សុខភាព៖ យោងតាមការវិភាគទិន្នន័យ ទៅលើមនុស្សចំនួន ៤៨៥,០០០នាក់ បានឲ្យដឹងថា ការទទួលទានអាហារ ដែលមានរសជាតិហិរ ត្រូវបានផ្សារភា្ជប់ ជាមួយនឹង ការថយចុះ នូវហានិភ័យ នៃការស្លាប់។

អ្នកចូលរួមសិក្សា ចំនួន ៤៨៥,០០០នាក់ នោះ បានចុះឈ្មោះចូលរៀន នៅចន្លោះ ឆ្នាំ២០០៤ និង ២០០៨ នៅក្នុងការសិក្សា ផ្នែកសុខភាព ដ៏ធំមួយ របស់ប្រទេសចិន ដោយក្រុមអ្នកស្រាវជ្រាវ បានតាមដានពួកគេ អស់រយៈពេល ច្រើនជាង៧ឆ្នាំ។ ជាលទ្ធផល មនុស្សចំនួន ២០,២២៤នាក់ បានស្លាប់។

បន្ទាប់ពីការគ្រប់គ្រង ទៅលើប្រវត្តិ អាយុ ការអប់រំ ជំងឺទឹកនោមផ្អែម ការជក់បារី និងអថេរ ជាច្រើនទៀត របស់មនុស្ស ទាំងអស់នោះ ក្រុមអ្នកសិក្សា ក៏បានរកឃើញថា បើប្រៀបធៀប ជាមួយនឹង ការញ៉ាំអាហារហិរ ជាពិសេស គឺម្ទេសហិរ ម្តង ឬពីរដង ក្នុងមួយសប្តាហ៍ នោះនឹងអាចកាត់បន្ថយ នូវហានិភ័យ នៃការស្លាប់ ចំនួន ១០ភាគរយ។

ជាមួយគ្នានេះដែរ ប្រសិនបើទទួលទានអាហារ ដែលមានជាតិហិរ ចាប់ពី ៦ ទៅ ៧ដង នៅមួយសប្តាហ៍ នោះអាត្រាហានិភ័យ នៃការស្លាប់ នឹងកាត់បន្ថយ រហូតដល់ទៅ ១៤ភាគរយឯណោះ។

គួរបញ្ជាក់ផងដែរថា អាត្រានៃជំងឺបេះដូង ជំងឺផ្លូវដង្ហើម និងជំងឺមហារីកទាំងអស់ នឹងត្រូវកាត់បន្ថយ ចំពោះអ្នកទទួលទានអាហារ ដែលមានជាតិហិរ។

យ៉ាងណាមិញ គេសំគាល់ឃើញថា សារធាតុ Capsaicin គឺជាគ្រឿងផ្សំដ៏សំខាន់ នៅក្នុងម្ទេស ដែលត្រូវបាន រកឃើញ នៅក្នុងការសិក្សា មួយផ្សេងទៀត ដែលវាមានឥទ្ធិពល ប្រឆាំងនឹង អុកស៊ីតកម្ម និងការរលាក ផ្សេងៗទៀតផង៕

ប្រភព ៖ បរទេស

ដោយ ៖ ប៊ី

ខ្មែរឡូត