ដឹងថា ក្រុមកំប្លែងមួយណាមានក្រមសីលធម៌វិជ្ជាជីវៈល្អជាងគេពេលសម្ដែងលើឆាក?

ដឹងថា ក្រុមកំប្លែងមួយណាមានក្រមសីលធម៌វិជ្ជាជីវៈល្អជាងគេពេលសម្ដែងលើឆាក?

មានក្រុមកំប្លែងជាច្រើនក្នុងប្រទេសកម្ពុជាក្រុមកំប្លែងខ្លះទទួលបានការកោតសរសើរពីមហាជនថាគោរពវិជ្ជាជីវៈបានល្អពេលសម្ដែងលើឆាក ហើយក៏មានក្រុមកំប្លែងខ្លះទៀតទទួលរងការរិះគន់ពីទស្សនិកជនផងដែរថានិយាយស្ដីមិនសមរម្យធ្វើឱ្យប៉ះពាល់ដល់សង្គមជាដើម។ ចុះប្រិយមិត្តវិញគិតថាក្រុមកំប្លែងមួយណាមានក្រមសីលធម៌ជាងគេពេលសម្ដែងលើឆាកម្ដងៗ?

ថ្ងៃនេះ Sabay សូមលើកយកក្រុមកំប្លែងចំនួន ៥ មកឱ្យទស្សនិកជនផ្ដល់ពិន្ទុជុំវិញការគោរពវិជ្ជាជីវៈបានល្អពេលសម្ដែងជូនមហាជនលើកញ្ចក់ទូរទស្សន៍ ក៏ដូចជាតាមបណ្ដាខេត្តជាដើម។ ក្រុមកំប្លែងទាំង ៥ នោះ រួមមាន ក្រុមកំប្លែងរបស់ នាយ កុយ ក្រុមនាយ ក្រឹម ក្រុមកំប្លែង CTN មាននាយ ពែកមីជាប្រធាន ក្រុមកំប្លែងនាយ វីតាមីនសេ និងក្រុមកំប្លែងនាយ ខ្ជឹប។

ក្រុមកំប្លែងនាយ កុយ ជាក្រុមកំប្លែងមួយទទួលបានការគាំទ្រពីមហាជនទូទៅក្នុងប្រទេសកម្ពុជាបន្ទាប់ពីបង្កើតឡើងក្នុងឆ្នាំ២០០៥។ ដើមឡើយនាយ កុយ ចាបដៃនឹងនាយ ក្រឹម ដើម្បីបង្កើតក្រុមកំប្លែងមួយដោយមានការចាប់អារម្មណ៍ជាច្រើនពីទស្សនិកជន ប៉ុន្តែក្រោយមកពួកគេក៏បែកបាក់គ្នាវិញ ហើយទៅបង្កើតក្រុមរៀងៗខ្លួន។

បច្ចុប្បន្នក្រុម នាយ កុយ សម្ដែងនៅតាមបណ្ដាស្ថានីយទូរទស្សន៍មួយចំនួនដូចជា ទូរទស្សន៍អាស៊ីអាគ្នេយ៍ បាយ័ន ហង្សមាស ជាដើម។ សមាជិកក្នុងក្រុមកំប្លែងនេះមានដូចជានាយ កុយ ជាប្រធានក្រុម នាយសានម៉ៅ អ្នកនាងគ្រត នាយ ហុងដា តាចេក នាយឃ្លោក អ្នកនាងប្រិមប្រិយ នាយក្រិន យាយខ្លី កាតុបអើត។

