អាមេរិក៖ ការសិក្សាស្រាវជ្រាវមួយធ្វើឡើងនៅសហរដ្ឋអាមេរិក បានបង្ហាញថា ការបំបៅកូនក្នុងរយៈពេលយ៉ាងហោចណាស់ ៦ខែ អាចធ្វើឲ្យស្ត្រីជាអ្នកម្តាយ ចៀសឆ្ងាយពីជំងឺទឹកនោមផ្អែមក្នុងកម្រិតភាគរយដ៏ខ្ពស់។

ការសិក្សានេះ ត្រូវបានបោះពុម្ភដោយ JAMA Internal Medicine ដែលក្នុងនោះ ស្ត្រីសញ្ជាតិអាមេរិកប្រមាណជាង ១២០០ នាក់ ត្រូវបានគេយកមកចូលរួមសិក្សា។  

អ្នកស្រី Erica Gunderson ជាអ្នកស្រាវជ្រាវមួយរូបបានឲ្យដឹងថា ស្ត្រីដែលបំបៅដោះកូន​គ្រប់រូប គ្រប់ជាតិសាសន៍ និងពណ៌សម្បុរ សុទ្ធសឹងតែអាចកាត់បន្ថយជំងឺទឹកនោមផ្អែមបានដូចគ្នា។

បើយោងតាមលទ្ធផលនៃការស្រាវជ្រាវខាងលើ បានបង្ហាញថា ការបំបៅកូនរយៈពេលស្មើ ឬច្រើនជាង ៦ខែ ធ្វើឲ្យលទ្ធភាពនៃការកើតជំងឺទឹកនោមផ្អែមប្រភេទ២ ធ្លាក់ចុះរហូតដល់ទៅ ៤៧ភាគរយឯណោះ បើប្រៀបធៀបទៅនឹងស្ត្រីឯទៀត ដែលពុំបានបំបៅកូនសោះ។

អ្នកស្រាវជ្រាវបានឲ្យដឹងទៀតថា រាល់ការបំបៅម្តងៗ វាធ្វើឲ្យប្រព័ន្ធការពារជំងឺទឹក​នោម​​ផ្អែមចាប់ផ្តើមដំណើរការ តាមរយៈការបញ្ចេញអរម៉ូនម្យ៉ាង (អាំងស៊ុយលីន) ដែលមានតួនាទីតម្រូវជាតិស្ករ(គ្លុយកូស) នៅក្នុងឈាម។

គួរឲ្យដឹងថា តាមរយៈការស្រាវជ្រាវកន្លងមក ក៏បានបង្ហាញផងដែរថា ការបំបៅកូនដោយផ្ទាល់ មិនត្រឹមតែជួយកាត់បន្ថយជំងឺទឹកនោមផ្អែមប៉ុណ្ណោះទេ ថែមទាំង​ជួយ​ការពារពីជំងឺមហាសុដន់ និងអូវែផងដែរ៕