព ចូលលួចលុយ ក្នុងផ្ទះអាជីវកម្នាក់ នៅស្រុកស្វាយជ្រំ ខេត្តស្វាយរៀង ដោយយកលុយ បានជិត៧លានរៀល ប៉ុន្តែត្រូវកាមេរ៉ាសុវត្ថិភាព របស់ម្ចាស់ផ្ទះថតជាប់ ក្របួចជនសង្ស័យបានតែម្តង ។

ជនសង្ស័យឈ្មោះ ផាត់ ផាត ហៅប្រេស៊ីល ភេទប្រុស អាយុ២៣ឆ្នាំ ធ្វើសកម្មភាព ចូលទៅបន្លំលួចលុយ ក្នុងផ្ទះអាជីវករម្នាក់ ឈ្មោះ ចេវ សុវត្ថា ភេទប្រុស អាយុ៤៥ឆ្នាំ នៅភូមិព្រែកទប់ ឃុំស្វាយជ្រំ ស្រុកស្វាយជ្រំ ខេត្តស្វាយរៀង កាលពីវេលាម៉ោង០៩ និង៣៥នាទីព្រឹក ថ្ងៃទី១៧ កុម្ភៈ ។

ប៉ុន្តែជាអកុសល ឬចាត់ទុកថា ជាថ្ងៃអស់លក្ខណ៍ របស់ជនសង្ស័យ ព្រោះចូលលួចចំផ្ទះ ដែលមានដាក់កាំមេរ៉ាសុវត្ថិភាព ខណៈម្ចាស់ផ្ទះដឹងថា បាត់លុយអស់ ជាច្រើនលាន ទើបបើកមើលកាមេរ៉ា ក៏ឃើញពីសកម្មភាព របស់ជនសង្ស័យ ពេលដែលបន្លំចូល ទៅលួចយកលុយនោះ ទើបដាក់ពាក្យប្តឹង ទៅសមត្ថកិច្ចប៉ុស្តិ៍រដ្ឋបាល ឃុំស្វាយជ្រំ ឲ្យតាមរកចាប់ខ្លួន ជនសង្ស័យតែម្តង ។

បន្ទាប់ពីសមត្ថកិច្ច ស្រុកស្វាយជ្រំ ស្រាវជ្រាវដឹងថា ជនសង្ស័យឈ្មោះ ផាត់ ផាត ក៏បានទាក់ទង មកអធិការដ្ឋាននគរបាល ស្រុកកំពង់ត្របែក សុំការសហការ តាមរកចាប់ខ្លួន ជនសង្ស័យបាន កាលពីវេលាម៉ោង ៨ព្រឹក ថ្ងៃទី១៨ កុម្ភៈ ដោយប្រើប្រាស់ រូបភាពពីក្នុងកាមេរ៉ា តាមរកជនសង្ស័យ នៅចំណុចព្រៃស្នួល ក្នុងឃុំគោខ្ចក ស្រុកកំពង់ត្របែក ហើយនាំខ្លួន មកកាន់អធិការដ្ឋាន នគរបាលស្រុក កសាងសំណុំរឿង និងប្រគល់ជនសង្ស័យ ទៅអោយសមត្ថកិច្ច ស្រុកស្វាយជ្រំ ខេត្តស្វាយរៀង ចាត់ការបន្ត ៕