ងាកទៅរកក្រុមកំប្លែងនាយ ក្រឹម វិញ បន្ទាប់ពីបែកបាក់ពីនាយ កុយលោកក៏បានបង្កើតក្រុមកំប្លែងថ្មីមួយផងដែរក្រោមការដឹកនាំរបស់ខ្លួន។ ក្រុមកំប្លែងនាយ ក្រឹមក៏ទទួលបានការគាំទ្រពីទស្សនិកជនផងដែរទាក់ទងទៅនឹងសិល្បៈនៃការសម្ដែង។ បច្ចុប្បន្នក្រុមកំប្លែងមួយនេះកំពុងសម្ដែងនៅស្ថានីយទូរទស្សន៍ បាយ័ន ហង្សមាស និងទូរទស្សន៍មួយចំនួនទៀត។ សមាជិកក្នុងក្រុមមានដូចជា នាយក្រឹម ជាប្រធាន នាយក្ដឹប យាយយ៉យ យាយ អឿន នាងព្រលិត នាយឆ្លាំង អាចយ នាង លន់ ដាណេ និងតារាមួយចំនួនទៀត។

ដោយឡែកក្រុមកំប្លែង CTN មានលោក សុវណ្ណរិទ្ធី ហៅ តាវ៉ិចទ័រ ជាអ្នកដឹកនាំបង្កើតឡើងដោយស្ថានីយទូរទស្សន៍នេះផ្ទាល់ក្នុងឆ្នាំ២០០៩ ដើម្បីបម្រើដល់អារម្មណ៍ប្រិយមិត្តអ្នកស្ដាប់។ ក្រុមកំប្លែងដែលមាននាយ ពែកមីជាប្រធានកំពុងតែទទួលបានការចាប់អារម្មណ៍ជាខ្លាំងពីទស្សនិកជន។ ក្រុមកំប្លែងនេះមិនសម្ដែងនៅស្ថានីយទូរទស្សន៍ផ្សេងទេគឺជាកម្មសិទ្ធិផ្ដាច់មុខរបស់ CTN។ សមាជិកក្នុងក្រុមកំប្លែងនេះរួមមាននាយ ពែកមីជាប្រធាន នាងខ្ញុង នាយគ្រឿន នាយក្រូច នាយ តាក់ស៊ី នាយប៊ូម នាងអ៊ិត នាងភីម នាយចើម កញ្ញា នីឡា តាស្លេក និងយាយ តយ។

ចំណែកឯក្រុមកំប្លែងនាយ វីតាមីនសេ វិញដើមឡើយជ្រកក្រោមការដឹកនាំរបស់នាយ ក្រឹម ប៉ុន្តែក្រោយមកបានបំបែកជាក្រុមមួយទៀតដែលមានតា វីតាមីនសេ ជាប្រធានក្រុម។ បច្ចុប្បន្នក្រុមកំប្លែងមួយនេះកំពុងសម្ដែងតាមបណ្ដាស្ថានីយទូរទស្សន៍ក្នុងស្រុកមួយចំនួនដូចជា ទូរទស្សន៍បាយ័ន និងស្ថានីយទូរទស្សន៍ប៉ុស្ថិ៍កលេខ៥។ សមាជិកក្នុងក្រុមនេះមានដូចជា នាយ វីតាមីនសេ ជាប្រធាន នាយស៊ីត្រូ នាយសង់ ស៊ីស យាយណាង នាយសេត នាយស្វិត នាយឆើត នាយតឹង នាងបុទុម និង នាង ប៉េងប៉ោង ជាដើម។

និយាយពីក្រុមកំប្លែងនាយ ខ្ជឹប ឯណោះវិញ ក្រុមនេះបង្កើតឡើងក្នុងឆ្នាំ ២០០៥ ដោយទទួលបានការចាប់អារម្មណ៍ជាខ្លាំងផងដែរពីមហាជនខ្មែរ។ ក្រុមកំប្លែងមាននាយ ខ្ជឹប ជាប្រធានកំពុងសម្ដែងនៅតាមស្ថានីយទូរទស្សន៍មួយចំនួនដូចជា ទទក ហង្សមាស។ សមាជិកក្នុងក្រុមមានដូចជា នាយ ខ្ជឹប នាយ គ្រួច នាយ តឹង នាងប៉ុមពុយ នាយ វ៉េវ នាយ កាត្រប់ និងតារាកំប្លែងមួយចំនួនទៀត។

ប្រភព Sabay

មុន បន្ទាប់

មតិយោបល់