គួរឲ្យអាសូរ! ក្មេងប្រុស៤នាក់នាំគ្នាទៅហែលទឹកលេង មានម្នាក់កើតជម្ងឺឆ្កួតជ្រូកលង់ស្លាប់ នៅស្រុកស្វាយចេក

គួរឲ្យអាសូរ! ក្មេងប្រុស៤នាក់នាំគ្នាទៅហែលទឹកលេង មានម្នាក់កើតជម្ងឺឆ្កួតជ្រូកលង់ស្លាប់ នៅស្រុកស្វាយចេក

(បន្ទាយមានជ័យ)៖ ក្មេងប្រុស៤នាក់ នៅរសៀលថ្ងៃទី២៦ ខែសីហា ឆ្នាំ២០១៦ បាននាំគ្នាទៅហែលទឹកលេង ស្រាប់តែមានក្មេងប្រុសម្នាក់ កើតជម្ងឺឆ្កួតជ្រូក ឫស្កាន់ជ្រូក ក៏ប្រកាច់នៅក្នុងទឹកបណ្តាលឲ្យលង់ទឹកស្លាប់នៅចំណុចស្រះក្រពាំងខ្ទុម ខាងត្បូងភូមិតាគល់ ឃុំផ្គាំ ស្រុកស្វាយចេក ខេត្តបន្ទាយមានជ័យ។

សមត្ថកិច្ចមូលដ្ឋានបានឲ្យដឹងថា ករណីលង់ទឹកស្លាប់ក្មេងប្រុសម្នាក់នេះ កើតឡើងដោយសារតែមានជម្ងឺស្កាន់ជ្រូក ទើបបណ្តាលឲ្យលង់ទឹកតែម្តង។

សមត្ថកិច្ចបន្តថា មុនកើតហេតុ ក្មេងៗមកហែលទឹក គ្នីគ្នាចំនួន៤នាក់ ហែលមិនបានប៉ុន្មានផងស្រាប់តែ បាត់គ្នាម្នាក់ ភ្លាមនោះក្មេងៗក៏ហៅម្តាយឪពុកបងប្អូនមកជួយរក ។

ក្មេងប្រុសរងគ្រោះឈ្មោះភួយ សាក់ អាយុ១២ឆ្នាំសាកសពសមត្ថកិច្ចបានប្រគល់អោយបងប្អូនធ្វើបុណតាមប្រពៃណី៕

ប្រភព ៖ Freshnews

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន ក្មេងៗមួយក្រុមមានគ្នា៣នាក់ បានទៅងូតទឹករណ្តៅ ដែលមានជម្រៅ២,៥០ម៉ែត្រ និងទទឹង៤ម៉ែត្រសម្រាប់ជីកដាក់លូ លេងយ៉ាងសប្បាយ តែគួរឲ្យសង្វេគ ដោយ២នាក់បានលង់ស្លាប់ និងម្នាក់ទៀតមិនបានចុះទៅងូតនោះទេ ។ ហេតុការណ៍នេះកើតឡើងនៅវេលាម៉ោង១២និង១០នាទីថ្ងៃត្រង់ ទី២២ ខែសីហា ឆ្នាំ២០១៦ ស្ថិតនៅភូមិស្រឡប់ ឃុំស្រឡប់ ស្រុកត្បូងឃ្មុំ ពិតជាសង្វេគដោយត្រូវបានឪពុកម្តាយ ស្រែកយំទួញសោកអាណិតកូនជាពន់ពេក។

លោកវរសេនីយ៏ត្រី ឡុង សារិន អធិការរងនគរបាលស្រុកត្បូងឃ្មុំ ប្រាប់ឲ្យដឹងថា ដំបូងក្មេង៣នាក់ក្នុងនោះមាន ១-ឈ្មោះ ហាន លីហួន អាយុ៨ឆ្នាំ ២-ឈ្មោះ ចិត ចេម អាយុ១២ឆ្នាំ ៣-ឈ្មោះ ឈាង ពន្លក អាយុ១២ឆ្នាំ ទាំងអស់គ្នារស់នៅភូមិឃុំកើតហេតុខាងលើ បានចេញពីផ្ទះដោយមិនឲ្យ ឪពុកម្តាយដឹងនោះទេ ដើម្បីមកងូតទឹកលេងសប្បាយ ។

លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំ ប្រាប់បន្តថា ចំពោះទីតាំងដែលក្មេងនាំគ្នា លេងស្ថិតនៅទីតាំង ដែលត្រូវសាងសង់សាលាខេត្តត្បូងឃ្មុំថ្មី ក្នុងពេលដែលមកដល់កន្លែងទឹកក្មេងប្រុសទី១ និងទី២ បាននាំគ្នាលោតចុះទៅលេងនឹកស្មានតែទឹករាក់ តាមពិតជ្រៅ ក្រោយពីលោតមិនបានឃើញ ផុសមកវិញទាល់តែសោះ ទើបក្មេងប្រុសទី៣ដឹងថា ប្រាកដជាលង់ទឹកហើយ ក៏ប្រញាប់រត់មកផ្ទះវិញប្រាប់ចាស់ៗនៅក្នុងភូមិ ឲ្យនាំគ្នាទៅជួយសង្គ្រោះ។

តែអ្វីៗបានហួសពេលទៅហើយ ដោយចម្ងាយផ្លូវទៅវិញទៅមកជាង៣០០ម៉ែត្រ គឺក្មេងប្រុសទាំង២នាក់នោះបានស្លាប់បាត់នៅក្នុងរណ្តៅទឹកជម្រៅជាង២ម៉ែត្រ។

ក្រោយពីស្រង់បានជាបន្តបន្ទាប់មក ឪពុកម្តាយបាននាំគ្នាស្រែកទ្រហោយំទួញសោកអាណិតដល់កូនជាខ្លាំង ហើយបាននាំគ្នាសែងយកមកផ្ទះ និងត្រូវបានកម្លាំងនគរបាលប៉ុស្ដិ៍ ទៅពិនិត្យសពក្មេងទាំង ២នាក់គឺពិតជាបានស្លាប់ ដោយលង់ទឹកពិតប្រាកដមែន។

លោកវរសេនីយ៏ត្រី ឡុង សារិន អធិការរងនគរបាលស្រុកត្បូងឃ្មុំ បញ្ជាក់ថា នាពេលកន្លងមកក្មេងទាំង៣នាក់ខាងលើ មិនដែលនាំគ្នាមកងូតទឹក លេងនៅត្រង់ចំណុចកន្លែងដាក់ប្រព័ន្ធលូនេះទេ តែមកដល់វេលាថ្ងៃត្រង់ទី២២ ខែសីហានេះ ទើបនាំគ្នាមកងូតទឹកលេងក៏ជា ហេតុបណ្តាលឲ្យលង់ស្លាប់២នាក់តែម្តង៕

ខ្មែរឡូត

មុន បន្ទាប់

មតិយោបល់