អូស្ត្រាលី៖  ទីក្រុងស៊ីដនីប្រទេសអូស្ត្រាលីបានរងគ្រោះ ដោយសារភ្លៀងធ្លាក់ខ្លាំងបំផុត និងមិនធ្លាប់មាន ក្នុងរយៈពេល៣០ឆ្នាំនេះ​ ដែលនាំមកនូវទឹកជំនន់និងភាពច្របូកច្របល់ ក្នុងការធ្វើដំណើរ។ ទីភ្នាក់ងារអាកាសធាតុរដ្ឋបាននិយាយថា បរិមាណទឹកភ្លៀង៣៩១.៦មីលីម៉ែត្របានបង្អុរ ក្នុងរយៈពេល៤ថ្ងៃមកហើយ និងអាចបង្កជាទឹកជំនន់ ដែលអាចបង្កគ្រោះថ្នាក់ដល់អាយុជីវិត។

ផ្ទះប្រមាណណ១០ម៉ឺនខ្នងគ្មានអគ្គិសនីប្រើប្រាស់។ ប៉ុន្តែភ្លៀងក៏បានជួយពន្លត់ភ្លើងឆេះព្រៃ អស់ជាច្រើនកន្លែង ដែលបានបំផ្លិចបំផ្លាញរដ្ឋ New South Wales ក្នុងប៉ុន្មានខែថ្មីៗនេះ។ ក្នុងចំណោមនោះ ភ្លើងឆេះព្រៃក្នុងតំបន់ Currowan ដែលបានឆេះអស់រយៈពេល៧៤ថ្ងៃ នៅជុំវិញទីក្រុង Shoalhaven បានបំផ្លាញអស់ជិត៥០០,០០០ហិកតានិងផ្ទះ៣១២ខ្នង។

ការិយាល័យឧតុនិយម (BoM) បានព្រមានថា​ តំបន់ដែលបានរងគ្រោះដោយសារភ្លើងឆេះ អាចងាយនឹងជន់លិច ហើយទឹកដែលមានល្បឿនលឿន អាចហូរនាំកម្ទេចកំទីបានច្រើន។ ជំនន់ទឹកភ្លៀងដ៏ធំនេះ ក៏បានបំពេញបន្ថែមនូវការផ្គត់ផ្គង់ទឹក​នៅក្នុងតំបន់ដែលកំពុងប្រយុទ្ធប្រឆាំងនឹងគ្រោះរាំងស្ងួតជាច្រើនឆ្នាំ។ ឥឡូវនេះ ការព្រមានពីអាកាសធាតុដ៏ធ្ងន់ធ្ងរកំពុងកើតមាននៅតាមឆ្នេរនៃរដ្ឋ New South Wales ដែលជារដ្ឋមានប្រជាជនច្រើនបំផុត នៅអូស្ត្រាលី។

នៅស៊ីដនីតែឯង យ៉ាងហោចណាស់មានមនុស្ស២០០នាក់ត្រូវបានសង្គ្រោះ ដោយសេវាកម្មបន្ទាន់ កាលពីចុងសប្ដាហ៍។ មនុស្សជាច្រើនបានរងរបួស ក្នុងនោះមានមនុស្សបួននាក់ ដែលជាប់ខាងក្នុងរថយន្ត ដែលត្រូវដើមឈើរលំសង្កត់ នៅកណ្ដាលទីក្រុង កាលពីរសៀលថ្ងៃអាទិត្យ។ នៅព្រឹកថ្ងៃចន្ទ សេវាកម្មបន្ទាន់កំពុងស្វែងរកបុរសម្នាក់ ដែលគេជឿថា ត្រូវបានធ្លាក់ពីលើស្ពាន ជាមួយរថយន្តរបស់គាត់។ សេវាកម្មផ្លូវដែកនិងសាឡាងនៅស៊ីដនី​ ក៏រងផលប៉ះពាល់ដែរ ហើយសាលារៀនជាច្រើនកន្លែងត្រូវបានបិទទ្វារផងដែរ៕