តារាចម្រៀងស្រីលេងម៉ូដពុកមាត់ ចេញសម្ដែងលើកដំបូង ក្រោយឈ្នះពានទ្វីបអឺរ៉ុប

តារាចម្រៀងស្រីលេងម៉ូដពុកមាត់ ចេញសម្ដែងលើកដំបូង ក្រោយឈ្នះពានទ្វីបអឺរ៉ុប

តារាចម្រៀងពុកមាត់របស់ប្រទេសអូទ្រីស Conchita Wurst បានចេញសម្ដែងក្នុងការប្រគំតន្ត្រីនៅមុខសាធារណជនជាលើកដំបូង ក្នុងទីក្រុង Vienna ប្រទេសកំណើតរបស់នាង កាលពីថ្ងៃអាទិត្យ បន្ទាប់ពីទទួលបានជយលាភីក្នុងកម្មវិធីប្រឡងចម្រៀងប្រចាំទ្វីបអឺរ៉ុប Eurovision កាលពីសប្ដាហ៍មុន។

Conchita Wurst ត្រូវបានស្វាគមន៍ដោយអ្នកគាំទ្ររាប់ពាន់នាក់ រួមទាំងមនុស្សស្រឡាញ់ភេទដូចគ្នាជាច្រើននាក់។ មនុស្សជាច្រើនបានគ្រវីទង់ជាតិពណ៌ឥន្ទធនូ និងពាក់ពុកមាត់ក្លែងក្លាយ។

តារាវ័យ ២៥ឆ្នាំរូបនេះ បាននិយាយថា “ខ្ញុំពិតជារំភើប និងរីករាយខ្លាំងណាស់ដែលអាចនាំយកជយលាភីសម្រាប់មាតុប្រទេសបាន។ នេះមិនមែនជាជយលាភីសម្រាប់ខ្ញុំម្នាក់ឯងនោះទេ ប៉ុន្តែវាគឺសម្រាប់មនុស្សទាំងអស់គ្នាដែលជឿជាក់លើការផ្លាស់ប្ដូរក្នុងពេលអនាគត”។

ទោះយ៉ាងណា ការប្រគំតន្ត្រីនេះក៏ទទួលបានការរិះគន់ផងដែរ ពីសំណាក់ក្រុមអភិរក្សនិយមរបស់ប្រទេសនេះ ដែលមិនគាំទ្រចំពោះក្រុមមនុស្សស្រឡាញ់ភេទដូចគ្នា។

មុននេះដែរ Conchita ត្រូវបានទទួលស្វាគមន៍ដោយ មេដឹកនាំប្រទេសអូទ្រីស លោក Werner Faymann ដែលបានអរគុណ ដល់ Conchita សម្រាប់ការខិតខំប្រឹងប្រែងរបស់នាង។ នេះគឺជាលើកទីមួយដែល ប្រទេសអូទ្រីស បានឈ្នះក្នុងកម្មវិធីនេះ តាំងពីឆ្នាំ១៩៦៦មក។ លោក Faymann សង្ឃឹមថា ជ័យជម្នះរបស់ Conchita នឹងអាចជំរុញសិទ្ធក្រុមមនុស្សស្រឡាញ់ភេទដូចគ្នា រួមទាំងសិទ្ធរៀបការ ក្នុងប្រទេសអូទ្រីសទាំងមូល។

Conchita ដែលមានឈ្មោះកំណើត Tom Neuwirth បានចូលសិល្បៈកាលពីឆ្នាំ២០០៦ ដោយកាលនោះគេគឺជាមនុស្សប្រុស។ លុះដល់ឆ្នាំ២០១១ គេក៏បានបង្ហាញខ្លួនសារជាថ្មីដោយតែងខ្លួនជាមនុស្សស្រី តែមានពុកមាត់។ ជ័យជម្នះក្នុងកម្មវិធី Eurovision កាលពីថ្ងៃទី១០ ខែឧសភា បានធ្វើឲ្យ Conchita កាន់តែត្រូវបានគេស្គាល់ច្រើនទូទាំងពិភពលោក ៕