ពែកមី និង គ្រឿន កំពុងរៀបយុទ្ធសាស្ត្រជួយប្អូនម្នាក់ទៀត?

ពែកមី និង គ្រឿន កំពុងរៀបយុទ្ធសាស្ត្រជួយប្អូនម្នាក់ទៀត?

នាយ ពែកមី និង នាយ គ្រឿន មួយរយៈចុងក្រោយនេះ ភាគច្រើនរំលេចដោយពាក្យ “អាប៉ូយ” ដែលគេបានដឹងថា ជាឈ្មោះប្អូនប្រុសបង្កើតរបស់ពូកគេ រាល់ការសម្ដែងលើឆាកនានា។

មានការលើកឡើងថា អ្នកទាំងពីរកំពុងរៀបយុទ្ធសាស្ត្រ ជួយប្អូនប្រុសម្នាក់ទៀត បន្ទាប់ពីនាយ ក្រាន់ កំពុងទទួលបានប្រជាប្រិយភាពបណ្ដើរៗទៅហើយនោះ។

“ម៉េច! ចង់ដូចអាប៉ូយ”, “អាប៉ូយកូនឪមែនហ្នឹង”។ ជាពាក្យដែលគេបានលឺជាញឹកញាប់ចេញពីមាត់របស់ នាយ ពែកមី និង នាយ គ្រឿន អមដោយសំណើចរបស់ទស្សនិកជន។

នាយ ប៉ូយ ក៏ធ្លាប់មានឱកាសបង្ហាញលើកញ្ចក់ទូរទស្សន៍ CTN នៅពេលកន្លងតាមរយៈកម្មវិធី”ផ្ទះលោកតា”របស់លោក ដួង សុខគា ទៀតផង។ ម្យ៉ាងទៀត ឱកាសបានសម្ដែងក្នុងបទចម្រៀង”អាប៉ូយកូនឪ” របស់ផលិតកម្មTownនារដូវចូលឆ្នាំកាលពីពេលថ្មីនេះ ក៏មិនមែនជារឿងចៃដន្យឡើយ តែជាការជួយជ្រោមជ្រែងរបស់នាយ ពែកមី ទាំងអស់។

ហេតុផលទាំងនេះ អាចឲ្យទស្សនិកជនសន្មតបានថានាយ ពែកមី និង គ្រឿន កំពុងនាំប្អូនប្រុសចូលក្រុមម្នាក់ទៀតហើយ ដោយមិនបាច់ចាំមានការប្រលងអីនោះទេ។

“ពេលនិយាយទៅពាក្យហ្នឹង ធ្វើឲ្យគេសើចឡើង មិនដែលខានឡើយ អញ្ចឹងក៏នៅតែបន្តទៅ”។ នេះជាអះអាងរបស់នាយ ពែកមី ក្នុងជំនួបជាមួយ Sabay ព្រឹកមិញ។ រាល់ការនិយាយពីឈ្មោះ “អាប៉ូយ” ពិតជាធ្វើឲ្យទស្សនិកជនផ្ទុះសំណើច។ តែនាយថា ប្អូនប្រុសម្នាក់នេះគ្មានទេពកោសល្យនោះទេ ទោះបីជាមានការយឹតយោងពីបងប្អូនយ៉ាងណាក៏ដោយ ក៏មិនអាចជួយបានដែរ។

ពែកមី អះអាងថា ប្អូនប្រុសរបស់លោក មិនខុសពីបទចម្រៀងដែលបានថតឲ្យផលិតកម្មនោះប៉ុន្មានឡើយ គឺមិនសូវចេះមាត់ក និងចូលចិត្តលេងបាល់ទះ ពេលទៅណាមកណាគេមានម៉ូតូសង់កូរ៉េមួយគ្រឿងនៅផ្ទះជិះចុះឡើងពេញភូមិ។ រូបគេគ្មានទេពកោសល្យសិល្បៈដូចនាយ គ្រឿន និងនាយ ក្រាន់ នោះទេ សព្វថ្ងៃកំពុងរស់នៅជាមួយនាយ ក្នុងតួនាទីជាអ្នករៀបឆាក។

“ចេះតែចង់ឲ្យបងប្អូនចូលហើយ តែរឿងសិល្បៈនេះ បើគ្មានទេពកោសល្យមិនបាច់ទេល្អជាង”។ ពែកមី បន្ថែមដូច្នេះ។

ប៉ុន្តែ ពែកមី បានទទួលស្គាល់ដែរថា បងប្អូនទាំងពីរដែលរូបគេបាននាំចូលសិល្បៈកន្លងមក មាននាយ គ្រឿន និងនាយ ក្រាន់ នោះ សុទ្ធតែផ្ដើមចេញពីចរិតទុយមុយដូចគ្នាទាំងអស់ ដែលអាចនិយាយថា ជាការរៀបចំរបស់តាវ៉ិចទ័រ និងរូបគេជាបងប្រុសផង ទម្រាំម្នាក់ៗមានសមត្ថភាពសម្ដែងបាន។

តារាកំប្លែង និងចម្រៀងល្បីរូបនេះ មិនទាន់រៀបចំផែនការច្បាស់លាស់ក្នុងវិស័យសិល្បៈសម្រាប់នាយ ប៉ូយ នៅឡើយទេ។ ដោយឡែក រូបគេក៏មិនអាចជ្រោមជ្រែងនាយ ក្រាន់ ចូលក្រុមរបស់ខ្លួនម្នាក់ទៀតដែរ ខណៈមានសមាជិកកាន់តែច្រើនរហូតដល់១២នាក់ទៅហើយនោះ៕

បទ៖ “បើស្រវឹងសូមកុំបើកបរ “ច្រៀងដោយ នាយ ប៉ូយ