ហ្វីលីពីន៖ បន្ទាប់​អង្ករ​ក្លែងក្លាយ​បានចរាចរ ក្នុងតំបន់​អាស៊ីមួយ​ចំនួន​ ដែលបានដាស់តឿន ដល់ពិភពលោក ឲ្យប្រុងប្រយ័ត្ន រួចហើយនោះ កាលពីពេល កន្លងមកនេះ​ គុយទាវ​ក្លែង​ក្លាយ​ ក៏​ត្រូវ​គេ​ប្រទះ​ ឃើញ​កំពុង តែដាក់លក់ ​នៅ​ទីក្រុង Davao នៃប្រទេសហ្វីលីពីន វិញម្តង។

រូបភាព គុយទាវក្លែងក្លាយដែលកំពុងចរាចរនៅ ប្រទេសហ្វីលីពីន

យោងតាមប្រភពព័ត៌មានបរទេសមួយ បានឲ្យ​ដឹង​ថា បុរស​ម្នាក់​ឈ្មោះ Gary Gensianos ជនជាតិហ្វីលីពីន បាន​ទិញ​ប៉ះ​ចំ​ គុយទាវ​ក្លែងក្លាយ ដែលបាន ដាក់​លក់​នៅ​លើ​ ទីផ្សារ ​កាល​ថ្ងៃទី ០៣ កក្កដា កន្លងទៅនេះ។ នៅក្នុងនោះ ក៏បានឲ្យដឹងថា រូប​រាង​របស់វា គឺដូច​ជា​គុយទាវ​ធម្មតា​ សូម្បីតែ ក្លិនរបស់វា ក៏មិនស្អុយ នៅពេលដែលចំអិន តែខុសត្រង់ថា វាមានភាព រអិលខ្លាំង ជាងគុយទាវធម្មតា។

គួរបញ្ជាក់ថា នាពេលនេះ គុយទាវ​ក្លែង​ក្លាយនេះ ត្រូវ​បាន​នាំ​យក​ ទៅ​ទីស្នាក់ការ ត្រួតពិនិត្យចំណីអាហារ និងឱសថ ដើម្បី​ធ្វើការ​ ត្រួត​ពិនិត្យ បញ្ជាក់​ថា​ តើវា​មាន​សុវត្ថិភាព ឬអាច​ប៉ះពាល់​ សុខភាពអ្នក បរិភោគយ៉ាងណាដែរ។ ក្នុងករណីដែលការ ត្រួតពិនិត្យទៅ ឃើញ ថាគុយទាវក្លែងក្លាយនេះ​ អាច​ប៉ះ​ពាល់​ ដល់​សុខភាព ឬ​បង្ក​ជា ជំងឺ​ផ្សេងៗ អាជ្ញាធរ​នឹង​ធ្វើការ​ ហាម​ឃាត់​ មិន​ឲ្យ​ ដាក់​លក់​បន្ត ទៀត​នោះទេ។

យ៉ាងណាមិញ ការិយាល័យ​សុខាភិបាល​ក្រុង Davao នឹងធ្វើការ​ឆ្លើយ​តប ក្នុងពេលឆាប់ៗនេះ ទៅលើករណីមួយនេះ ដើម្បីងាយស្រួល ទប់ស្កាត់ និងបង្ការ ការមានជម្ងឺ ដែលកើតឡើង ដោយសារតែ គុយទាវក្លែងក្លាយនេះ។

ចំពោះករណីនេះ គឺជាមេរៀនមួយដល់ប្រជាពលរដ្ឋខ្មែរ ទាំងមូល គួរបង្កើនការ ប្រុងប្រយ័ត្នឲ្យ បានខ្ពស់ មុននឹងទិញ យកមកបរិភោគ ដើម្បីការពារ សុវត្ថិភាព ជាចម្បង៕

ប្រភព៖ បរទេស

ដោយ ឌី

ខ្មែរឡូត