ពេជ្រ អាវីហ្សា មិនទទួលថតខ្សែភាពយន្ត ព្រោះខ្លាចខូចសម្រស់!

ពេជ្រ អាវីហ្សា មិនទទួលថតខ្សែភាពយន្ត ព្រោះខ្លាចខូចសម្រស់!

តារាសម្ដែងវ័យក្មេង sexy កញ្ញា ពេជ្រ អាវីហ្សា មិនទទួលថតខ្សែភាពយន្តឡើយ ព្រោះតែខ្លាចខូចសម្រស់ដ៏ស្រស់ស្អាតរបស់ខ្លួនខំថែទាំជារៀងរាល់ថ្ងៃ។

ការលើកឡើងដូច្នេះរបស់កញ្ញា ពេជ្រ អាវីហ្សា បន្ទាប់ពីតារាសម្ដែងរូបនេះអះអាងថា មានផលិតកម្មជាច្រើនបានទាក់ទងឱ្យថតសម្ដែងខ្សែភាពយន្ត ក៏ប៉ុន្តែនាងបានច្រានចោល ដោយលើកឡើងថា ខ្លាចស្បែករបស់ខ្លួនខ្មៅ។

កញ្ញាបញ្ជាក់ថា៖ “ការថតរឿងហ្នឹង គេហៅថតច្រើនតើបង តែខ្ញុំមិនទទួល ព្រោះអីខ្ញុំស្រលាញ់ស្បែក ខ្លាចស្បែករបស់ខ្ញុំខ្មៅ”។ ការខ្លាចស្បែកខ្មៅជារឿងម្យ៉ាង ប៉ុន្តែការប្រើរយៈពេលយូរក្នុងការថតពីបីទៅបួនខែ និង ការទទួលបានថវិកាតិចតួចពេលថតរឿងម្ដងៗ ក៏ជាហេតុផលនាំឱ្យតារាសម្ដែងខាងលើមិនចង់ថតខ្សែភាពយន្តផងដែរ។

ពេជ្រ អាវីហ្សា pich aviza

កញ្ញា ពេជ្រ អាវីហ្សា បានបន្តថាការមិនទទួលថតខ្សែភាពយន្តនេះ មិនមែនមកពីខ្លួនវាយឫកឡើយ ស្របពេលដែលប្រជាប្រិយភាពក្នុងសង្គមសិល្បៈមិនទាន់មានឈ្មោះបោះសំឡេងខ្លាំងដូចតារាមួយចំនួន។ ក៏ប៉ុន្តែសម្រស់គឺជាអ្វីដែលនាងស្រលាញ់ជាបំផុត។

យ៉ាងណាក៏ដោយតារាសម្ដែង sexy ខាងលើលើកឡើងថា ការថតស្ប៉ត និងថតខារ៉ាអូខេកញ្ញានៅតែទទួលជានិច្ច។ ប្រការនេះត្រូវបានកញ្ញា ពេជ្រ អាវីហ្សា ប្រាប់ថាដោយសារតែ ស្ប៉ត និងខារ៉ាអូខេ ប្រើរយៈខ្លី មិនយូរដូចការថតខ្សែភាពយន្តឡើយ។

នៅពេលចោទសួរថា តើធ្វើដូចម្ដេចនឹងឱ្យល្បីខ្លាំងដូចតារាមួយចំនួន ហើយទស្សនិកជនម៉េចស្គាល់កញ្ញាច្រើនបន្ថែមទៀត បើមិនថតខ្សែភាពយន្តដូច្នេះ? កញ្ញា ពេជ្រ អាវីហ្សា លើកឡើងថាការទទួលបានសំឡេងគាំទ្រច្រើនពីទស្សនិកជនជាអ្វីដែលនាងចង់បាន ហើយទៅថ្ងៃខាងមុខទៀតកញ្ញានឹងសម្រេចចិត្តថតខ្សែភាពយន្ត។ ប៉ុន្តែពេលនេះកញ្ញាមិនទទួលនោះទេ ព្រោះសម្រស់ធ្វើឱ្យនាងមិនចង់ទទួលថតខ្សែភាពយន្ត។

កញ្ញា ពេជ្រ អាវីហ្សា ត្រូវទស្សនិកជនចាត់ទុកថា ជាតារាសម្ដែងហ៊ានបញ្ចេញភាព sexy មិនចាញ់តារាសម្ដែង និងចម្រៀង sexy ជាច្រើនទៀតដូចជាកញ្ញា កុល ដាវី ឆ័យលី ដាឡែន ប៊ុន ផៃលីន វ៉ាង ស្រីណូ កែវ និសា គង់ ចាន់ស្រីមុំ សាន សុម៉ាលី ជាដើមឡើយ។

បច្ចុប្បន្នតារាសម្ដែង sexy រូបនេះកំពុងតែមមាញឹកនឹងការសិក្សាភាសាអង់គ្លេស ដោយកញ្ញាជួលគ្រូមកបង្រៀនដល់ផ្ទះ។ ក្រៅតែពីការរវល់ការងារខាងរៀនសូត្រ ការឡើងច្រៀងតាមស្ថានីយទូរទស្សន៍នានា និង ការថតស្ប៉ត រួមទាំងខារ៉ាអូខេ ក៏កញ្ញាកំពុងតែរវល់ផងដែរ៕

ពេជ្រ អាវីហ្សា pech-visa