ខាងណាខុស ខាងណាត្រូវជុំវិញរឿង ព្រាប សុវត្ថិ ប្តឹងបិទ Concert សិរីមន្ត នៅស្ទឹងត្រែង

ខាងណាខុស ខាងណាត្រូវជុំវិញរឿង ព្រាប សុវត្ថិ ប្តឹងបិទ Concert សិរីមន្ត នៅស្ទឹងត្រែង

លោក ព្រាប សុវត្ថិ តារាចម្រៀងរបស់ផលិតកម្មហង្សមាស បានប្តឹងឲ្យបិទការប្រគំតន្ត្រីមួយនៅខេត្តស្ទឹងត្រែងជាទីដែលលោក ខេមរៈ សិរីមន្ត ត្រូវឡើងច្រៀងកាលពីចុងខែមីនា។ ប្រតិកម្មបិទការប្រគំតន្ត្រីរបស់តារាចម្រៀងរូបនេះ កើតចេញពីការមិនសុខចិត្ត របស់លោក ព្រាប សុវត្ថិ ជាមួយនឹងបដាផ្សព្វផ្សាយរបស់ក្រុមហ៊ុន Smart រចនាដាក់រូបលោកពីក្រោម និងតូចជាងលោក សិរីមន្ត ខណៈលោក យល់ថា លោកល្បីជាងតារាចម្រៀងសាន់ដេរូបនេះ។

ជាមួយនឹងប្រតិកម្មរបស់លោក ព្រាប សុវត្ថិ ប៉េអឹមខេត្តស្ទឹងត្រែងដឹកនាំដោយ លោក អៀង វណ្ឌី បានចុះទៅរុះរើ នឹងបញ្ជាឲ្យបិទកម្មវិធីតន្ត្រីខាងលើយ៉ាងតក់ក្រហល់ មុនពេលបើកដំណើរការឡើងវិញក្រោមកិច្ចអន្តរាគមន៍ពីអភិបាលខេត្ត។ នេះបើតាមការចុះផ្សាយរបស់សារព័ត៌មានក្នុងស្រុកមួយ ដោយគេបានដកស្រង់សំដីរបស់លោក មុនីវណ្ណ អ្នកគ្រប់គ្រងឆាក ភ្លើង ភ្លេង SL ។

យោងតាមសំដី អ្នកគ្រប់គ្រងរូបនេះដដែល សារព័ត៌មាននោះរាយការណ៍បន្តថា រឿងរ៉ាវដែលលោក ព្រាប សុវត្ថិ កើតទុកមិនសុខចិត្តចំពោះការដាក់រូបលោកពីក្រោម និងតូចជាងលោក សិរីមន្ត នេះ មិនមែនទើបលើកទីមួយទេ ប៉ុន្តែកើតឡើងពីរបីដងមកហើយ ប៉ុន្តែក្រុមហ៊ុនខាងទូរសព្ទចល័ត ចេះតែអត់ធ្មត់។

លោក បន្តថា កាលនៅបាត់ដំបង និងព្រៃវែង ដោយប្រកាន់យកហេតុផលខាងលើ លោក ព្រាប សុវត្ថិ ង៉ិកង៉ក់មិនព្រមឡើងឆាកច្រៀងទៀតផង ប៉ុន្តែបានលោកអង្វរសុំកុំឲ្យប្រកាន់ និងពន្យល់ថា បានជា Smart ដាក់រូប សិរីមន្ត នៅខាងលើ និងធំជាង ព្រោះតារាចម្រៀងសាន់ដេរូបនេះ ជា Brand Ambassador ជាតួឯករបស់គេ ទើបរឿងរ៉ាវបានដោះស្រាយមួយគ្រា។

រឿងមួយទៀតដែលលោកប្រកាន់ដែរនោះ គឺរឿងក្រុមហ៊ុន Smart នៅតែប្រើប៉ាណូមានរូបលោកទៀត នៅក្នុងកម្មវិធីដែលលោកអត់បានទៅច្រៀង។ លោក មុនីវណ្ណ បញ្ជាក់លើបញ្ហានេះទៀតថា ធម្មតាគេ Promotion គេធ្វើប៉ាណូផ្សព្វផ្សាយ គេដាក់រូបតារាដែលជាប់ពាក់ព័ន្ធទាំងអស់ ហើយប៉ាណូនេះ នឹងត្រូវយកទៅផ្សព្វផ្សាយនៅគ្រប់ឆាកទាំងអស់ បើទោះតារាណាមិនទៅក៏ដោយ ព្រោះកម្មវិធីនេះ តារាទាំងអស់ត្រូវឆ្លាស់វេនគ្នាតាមខេត្ត។

