សុះ ម៉ាច នឹងឈប់ធ្វើជាប្រធានសមាគមសិល្បករខ្មែរ?

សុះ ម៉ាច នឹងឈប់ធ្វើជាប្រធានសមាគមសិល្បករខ្មែរ?

ពាក់កណ្ដាល ខែ សីហា ខាងមុខនេះ អាណត្តិប្រធានសមាគមសិល្បករខ្មែររបស់ លោក សុះ ម៉ាច នឹងមកដល់ ក្រោយពីបានបំពេញតួនាទីជាអាណាព្យាបាលអ្នកសិល្បៈ អស់រយៈពេល ៣ ឆ្នាំ ហើយក៏សម្រេចបានសមិទ្ធផលមួយចំនួន។

អ្វីខ្លះជាសមិទ្ធផលសម្រេចបានសម្រាប់វិស័យសិល្បៈ? ចុះលោកទទួលបរាជ័យលើផ្នែកអ្វីខ្លះ?

នៅក្នុងជំនួបជាមួយ Sabay ប្រធានសមាគមរូបនេះ បានផ្ដល់បទសម្ភាសន៍ដូចតទៅ៖

Sabay៖ ៣ ឆ្នាំពេញដែលលោកបានបំពេញតួនាទីជាប្រធានសមាគមសិល្បករខ្មែរ។ តើមានសមិទ្ធផលអ្វីខ្លះដែលបានកើតឡើងក្នុងរង្វង់សិល្បៈ?

សុះ ម៉ាច៖ យើងបានអភិវឌ្ឍន៍សមាគមសិល្បករខ្មែរតាំងពីស្ងាត់ជ្រងំ រហូតយើងមានអ្វីគ្រប់បែបយ៉ាង ដែលមានសមាជិកជាង៤០០នាក់ហើយនាពេលនេះ។ យើងបានចូលរួមបង្កើតឲ្យមានកម្មវិធី “អាណាចក្រតារា” ដែលមិនធ្លាប់មានក្នុងប្រវត្តិសាស្ត្រសិល្បៈ បើទោះបីជាមានសិល្បករមួយចំនួនមិនយល់ពីតម្លៃ និង ធ្វើពហិការមិនចូលរួមយ៉ាងណាក្ដី។

ការបង្កើតឲ្យមានកញ្ចប់ថវិកាសម្រាប់ជួយដល់សិល្បករវ័យជរាបាត់បង់សមត្ថភាព និង ចូលរួមដោះស្រាយរាល់បញ្ហា ដែលសិល្បករយើងជួបប្រទះ ដោយរៀបចំឲ្យមានក្រុមមេធាវី ទោះបីជាមានការស្នើសុំ ឬមិនស្នើសុំយ៉ាងណាក្ដី ហើយមានរឿងរ៉ាវជាច្រើនទៀតនៅក្នុងអាណត្តិ។

សន្និសីទ្ធសារព័ត៌មានរបស់ នាយ កុយ និង លោក ខេមរៈ សិរីមន្ត ជុំវិញរឿងគ្រោះថ្នាកចរាចរ

Sabay៖ ចំណែកការងារសង្គមវិញ តើសមាគមរបស់លោក បានចូលរួមអ្វីខ្លះដែរទេ?

សុះ ម៉ាច៖ កន្លងមកយើងបានចូលរួមចំណែកខ្លះដែរ រួមមានការចូលរួមចំណែកនាំយកអំណោយជួនដល់ប្រជាពលរដ្ឋខណ្ឌមានជ័យ ៧០០ គ្រួសារ និង ខណ្ឌឫស្សីកែវ ២០០ គ្រួសារ នាពេលកន្លងទៅ ហើយក៏បាននាំអំណោយជួយដល់ប្រជាពលរដ្ឋរងគ្រោះដោយសារទឹកជំនន់ផងដែរ។

ការដឹកនាំក្រុមសិល្បករចូលរួមក្នុងព្រះរាជពិធីទទួលព្រះបរមសព ព្រះបរមរតនៈកោដិ និង ចូលរួមគោរពព្រះវិញ្ញាណក្ខន្ធ ដែលជាកាតព្វកិច្ចរបស់យើងគ្រប់គ្នា។

រូបភាពដឹកនាំអ្នកសិល្បៈទទួលព្រះបរមសពសម្ដេចតា, ចែកអំណោយ និង សួរសុខទុក្ខអ្នកសិល្បៈមានជំងឺ

Sabay៖ ចុះអ្វីដែលសមាគមមិនទាន់សម្រេចបាននៅឡើយ ឬអាចនិយាយថា ជាចំណុចបរាជ័យសម្រាប់ការដឹកនាំរបស់លោក?

