៥០រឿងមើលហើយដឹងតែពីសើចនឹងជួយផ្ដល់គំនិតដល់ផលិតករវ័យក្មេង!

៥០រឿងមើលហើយដឹងតែពីសើចនឹងជួយផ្ដល់គំនិតដល់ផលិតករវ័យក្មេង!

កុនមើលហើយដឹងតែពីសើចចំនួន៥០រឿង ប្រមូលពីប្រទេសផ្សេងៗទូទាំងពិភពលោក ដែលនឹងយកមកចាក់បញ្ចាំងក្នុងរាជធានីភ្នំពេញ ពីថ្ងៃទី៣១ ឧសភា ដល់ថ្ងៃទី៨ មិថុនា ត្រូវបានផលិតករក្នុងស្រុកសម្លឹងឃើញថា មិនត្រឹមតែជួយបន្ធូរបន្ថយអារម្មណ៍តានតឹងរបស់ប្រជាជនខ្មែរទេ ប៉ុន្តែថែមទាំងអាចផ្ដល់ជាគំនិតដល់ផលិតករវ័យក្មេងផងដែរ។

រឿងទាំង៥០របស់កម្មវិធីមហោស្រពបេតិកភណ្ឌភាពយន្តអន្តរជាតិ “ការចងចាំ” លើកទី២នេះ ដឹកនាំដោយសមាគមភាពយន្ត “ការចងចាំ”, មូលនិធិ Technicolor សម្រាប់បេតិកភណ្ឌភាពយន្ត, និងមជ្ឈមណ្ឌលធនធានសោតទស្សន៍បុប្ផាណា។ ក្នុងឆ្នាំទីពីររបស់ខ្លួន មហោស្រពនេះមានប្រធានបទ “សំណើច” ហើយភាពយន្តទាំងអស់ ដែលនឹងយកមកបញ្ចាំង មានលក្ខណៈកំប្លែង គ្រាន់តែខុសគ្នាតាមប្រទេសនីមួយៗ វប្បធម៌នីមួយៗ និងសម័យកាលនីមួយៗប៉ុណ្ណោះ។

Memory-Film-Festival5

លោក ប៉ាន់ រិទ្ធី សមិទ្ធិករភាពយន្តជាប់ជម្រើសរង្វាន់អូស្ការ២០១៤ និងជានាយកមជ្ឈមណ្ឌលបុប្ផាណា យល់ថា ភាពយន្តទាំងខ្មែរ និងបរទេស ដែលបង្ហាញខ្លួនលើសំពត់សនាពេលខាងមុខ អាចបើកបង្អួចមួយថ្មីសម្រាប់ទស្សនៈយុវជនខ្មែរ និងសមិទ្ធិករភាពយន្តទាំងអស់។

សមិទ្ធិករភាពយន្តជាប់ជម្រើសរង្វាន់អូស្ការរូបនេះបានលើកឡើងបន្ថែមថា៖ “ប្រធានបទក្នុងឆ្នាំនេះ គឺទាក់ទងនឹងសំណើច ដែលមានភាពយន្តកំប្លែងពីបណ្ដាលប្រទេសជាច្រើនដូចជាចិន, ជប៉ុន, បារាំង, សិង្ហបុរី, អូស្ត្រាលី, និងហ្វីលីពីនជាដើម។ ខ្ញុំជឿជាក់ថា វាក៏ជាការឆក់ឱកាសសម្រាប់សិស្សនិស្សិតក្នុងការស្វែងយល់ពីស្នាដៃផលិតកុនបរទេស និងជាការយល់ពីវប្បធម៌នៃប្រទេសផ្សេងៗក្នុងការផលិតកុនផងដែរ”។

លោកបញ្ជាក់បន្ថែមដែរថា៖ “មូលហេតុដែលជ្រើសរើសប្រធានបទសំណើចនេះ ដោយសារនៅពេលមនុស្សមានភាពតានតឹងពីបញ្ហាអី្វមួយ សំណើចបានជួយបន្ធូរបន្ថយ ដូច្នេះសំណើចអាចទាក់ទាញមនុស្សបាន អាចឲ្យមនុស្សសើចដោយមិនប្រកាន់វណ្ណៈ និងម៉្យាងទៀតដើម្បីឲ្យអ្នកទាំងអស់បានចំណាយពេលជាមួយគ្នា សើចជាមួយគ្នា ស្រលាញ់កុនទាំងអស់គ្នា ដែលជាតម្លៃទី៧ក្នុងសិល្បៈភាពយន្ត ព្រមទាំងអាចទាញយក ក្រៅពីសប្បាយរីករាយ សិក្សាបន្ថែមពីវប្បធម៌ និងគុណតម្លៃអប់រំរបស់រឿង”។

លោកស្រី Severine Wemaere នាយកចាត់ចែងរបស់មូលនិធិTechnicolor សម្រាប់បេតិកភណ្ឌភាពយន្ត បាននិយាយថា៖ “នេះជាលើកទី២សម្រាប់ព្រឹត្តិការណ៍នេះ ដូច្នេះខ្ញុំពិតជាចង់ឲ្យព្រឹត្តិការណ៍នេះល្អជាងមុន និងសង្ឃឹមថា មានអ្នកចូលរួមច្រើន។ យើងបានចំណាយពេលច្រើនក្នុងការប្រមូលកុនចាស់ៗពីប្រទេសផ្សេងៗ ប្រហែល២០ប្រទេស”។

លោក Gilles Duval នាយកចាត់ចែងរបស់សមាគមភាពយន្ត “ការចងចាំ” បានពន្យល់ពីការប្រមូលកុនចំនួន៥០រឿងនេះ ដោយផ្អែកលើកត្តាពីរយ៉ាងសំខាន់ៗ។

Memory-Film-Festival1

លោកបាននិយាយថា ទីមួយគឺតួសម្ដែង ដែលមនុស្សភាគច្រើនបានស្គាល់ជាតួល្បីល្បាញសម្រាប់ពិភពលោក និងទីពីរ គឺអ្នកដឹកនាំរឿង បានបង្កើតសមិទ្ធិកម្មមានទឹកដៃ ដែលជំរុញឲ្យពូកគាត់ត្រូវជ្រើសរើសយកមកបញ្ចាំង។ លោកក៏បានបង្ហើបប្រាប់ដែរថា ក្នុងនោះភាពយន្តខ្មែររឿង “អនអើយ ស្រីអន” ក៏ត្រូវបានយកមកបញ្ចាំង នៅថ្ងៃទី៨ ខែមិថុនា ឆ្នាំ២០១៤ វេលាម៉ោង២រសៀលដែរ។

ក្នុងដំណាក់កាលជ្រើសរើសរឿង លោកក៏កត់សម្គាល់ឃើញថា មានប្រទេសខ្លះក៏ពិបាកក្នុងការសម្រិតសម្រាំងយករឿងកំប្លែងនេះដែរ។

ចង់ដឹងថា រឿងទាំងនោះកំប្លុកកំប្លែងប៉ុណណា សូមរង់ចាំទស្សនាពីថ្ងៃទី៣១ ឧសភា ដល់ថ្ងៃទី៨ មិថុនា ២០១៤ នៅសាលចតុមុខ និងមជ្ឈមណ្ឌលសោតទស្សន៍បុប្ផាណា ចាប់ពីម៉ោង៩ព្រឹក រហូតដល់៨កន្លះយប់ ដោយឥតគិតថ្លៃ៕

ប្រភព Sabay

មុន បន្ទាប់

មតិយោបល់