ព្រៃផ្សៃណាស់ ! វ៉ៃឡើងជាំក្រហមដូចភ្លើងពេញខ្លួនប្រាណ

ព្រៃផ្សៃណាស់ ! វ៉ៃឡើងជាំក្រហមដូចភ្លើងពេញខ្លួនប្រាណ

ខេត្តកណ្ដាល ៖ ប្អូនប្រុសចិត្តអន្យតិរ្ថិយម្នាក់ ត្រូវបានសមត្ថកិច្ចចាប់ខ្លួន កាលពីម៉ោង៦ និង៣០នាទីព្រឹក ថ្ងៃទី១១ ខែសីហា ឆ្នាំ២០១៦ បន្ទាប់ពីបានប្រើចម្រៀកអុសវាយបងស្រីរបស់ខ្លួនឥតប្រណីដៃ ឡើងជាំក្រហមដូចភ្លើងពេញខ្លួនប្រាណ ដែលហេតុការណ៍នេះកើតឡើងនៅ ភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល ។

មន្ត្រីនគរបាលបានឱ្យដឹងថា ប្អូនប្រុសចិត្តអន្យតិរ្ថិយឥតមេត្តា ដែលត្រូវបានឃាត់ខ្លួនឈ្មោះ រ៉ុង សារ៉ុម ហៅ ពិសី ភេទប្រុស អាយុ៣២ឆ្នាំ ជនជាតិខ្មែរនៅភូមិកើតហេតុ មុខរបរ មិនពិតប្រាកដ ។ ចំណែកនារីរងគ្រោះជាបងស្រីឈ្មោះ រ៉ុង ណារី ហៅ ច្រេវ ភេទស្រី អាយុ៣៨ឆ្នាំ ជនជាតិខ្មែរ ជាមនុស្សវិកលចរិត ។

នគរបាលបានឱ្យដឹងបន្ថែមថា នៅពេលកើតហេតុនារីរងគ្រោះ បានទារលុយ៥ពាន់រៀលពីឈ្មោះ រ៉ុង សារ៉ុម ជាប្អូន ពេលនោះ ឈ្មោះ សារ៉ុម ប្រាប់ថា លុយយកទិញសាច់គោអាំងហូប ជាមួយគ្នាអស់ហើយ ។ ចំណែកឈ្មោះ រ៉ុង ណារី មិនជឿនៅតែទាមទារលុយដដែលៗ ពេលនោះ ឈ្មោះ សារ៉ុម ជាប្អូនបានខឹងយ៉ាងខ្លាំងក៏យកអង្កត់អុសវាយខ្នង និងដៃ និងវាយជើងឈ្មោះ ណារី ជាច្រើនអង្កត់អុស បណ្ដាលឲ្យជាំពេញខ្លួនប្រាណ ។

ពេលទទួលបានព័ត៌មានភ្លាម សមត្ថកិច្ចនគរបាលប៉ុស្ដិ៍បាន ចុះអន្តរាគមន៍ដល់កន្លែងកើតហេតុ និងធ្វើការឃាត់ខ្លួនជនសង្ស័យ បញ្ជូនមកអធិការដ្ឋាននគរបាល ស្រុកស្អាង ដើម្បីធ្វើការសាកសួរ ។

សមត្ថកិច្ចបញ្ជាក់ថា ជនសង្ស័យនេះតែងតែប្រើ អំពើហិង្សាលើនារីរងគ្រោះ ជាញឹកញាប់ និងធ្លាប់ប្រើប្រាស់ គ្រឿងញៀនទៀត ទើបនគរបាលស្រុកស្អាង ចាប់ខ្លួនក៏សាងសំណុំរឿងចាត់ការ បន្តតាមនីតិវិធីច្បាប់ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត ក្មេងស្រីគួរឱ្យអាណិតម្នាក់ ត្រូវបានជីដូនបង្កើតវាយដំរហូតដល់បែកក្បាល ព្រមទាំងមានស្នាមជាំពេញមុខមាត់ និងដងខ្លួន។ ករណីនេះបានកើតឡើងនៅថ្ងៃទី២២ ខែកក្កដា ឆ្នាំ២០១៦ កន្លងទៅ ស្ថិតនៅផ្ទះលេខ១៣ ម្ដុំរោងចក្របីជាន់ សង្កាត់ចោមចៅ ខណ្ឌពោធិ៍សែនជ័យ។

សមត្ថកិច្ចបានឱ្យដឹងថា ក្មេងស្រីរងគ្រោះមានឈ្មោះ ជីង អាយុ៦ឆ្នាំ បានរស់នៅជាមួយជីដូនតាំងពីនៅតូច ព្រោះម្ដាយរបស់គេ បែកទៅមានគ្រួសារថ្មី រយៈពេល២-៣ឆ្នាំហើយ ហើយក្មេងស្រីម្នាក់នេះ ត្រូវបានជីដូនចិត្តកំណាច ឃុំខ្លួន និងធ្វើទារណ្ឌកម្មជាច្រើនឆ្នាំមកហើយដែរ។

សមត្ថកិច្ចបានបន្ថែមថា បន្ទាប់ពីទទួលបានដំណឹងភ្លាម កម្លាំងនគរបាលសង្កាត់ចោមចៅ បានចុះទៅដល់កន្លែងកើតហេតុផ្ទាល់ ដើម្បីធ្វើបញ្ឈប់ និងសាកសួររឿងហេតុ ដើម្បីធ្វើការណែនាំឱ្យគាត់បញ្ឈប់អំពើហិង្សានេះ ទៅថ្ងៃក្រោយ៕

ខ្មែរឡូត

មុន បន្ទាប់

មតិយោបល់