តារាៗ មិនទាន់មានដៃគូ បង្ហើបប្រាប់ពីមនុស្សដែលខ្លួនស្រឡាញ់

តារាៗ មិនទាន់មានដៃគូ បង្ហើបប្រាប់ពីមនុស្សដែលខ្លួនស្រឡាញ់

ថ្វីបើតារាប្រុស-ស្រី មួយចំនួនក្នុងពិភពសិល្បៈបានសម្រុករៀបអាពាហ៍ពិពាហ៍ កាលពីចុងឆ្នាំ ២០១៣ និង ដើមឆ្នាំ ២០១៤ នេះក្ដី ប៉ុន្ដែក៏នៅមានតារាជាច្រើនដួងទៀត នៅមិនទាន់រៀបការ និង មិនទាន់មានដៃគូស្នេហានៅឡើយ។ ដូច្នេះហើយ តារាដែលមិនទាន់មានដៃគូស្នេហាបានបង្ហើបពីការចង់បានដៃគូ ដែលអាចគិតថា ស័ក្ដិសមគ្នាអស់មួយជីវិត។

ខាងក្រោមនេះ គឺជា ទស្សនៈរបស់តារាចម្រៀង និង សម្ដែង ៤ ដួង ដែលនឹងបង្ហាញពីបំណងប្រាថ្នាចង់បានមនុស្សជាទីស្រឡាញ់យកមកធ្វើជាគូអនាគត។

តារាចម្រៀងល្បីមួយរូបក្នុងជួរផលិតកម្មរស្មីហង្សមាស លោក ណុប បាយ៉ារិទ្ធ ដែលធ្លាប់បានបរាជ័យរឿងស្នេហានៅមុនពេលចូលសិល្បៈ បានបង្ហើបប្រាប់ Sabay កាលពីពេលថ្មីៗនេះថា បន្ទាប់ពីធ្លាប់ខូចចិត្តនឹងរឿងស្នេហា លោកនៅមិនទាន់ខ្វាយខ្វល់ពីរឿងហ្នឹងម្ដងទៀតនៅឡើយទេ ប៉ុន្តែ អ្វីដែលជាកង្វល់នោះ គឺកំពុងសម្រុកស្វែងរកប្រាក់ពីសិល្បៈ។ បើទោះបីជាមិនទាន់គិតគូរឿងស្នេហា ប៉ុន្តែ ជីវិតគូអនាគតត្រូវតែមាន។

“បើខ្ញុំចង់បានគូស្រករគឺនារី ដែលខ្ញុំស្រឡាញ់ គឺស្អាត សុភាពរាបសារ មានចំណេះជំនាញ និង ស្រឡាញ់ក្រុមគ្រួសាររបស់ខ្ញុំ ហើយខ្ញុំស្រឡាញ់គ្រួសាររបស់គាត់ ជាពិសេស គឺមានការយោគយល់គ្នាទៅវិញទៅមក”។ នេះជាការលើកឡើងរបស់ លោក ណុប បាយ៉ារិទ្ធ។

Nop-banha-rith

ងាកទៅមើលតារាសម្ដែងពូកែបង្ហូរទឹកភ្នែក កញ្ញា នី មុន្នីនាថ វិញ គឺកញ្ញា បាននិយាយដែរថា នាងនៅមិនទាន់មានស្នេហានៅឡើយទេរហូតមកទល់នឹងពេលនេះ។ ប៉ុន្តែបុរស ដែលនាងចង់បានជាដៃគូជីវិត គឺបុរសម្នាក់ដែលស្រឡាញ់នាងដោយស្មោះ គោរព និង ឲ្យតម្លៃគ្នាទៅវិញទៅមក។

“ខ្ញុំគិតថា នារីណាក៏ដោយ គឺចង់បានសេចក្ដីស្មោះត្រង់ពីបុរស ហើយបុរស ដែលសក្ដិសមនឹងខ្ញុំ គឺខ្ញុំចង់បានបុរសដែលមានអាយុប្រហាក់ប្រហែលនឹងគ្នា”។ នេះជាការលើកឡើងរបស់ កញ្ញា នី មុន្នីនាថ ដែលបច្ចុប្បន្ន មានវ័យ ២៣ ឆ្នាំ។