សុះ ម៉ាច៖ អ្វីដែលមិនទាន់សម្រេចបានទាំងស្រុងនោះ គឺធ្វើឲ្យមានសាមគ្គីភាពនៅក្នុងរង្វង់សិល្បៈហ្នឹងឯង ទោះបីជាយើងព្យាយាមអំពាវនាវយ៉ាងណាក្ដី ដែលនេះជាបញ្ហាធំ។ មានន័យថា អ្នកសិល្បៈភាគច្រើនមិនបានចូលរួមជាសមាជិករបស់របស់សមាគម ដើម្បីអាចជួយគ្នាបាននោះទេ ដោយពូកគេយល់ថា គ្មានសមាគមក៏រស់បាន និងរកលុយបានចាយមិនអស់ដែរ។

Sabay៖ ក្នុងនាមប្រធានសមាគម ដែលជិតផុតអាណត្តិទៅហើយនោះ តើនឹងធ្វើយ៉ាងណាជាបន្តទៀត?

សុះ ម៉ាច៖ ទោះបីជាពេលវេលាខ្លីយ៉ាងណាក៏ដោយ ខ្ញុំនៅតែបន្តសកម្មភាពក្នុងនាមជាប្រធានបន្ត រហូតដល់ការបញ្ចប់អាណត្តិទាំងស្រុង ជាពិសេសការប្រមែប្រមូលអ្នកសិល្បៈឲ្យចូលរួមក្នុងសមាគម។ ខ្ញុំសង្ឃឹមថា ប្រធានសមាគមថ្មី នឹងព្យាយាមបន្តទៀត ដើម្បីឲ្យអ្នកសិល្បៈមានការរួបរួមគ្នាឡើង។

Sabay៖ ត្រង់ចំណុចនេះបញ្ជាក់ថា លោកឈប់ទទួលយកតំណែងណាមួយក្នុងសមាគម ហើយត្រឡប់ទៅធ្វើជាអ្នកចម្រៀងធម្មតាដូចពីមុន ឬយ៉ាងណា?

សុះ ម៉ាច៖ ទេ! ខ្ញុំមិនចុះចាញ់ងាយពេកទេ ក្នុងអាណត្តិរបស់ខ្ញុំកន្លងមក មានសំពាធសិល្បៈច្រើនណាស់ តែយើងអាចប្រឈម និង ដោះស្រាយបានទៅហើយ។ ខ្ញុំកំពុងពិចារណាថា តើគួរបញ្ចប់តែម្ដង ឬឈរឈ្មោះឲ្យសមាជិកបោះឆ្នោតបន្តទៀតប៉ុណ្ណោះ។ ដោយឡែកសម្រាប់ការច្រៀងនោះ មិនដែលគិតថា ឈប់នោះទេ ព្រោះខ្ញុំគ្មានអ្វីជាដុំកំភួនឡើយ។

Sabay៖ អរគុណសម្រាប់ចំណាយពេលរបស់លោកផ្ដល់បទសម្ភាសន៍មកកាន់ Sabay។ តើលោកមានអ្វីជាចុងក្រោយ?

សុះ ម៉ាច៖ អរគុណ Sabay! មិនមានអ្វីពីការអំពាវនាវឲ្យអ្នកសិល្បៈទាំងអស់មានការសាមគ្គីគ្នាឡើង ដើម្បីលើកស្ទួយវិស័យសិល្បៈខ្មែរ ឲ្យរីកចម្រើនទៅមុខ ក៏ដូចជាបន្តនិរន្តរភាពសមាគម ដែលគាំទ្រដោយរាជរដ្ឋាភិបាលកម្ពុជាបន្តទៀត។ ចុងក្រោយ សូមថ្លែងអំណរគុណដល់អ្នកសិល្បៈ ក៏ដូចជាសិល្បករទាំងអស់ដែលបានគាំទ្រខ្ញុំកន្លងមក៕

ប្រភព Sabay

មុន បន្ទាប់

មតិយោបល់