គន្លឹះទំនាក់ទំនង: ស្តាប់ច្រើននឹងបើកជើងមេឃគំនិត

គន្លឹះទំនាក់ទំនង: ស្តាប់ច្រើននឹងបើកជើងមេឃគំនិត

ក្រុមហ៊ុនល្អៗ មានភាពល្បីល្បាញខាងការចេះស្តាប់បុគ្គលិករបស់ខ្លួន។ ភោជនីយដ្ឋាន Brinker International, ភោជនីយដ្ឋាន Chili’s ភោជនីយដ្ឋាន On the Border ភោជនីយដ្ឋាន Romano’s’Macaroni Grill និងភោជនីយដ្ឋានផ្សេងៗទៀត គឺជាភោជនីយដ្ឋាន ដែលមានសេវាកម្មល្អបំផុតក្នុងប្រទេស។ នេះបើយោងតាម ទស្សនាវត្តី Restaurants and Institutions។ ស្ទើរតែ ៨០ភាគរយនៃអាហារក្នុងបញ្ជីឈ្មោះអាហារទាំងអស់របស់ភោជនីយដា្ឋនទាំងនោះ ត្រូវអ្នកគ្រប់គ្រងតែមួយរូបគត់ធ្វើការផ្តល់យោបល់ឲ្យជ្រើសរើសមក។

អ្វីដែលល្អសម្រាប់ក្រុមហ៊ុនដ៏ជោគជ័យនានា ក៏ល្អសម្រាប់បុគ្គលម្នាក់ៗដែរ។ នៅពេលដែលអ្នកតែងតែស្តាប់អ្នកដទៃ អ្នកមិនដែលខ្វះគំនិតឡើយ។ មនុស្សយើង ចូលចិត្តការចូលរួមចំណែក ជាពិសេសនៅពេលដែលមេដឹកនាំរបស់ពួកគេចេះចែករំលែកគុណសម្បត្តិជាមួយពួកគេ។ ប្រសិនបើ អ្នកផ្តល់ឱកាសឲ្យអ្នកដទៃចែករំលែកគំនិតរបស់ពួកគេ ហើយអ្នកស្តាប់ពួកគេដោយបើកចំហចិត្តនោះ ពួកគេនឹងមានគំនិតដូចទឹកហូរមិនចេះចប់មិនចេះហើយឡើយ។ ទោះបីជាគំនិតនោះ មិនល្អក៏ដោយ អ្នកគ្រាន់តែស្តាប់ទៅ នោះទាំងអ្នកនិងពួកគេអាចមានគំនិតថ្មីៗកើតឡើង។ អ្នកមិនដឹងទេថាតើគំនិតដែលល្អៗនៅជិតអ្នកប៉ុណ្ណានោះទេ ប្រសិនបើអ្នកមិនមានឆន្ទៈក្នុងការស្តាប់នោះ។

ការស្តាប់ សាងភាពស្មោះត្រង់
រឿងដ៏គួរឲ្យអស់សំណើចកើតឡើង នៅពេលដែលអ្នកមិនហាត់ស្តាប់អ្នកដទៃនោះ។ ពួកគេនឹងស្វែងរកអ្នកដទៃដែលនឹងស្តាប់ពួកគេ។ គ្រប់ពេលដែលបុគ្គលិក ប្តីប្រពន្ធ អ្នករួមការងារ កូនៗ ឬក៏មិត្តភក្តិជឿថា អ្នកដែលពួកគេនិយាយទៅរក ឈប់ស្តាប់ពួកគេហើយនោះ ពួកគេនឹងស្វែងអ្នកដទៃដែលនឹងស្តាប់ពួកគេ។ រឿងនេះ ជួនកាលអាចបណ្តាលឲ្យបាត់បង់មិត្តភាព ខ្វះអំណាចក្នុងការគ្រប់គ្រងក្នុងការងារ ឥទ្ធិពលជាឪពុកម្តាយថយចុះ ឬការលែងលះគ្នាកើតឡើងបាន។

ម្យ៉ាងវិញទៀត ការអនុវត្តជំនាញនៃការស្តាប់បានល្អ អាចទាក់ទាញមនុស្សមកកាន់អ្នកបាន។ អ្នកគ្រប់គ្នា ស្រលាញ់អ្នកដែលពូកែស្តាប់ និងចាប់អារម្មណ៍នឹងពួកគេ។ ប្រសិនបើ អ្នកតែងតែស្តាប់អ្នកដទៃ ឲ្យតម្លៃដល់ពួកគេនិងអ្វីដែលពួកគេនិយាយនោះ ពួកគេទំនងជាបង្កើនភាពស្មោះត្រង់ដ៏មុតមាំជាមួយអ្នក។

ការស្តាប់ គឺជាវិធីដ៏អស្ចារ្យក្នុងការជួយអ្នកដទៃនិងខ្លួនអ្នកផ្ទាល់
លោក Roger G. Imhoff បានមានប្រសាសន៍ថា “ចូរអនុញ្ញាតឲ្យអ្នកដទៃ និយាយដោយភាពជឿជាក់នឹងអ្នកផង។ វាប្រហែលជាមិនជួយអ្វីដល់អ្នកទេ ប៉ុន្តែវានឹងជួយអ្នកដទៃ”។ ប្រសិនបើយើងគិតតែបន្តិច យើងឃើញថា ការស្តាប់អ្នកដទៃ ផ្តល់អត្ថប្រយោជន៍ដល់តែពួកគេនោះទេ។ ប៉ុន្តែ នៅពេលដែលអ្នកក្លាយជាអ្នកដែលពួកែស្តាប់ អ្នកកំពុងតែជួយខ្លួនឯងផងដែរ។ អ្នកមានសមត្ថភាពក្នុងការបង្កើនទំនាក់ទំនងឲ្យកាន់តែរឹងមាំ ប្រមូលព័ត៌មានមានតម្លៃ និងបង្កើនការយល់ដឹងអំពីខ្លួនឯងនិងអ្នកដទៃ៕

ប្រភព៖ Health.com.kh

មុន បន្ទាប់

មតិយោបល់