Ni-muni-neath

លោក ប៉ែន ចំរុង ពិធីករ និង ជាតារាសម្ដែងល្បីមួយរូបប្រចាំព្រះរាជាណាចក្រកម្ពុជា និង ជាម្ចាស់ពានពីរតែឯង ពីកម្មវិធីអាណាចក្រតារា ឆ្នាំ២០១៣ បានបង្ហើបប្រាប់ពីការចង់បានដៃគូអនាគតថា៖ “ស្អាត ឆ្លាត និង មានមុខរបរត្រឹមត្រូវ គឺជានារីដែលខ្ញុំចង់បាន”។

លោក ចំរ៉ុង បានបញ្ជាក់បន្ថែមថា មិនថានារីក្នុងពិភពសិល្បៈ ឬ អ្នកជំនួញនោះទេ ឲ្យតែគេជាមនុស្សស្លូតត្រង់ និងស្រឡាញ់គ្នាទៅវិញទៅមក គឺ លោកអាចយកមកធ្វើជាគូអនាគត រហូតដល់ចាស់កោងខ្នង។ លោកប៉ែន ចំរ៉ុង បាននិយាយដោយមិនអល់អែកថា លោកកំពុងសម្លឹងមើលនារីណាម្នាក់មកធ្វើជាដៃគូ ប៉ុន្តែ រហូតមកទល់នឹងពេលនេះ នៅមិនទាន់រកឃើញនៅឡើយទេ។

ប្រិយមិត្តទាំងអស់គ្នា ចាំអ៊ុតមើលណា តើនរណាជាដៃគូជីវិតរបស់ លោក ប៉ែន ចំរ៉ុង?

កញ្ញា សាន សុម៉ាលី តារាសម្ដែងស្រី សិចស៊ី រុំរឹតដោយព័ត៌មានថា នាងមានប្រុសតាមស្រឡាញ់ច្រើនក្ដី ក៏នាងអះអាងថា រហូតមកទល់នឹងពេលនេះ នាងនៅមិនទាន់មានគូពិតប្រាកដនៅឡើយ។ ដូច្នេះហើយនាងបារម្ភពីការអត់ប្ដី ខណៈនាងចូលវ័យក្បែរ ៣០ ទៅហើយ។

តារាសម្ដែង Sexy ដែលនិយមបញ្ចេញដើមទ្រូងរូបនេះ បានបញ្ជាក់ថា៖ “ខ្ញុំមិនរើសប្ដីនោះទេ ឲ្យតែបុរសដែលមានភាពស្មោះត្រង់ សមត្ថភាព និងមានការទទួលខុសត្រូវនៅក្នុងគ្រួសារ គឺគ្រប់គ្រាន់ហើយសម្រាប់ខ្ញុំ”។

San-somaly

កាលពីចុងឆ្នាំ ២០១៣ និង ដើមឆ្នាំ ២០១៤ តារាប្រុសស្រីបានសម្រុករៀបការច្រើន ក្នុងនោះ រួមមាន អ្នកនាង គង់ សុជាតិ ជាមួយ លោក ជា វិបុល, អ្នកនាង សារ៉ាយ សក្ខិណា ជាមួយ លោក មេធាវី កែវ ប៊ុនមេត្រី ជាអាណិកជនរស់នៅសហរដ្ឋអាមេរិក, អ្នកនាង គីម លីហ្សា ជាមួយបុរសអ្នកជំនួញជាអាណិកជនខ្មែរអូស្ត្រាលី លោក គីវ វុឌ្ឍី ហៅស្តេវិន, អ្នកនាង អឿន ដាលីស និង ស្វាមី លោក ភីតធ័ត និង អ្នកនាង អេនជី និង ស្វាមី លោក Nathan Bracker៕

ប្រភព Sabay

មុន បន្ទាប់

មតិយោបល់