តួឯកស្រីក្នុងរឿង “ពុទ្ធិសែននាងកង្រី” សរសើរពីការសម្ដែងរបស់តារាជំនាន់ក្រោយ

តួឯកស្រីក្នុងរឿង “ពុទ្ធិសែននាងកង្រី” សរសើរពីការសម្ដែងរបស់តារាជំនាន់ក្រោយ

អ្នកស្រី វីរៈ តារា អតីតតារាភាពយន្តមួយដួង ដែលមានកេរ្តិ៍ឈ្មោះល្បីល្បាញក្នុងអំឡុងទសវត្ស ៦០-៧០ ដែលទស្សនិកជននៅចងចាំមិនភ្លេចតាមរយៈការសម្ដែងរឿងដ៏ស័ក្ដិសមឥតខ្ចោះ រឿង”ពុទ្ធិសែននាងកង្រី” “សព្វសិទ្ធិ” និង “អនអើយស្រីអន”នោះ គឺអ្នកស្រី បានកោតសរសើរពីទេពកោសល្យសម្ដែងរបស់តារាខ្មែរជាន់ក្រោយទាំងទំនុកចិត្តសម្ដែង និង បច្ចេកទេសថតផងដែរ។

អ្នកស្រី វីរៈ តារា បាននិយាយនៅក្នុងបទសម្ភាសន៍ជាមួយ Khmer TV ដែលបទសម្ភាសន៍នេះត្រូវបានគេបង្ហោះនៅលើបណ្ដាញសង្គម នាងពេលថ្មីៗនេះ បានឲ្យដឹងថា ត្បិតតែមានទស្សនិកជនបានកោតសរសើរពីការសម្ដែងរបស់អ្នកស្រី ប៉ុន្តែ អ្នកស្រីបានបង្ហើបប្រាប់ថា អ្នកស្រីកាលពីនៅសម្ដែង គឺខ្វះទំនុកចិត្ត ដោយសារមិនធ្លាប់ចូលសាលាសម្ដែង ដូច្នេះហើយការសម្ដែងដំបូងអៀនច្រើន ហើយបច្ចេកទេសថតកាលពីជំនាន់នោះនៅមិនទាន់ជឿនលឿននៅឡើយ។ ប៉ុន្តែបច្ចុប្បន្ននេះ តារាខ្មែរឥឡូវគេមានទំនុកចិត្តគេសម្ដែងបានល្អ មិនមានការអៀននោះទេ និង ឧបករណ៍ថត ឬ បច្ចេកទេសផ្សេងគេជឿនលឿន។

Interviews

អ្នកស្រី វីរៈ តារា ផ្ដល់បទសម្ភាសន៍ជាមួយពិធីការិនីទូរទស្សន៍ Khmer TV

ទោះបីជាយ៉ាងណាក៏ដោយ អ្នកស្រី វីរៈ តារា បានសម្ដែងការសោកស្ដាយនៅពេលរោងកុនមួយចំនួនស្ងាត់ជ្រងំ ដែលផ្ទុយអំពីជំនាន់អ្នកស្រី ដែលភាពយន្តដាក់បញ្ចាំងគឺមានមនុស្សច្រើនកុះករចូលទស្សនា។ “ខ្ញុំស្រណោះអតីតកាលណាស់ កាលណោះរោងកុនមួយៗ គឺមានមនុស្សច្រើនណាស់ កុនបញ្ចាំងគឺមានមនុស្សរោមទៅទស្សនា”។

អ្នកស្រី វីរៈ តារា ក៏បានរំលឹកពីការប្រឡូកចូលសិល្បៈលើកដំបូងដែរថា ដើមឡើយអ្នកស្រីគឺចូលចិត្តសិល្បៈតាំងពីនៅសិក្សា ប៉ុន្តែ គ្រួសារមិនអនុញ្ញាតឲ្យចូលសិល្បៈនោះទេ។ លុះបានស្គាល់ លោក លី ប៊ុនយីម ហើយគាត់បានចូលស្ដីដណ្ដឹងការត្រឹមត្រូវ ក៏អាចមានឱកាសក្លាយជាតារាភាពយន្ដ។

អ្នកស្រី វីរៈ តារា បានបញ្ជាក់ថា កាលពីអំឡុងទសវត្ស ៦០-៧០នោះ អ្នកស្រីបានថតរឿងចំនួន ជាង១០រឿងមកហើយ ប៉ុន្ដែ បីរឿងមិនបានបញ្ចាំង គឺរឿង “សេះសមុទ្រ” “ភ្នំពកូន” និង “ឯណាប្រពន្ធខ្ញុំ”។ មិនបានបញ្ចាំងដោយសាររបបលន ណុល ដួលរលំ ជំនួសដោយរបបខ្មែរក្រហម។

ក្នុងចំណោម ១០ រឿង ដែលអ្នកស្រី វិរៈ តារា បានសម្ដែង គឺ បីរឿង ដែលទទួលបានការពេញនិយមខ្លាំងពីទស្សនិកជន គឺរឿង “ពុទ្ធិសែននាងកង្រី” “សព្វសិទ្ធិ” និង “អនអើយស្រីអន”។

អ្នកស្រី វីរៈ តារា មានឈ្មោះដើមថា គឹម ហៀក កើតនៅឆ្នាំ ១៩៤៧ នៅឯទីរួមខេត្តកំពត។ អ្នកស្រីវិរៈ តារា បានរៀបអាពាហ៍ពិពាហ៍ជាមួយលោក លី ប៊ុនយីម នៅឆ្នាំ ១៩៦៤ ហើយមានបុត្រចំនួន ៥ នាក់ សុទ្ធតែប្រុស។

Kong-rey

អ្នកស្រី វីរៈ តារា សម្ដែងជាតួនាងកង្រី

យោងតាម វីគីភីឌា បានបញ្ជាក់ថា នៅក្នុងរបបខ្មែរក្រហម អ្នកស្រី និង ស្វាមី ត្រូវបានជម្លៀសទៅរស់នៅស្រុកកំពង់ត្រាច ខេត្តកំពត បានរយៈពេល៥ខែ ក៏លួចរត់ចេញទៅខេត្តហាទៀង ប្រទេសវៀតណាម ហើយឆ្លងចូលទៅប្រទេសឡាវ រហូតបានចេញទៅរស់នៅប្រទេសបារាំងនៅឆ្នាំ ១៩៧៦។ អ្នកស្រី បានលែងលះជាមួយស្វាមី នៅឆ្នាំ ១៩៨៦។ សព្វថ្ងៃអ្នកស្រីកំពុងរស់នៅប្រទេសបារាំង៕

រឿង “ពុទ្ធិសែននាងកង្រី”