ផាន វីរ៉ាទី ស្អាតម្លឹងៗ ទើបទទួលបានការចាប់អារម្មណ៍ច្រើនមែន?

ផាន វីរ៉ាទី ស្អាតម្លឹងៗ ទើបទទួលបានការចាប់អារម្មណ៍ច្រើនមែន?

ជាតារាថ្មីមែន ដោយទើបប្រឡូកសិល្បៈបាន១ឆ្នាំប៉ុណ្ណោះ ប៉ុន្តែកញ្ញា ផាន វីរ៉ាទី កំពុងទទួលបានការចាប់អារម្មណ៍ច្រើនពីទស្សនិកជន ពិសេសពេលបានលេចមុខសម្ដែងភាពយន្តដំបូងរឿង “កំលោះចាប់ហួយ” ដែលទើបចាក់បញ្ចាំងចប់លើកញ្ចក់ទូរទស្សន៍ MyTV ពីរបីថ្ងៃមុននេះ។

អ្នកនាង ឌុច សុភា គឺជាតួឯកស្រីក្នុងរឿងនេះ ប៉ុន្តែតួសម្ដែងដែលគេចាប់អារម្មណ៍ គឺនាង “អាំ” សម្ដែងដោយកញ្ញា ផាន វីរ៉ាទី។ ការចាប់អារម្មណ៍ ត្រូវបានគេផ្ដោតលើសម្ផស្ស និងការទេពកោសល្យសម្ដែង ខណៈនាងជាតួថ្មីម្នាក់ មិនទាន់មានគេស្គាល់ផង។

សាមីខ្លួន បានទទួលស្គាល់លើបញ្ហានេះ នៅក្នុងការសន្ទនាតាមទូរសព្ទជាមួយ Sabay រសៀលម្សិលមិញ។ កញ្ញា ផាន វីរ៉ាទី ថ្លែងថា”ក្រោយសម្ដែងរឿងហ្នឹង ឃើញគេគាំទ្រច្រើន អាចថាមកពីសាច់រឿងផង អាចមកពីការសម្ដែងផង។ គ្រាន់តែចប់រឿងហ្នឹង ឃើញមានគេទាក់ទងមកខ្ញុំច្រើនបង តែភាគច្រើនជារឿងចាក់នៅរោងកុន តែខ្ញុំដូចជាចង់ថតរឿងភាគចាក់លើទូរទស្សន៍ជាង!”។

“កំលោះចាប់ហួយ” គឺជាការបើកឆាកសមត្ថភាពសម្ដែងរបស់កញ្ញា ផាន វីរ៉ាទី បន្ទាប់ប្រឡូកសិល្បៈប្រមាណ១ឆ្នាំមកនេះ។ វិលទៅដំណើរឈានចូលសិល្បៈវិញ តារាសម្ដែង វ័យ ២១ឆ្នាំរូបនេះ ប្រាប់ថា នាងបានឈានជើងចូលសិល្បៈ តាមរយៈក្រុមហ៊ុនជប៉ុនមួយឈ្មោះថា Mushasi ដោយកញ្ញា បានដាក់ពាក្យប្រឡងឆ្លងកាត់ការជ្រើសរើសត្រឹមត្រូវ។

“ក្រុមហ៊ុនហ្នឹងគេតម្រូវឲ្យយើងមានសមត្ថភាពច្រើន ដូចជាអាចច្រៀងបាន សម្ដែងបាន ព្រមទាំងមានសម្ផស្សស្អាតអីផង ចុងក្រោយខ្ញុំក៏ជាប់ទៅ!”។ វីរ៉ាទី បន្ថែមថា បច្ចុប្បន្ននៅក្នុងក្រុមហ៊ុនជប៉ុននេះ កញ្ញា ត្រូវបានក្រុមហ៊ុនជ្រើសរើសឲ្យធ្វើជាប្រធានក្រុមថែមទាំងទៀតផង ហើយកញ្ញា គ្រប់គ្រងសមាជិក៦នាក់ផ្សេងទៀត។

មិនត្រឹមតែមានរូបសម្ផស្សស្អាត មានទេពកោសល្យសម្ដែងល្អទេ ប៉ុន្តែស្រីស្អាត វីរ៉ាទី នៅអាចច្រៀងបាន និងអាចប្រើប្រាស់ភាសាអង់គ្លេសបានល្អថែមទៀតផង។ កញ្ញា កើតនៅខេត្តបាត់ដំបង ប៉ុន្តែបានផ្លាស់ទីលំនៅជាមួយឪពុកម្តាយមកនៅខេត្តព្រៃវែង តាំងពីកញ្ញានៅតូចៗម្ល៉េះ៕

មើល៍ៗ…សុំសួរតិចមើល៍គ្នាយើង…ស្អាតប៉ុណ្ណឹង?