នៅថ្ងៃទី ២៩ មីនា ២០១៤ នៅខេត្តស្ទឹងត្រែង ជាវេនលោក ខេមរៈ សិរីមន្ត ត្រូវទៅច្រៀង ឯលោក ព្រាប សុវត្ថិ អត់ទេ ប៉ុន្តែផ្អែកលើការប្រើប្រាស់រូបលោក ខណៈលោកអត់ទៅនោះ លោក ព្រាប សុវត្ថិ បានទូរសព្ទទៅប្តឹងប៉េអិម ឲ្យមកដករូបថតលោកដែលមានលើប៉ាណូចេញ។ ប៉ុន្តែពេលមកដល់ កម្លាំងប៉េអិមបានបញ្ជាឲ្យរុះរើ បិទភ្លើង ពោលគឺបិទកម្មវិធីតែម្តង មុនពេលបើកដំណើរវិញ ក្រោយមានអន្តរាគមន៍ពីអភិបាលខេត្ត។

បញ្ហានេះ លោក អៀង វណ្ឌី មេបញ្ជាការកងរាជអាវុធហត្ថខេត្តស្ទឹងត្រែង ដែលទទួលពាក្យបណ្តឹងពីលោក ព្រាប សុវត្ថិ មិនព្រមធ្វើអត្ថាអធិប្បាយឡើយ ដោយលោកស្នើឲ្យទៅសួរសាមីខ្លួនទាំងពីរវិញ។

យ៉ាងណា លោក ព្រាប សុវត្ថិ មិនអាចសុំការអធិប្បាយបានទេ។ នៅក្នុងជំនួបជាមួយ Sabay តាមទូរសព្ទព្រឹកនេះ លោក ប្រាប់ថាកំពុងជាប់រវល់ ដូចនឹងអ្វីដែលលោកឆ្លើយជាមួយសារព័ត៌មានខាងលើ។

ដោយឡែកលោក សុវណ្ណ អ្នកគ្រប់គ្រងកម្មវិធីរបស់ Smart ក៏មិនព្រមធ្វើអត្ថាធិប្បាយដូចគ្នា ដោយលោកប្រាប់ថា កំពុងជាប់ប្រជុំដែរ។ ប៉ុន្តែតាមរយៈសារព័ត៌មានមួយនោះ លោក បានបញ្ជាក់ថា ក្រុមការងារលោកបានជជែក និងសុំទោសលោក ព្រាប សុវត្ថិ រួចហើយ។ យ៉ាងណាក៏ដោយ លោក ក៏មិនអាចធ្វើតាមការស្នើសុំទាំងស្រុងពីលោក ព្រាប សុវត្ថិ ដោយឲ្យភាគីខាងលោក និងតំណាងក្រុមហ៊ុន SL សរសេរលិខិតសុំទោសដោយមានការចុះហត្ថលេខា ព្រមទាំងផ្ដិតមេដៃជាសាធារណៈនោះដែរ។

បញ្ហានេះដែរលោក លោក ខេមរៈ សិរីមន្ត ដែលត្រូវឡើងច្រៀងក្នុងកម្មវិធីដែលលោក ព្រាប សុវត្ថិ ប្តឹងឲ្យបិទនោះ បានឆ្លើយនឹង Sabay ថា រឿងនេះ មិនជាប់ពាក់ព័ន្ធនឹងរូបលោកទេ ម្យ៉ាងក្នុងថ្ងៃនោះ លោកក៏ទៅមិនទាន់ហេតុការណ៍ដែរ។ វិលទៅរឿងការប្រើរូបលោកធំជាង និងស្ថិតនៅទីតាំងខ្ពស់ជាងលោក ព្រាប សុវត្ថិ លើប៉ាណូផ្សព្វផ្សាយនោះ លោក សិរីមន្ត បញ្ជាក់ថា ក៏មិនមានជាប់ពាក់ព័ន្ធលោកដូចគ្នា។

លោក លើកឡើងថា “រឿងគេដាក់នរណាលើ នរណាក្រោមជារឿងរបស់ក្រុមហ៊ុន ខ្ញុំអត់មានទាមទារអីទេ ប៉ុន្តែ Smart គេយកខ្ញុំជា Ambassador របស់គេ អីចឹងគេធ្វើម៉េចអីម៉េច ជារឿងរបស់គេ ខ្ញុំអត់ដឹងទេ!”។ និយាយពីទំនាក់ទំនងជាមួយលោក ព្រាប សុវត្ថិ មុន និងក្រោយកើតរឿងខាងលើវិញ លោក សិរីមន្ត ប្រាប់ទៀតថា ស្ថិតនៅជាធម្មតា “ខ្ញុំ និងគាត់រាប់អានគ្នា មានបុណ្យទានអីយើងរត់រកគ្នាទៅវិញទៅមក ហើយក្នុងថ្ងៃនោះ ក្រោយចប់ Concert ខ្ញុំក៏បានជួបគាត់តាមទូរសព្ទដែរ គឺពួកយើងនៅតែធម្មតា!”៕

មុន បន្ទាប់

មតិយោបល់