កូរ៉េខាងត្បូង៖ ដំណឹងដ៏គួរឲ្យភ្ញាក់ផ្អើលសម្រាប់អ្នកគាំទ្រវិស័យKpop ដោយកាលពីរសៀលនេះ តារាចម្រៀងប្រុសល្បីឈ្មោះ Chen សមាជិកក្រុម EXO បានប្រកាសថាខ្លួននឹងចូលរោងការជាមួយនឹងមិត្តស្រីជាទីស្រលាញ់របស់លោក ក្នុងពេលឆាប់ៗខាងមុខនេះហើយ។

ជាការពិតណាស់​នេះ បើយោងតាមការលើកឡើងរបស់ Chen បានឲ្យដឹងថា លោកជាមួយនឹងមិត្តស្រីមិនមែនជាតារារបស់លោក នឹងរៀបការជាមួយគ្នាក្នុងពេលឆាប់ៗនេះ ហើយជាពិសេសបច្ចុប្បន្ននេះ លោកនិងមិត្តស្រីរបស់លោក ក៏កំពុងតែមានកូនជាមួយគ្នាថែមទៀតផងដែរ។

តួយ៉ាង ក្រោយពីឮដំណឹងនេះ ក៏បានធ្វើឲ្យមហាជនគ្រប់គ្នាមានការភ្ញាក់ផ្អើលជាខ្លាំង ហើយពួកគេក៏មានចូលរួមអបអរសាទរចំពោះ Chen ផងដែរ។

ដោយឡែក អ្វីដែលសឹងតែមិនគួរឲ្យជឿជាងនេះទៅទៀតនោះ គឺគេសង្កេតឃើញថា តម្លៃស្តុករបស់ផលិតកម្ម SM Entertainment ក៏បានលោតឡើងខ្ពស់ជាងមុនរហូតដល់ទៅជា ៩ភាគរយឯណោះ ដែលអាចបញ្ជាក់ថា នេះជាសញ្ញាដ៏ល្អជាទីគប់ចិត្តមួយ ដែលតារាKpop ដ៏ល្បីម្នាក់ប្រចាំក្រុម EXO ប្រកាសថាមានកូន និងកំពុងត្រៀមចូលរៀបការទៅហើយ ក៏អ្នកគាំទ្រមិនបានបញ្ចេញប្រតិកម្មខឹងសម្បារអ្វីឡើយ ប៉ុន្តែពួកគេថែមទាំងបានអបអរសាទរបន្ថែមថែមទៀតផង។ ចំណែកឯតម្លៃស្តុករបស់ផលិតកម្ម ក៏កាន់តែកើនឡើងគួរឲ្យគប់ចិត្តផងដែរ៕