សមត្ថកិច្ចឃាត់ខ្លួន ឧត្តមសេនីយ៍ សេះហោះម្នាក់ ពីបទប្លន់

សមត្ថកិច្ចឃាត់ខ្លួន ឧត្តមសេនីយ៍ សេះហោះម្នាក់ ពីបទប្លន់

ខេត្តកំពង់ស្ពឺ ៖ កម្លាំងសមត្ថកិច្ចនគរបាល ខេត្តកំពង់ស្ពឺសហការជាមួយ នគរបាលខេត្តតាកែវ បានបើកប្រតិបត្តិការតាមចាប់ខ្លួនឧត្តសេនីយ៍យោធា សេះហោះបានម្នាក់ពីបទប្លន់ ។ ការឃាត់ខ្លួននេះធ្វើឡើងកាល ពីវេលាម៉ោង១២ថ្ងៃត្រង់ ថ្ងៃទី២៧ កក្កដា ២០១៥ នៅភូមិខ្នាចខាងត្បូង ឃុំបឹងត្រាញ់ ស្រុកសំរោង ខេត្តតាកែវ ។

ជនសង្ស័យដែល ត្រូវបានឃាត់ខ្លួនមានឈ្មោះ កែវ អែម ភេទប្រុស អាយុ៤៧ឆ្នាំ មានស្រុកកំណើត ភូមិត្រពាំងកកោះ ឃុំស្តុក ស្រុកគងពិសី ខេត្តកំពង់ស្ពឺ ។

មន្ត្រីនគរបាលព្រហ្មទណ្ឌមួយរូប បានបង្ហើបឱ្យដឹងថា ជនសង្ស័យរូបនេះត្រូវបានចាប់ខ្លួន តាមដីកាលេខ១៥៥ ចុះថ្ងៃទី០៧ វិច្ឆិកា ២០១១ របស់ចៅក្រមស៊ើបសួរ ប៊ុន្នីញ ប៊ុណ្ណារី ដែលប្រព្រឹត្តបទ ប្លន់ទ្រព្យសម្បត្តិ អ្នកដទៃនៅភូមិចាស់ ឃុំព្រៃញាតិ ស្រុកគងពិសី កាលពីថ្ងៃទី៤ មេសា ២០០៧ ។

ក្រោយធ្វើសកម្មភាពប្លន់ហើយ ឈ្មោះនេះបានរត់ទៅធ្វើទាហាន នៅអន្លង់វែង ដោយប្រើឈ្មោះ ខៀវ រិទ្ធី នៅកងកាំភ្លើងធំ អគ្គបញ្ជាការ ទិសទី២ អន្លង់វែង មានឋានន្តរសក្តិ វរសេនីយ៍ទោ និងតួនាទីគ្រូបង្វឹក តែមិនដែលធ្វើការនោះទេ គឺយកឈ្មោះរកស៊ីឈើ រហូតដល់ឆ្នាំ២០០៩ ជនរូបនេះបានឡើង ឋានៈវរសេនីយ៍ឯកទៀត នៅចុងឆ្នាំ២០១១ជននេះបានឈប់ ដោយសារតែមានទំនាស់រឿងដីធ្លី ជាឧត្តមសេនីយ៍ទោមួយរូប ដែលជាមេបញ្ជាការប្រចាំទិសរបស់ខ្លួន ។

ប្រភពបន្តថា ក្រោយឃាត់ខ្លួនសមត្ថកិច្ច ដកហូតឯកសារសុំដឹកឈើ មួយចំនួន ព្រមទាំងខោអាវ យោធាប៉ារ៉ា ដែលប្រើឈ្មោះឧត្តមសេនីយ៍ត្រី ខៀវ រិទ្ធី ។

ជនសង្ស័យបានឆ្លើយថា ខោអាវប៉ារ៉ាដែលមាន ឈ្មោះជាឧត្តមសេនីយ៍ គឺជារបស់ខ្លួន ទុកពាក់នៅពេលដែលដឹកឈើពីព្រះវិហារមកភ្នំពេញ និងខេត្តកណ្តាល ដើម្បីបន្លំភ្នែកសមត្ថកិច្ចតាមផ្លូវថា រូបគេមានឋានៈធំ ប៉ុន្តែជនសង្ស័យមិនបានឆ្លើយសារភាព ពីបទចោទរបស់តុលាការនោះទេ គឺគេបដិសេធថាមិនបាន ប្រព្រឹត្តសកម្មភាពប្លន់ឡើយ ។ ទោះជាយ៉ាណានៅព្រឹកថ្ងៃទី២៩ កក្កដា ២០១៥នេះ សមត្ថកិច្ចនឹងរៀបចំឯកសារ បញ្ជូនជនសង្ស័យរូបនេះ ទៅកាន់សាលាដំបូងខេត្ត ដើម្បីចាត់ការតាមនីតិវិធី ៕