ដឹកកូនទៅមន្ទីរពេទ្យត្រូវរថយន្តបុក ស្លាប់ឪពុក និងកូនរបួសធ្ងន់

ដឹកកូនទៅមន្ទីរពេទ្យត្រូវរថយន្តបុក ស្លាប់ឪពុក និងកូនរបួសធ្ងន់

រាជធានីភ្នំពេញ ៖ ឪពុកដឹកកូនទៅមន្ទីរពេទ្យជិះនៅខាងឆ្វេងដៃត្រូវរថយន្ត កូរ៉េដឹកថ្ម បើកបុកពេញ ទំហឹងផ្លោង២០ម៉ែត្រដួលបោក ក្បាលឪពុក ស្លាប់ភ្លាមៗ ចំណែកកូនប្រុស បែកក្បាលរងរបួសធ្ងន់ កាលពីវេលា ម៉ោង១០និង៤០នាទីយប់ថ្ងៃទី៤ សីហា តាមបណ្តោយផ្លូវ លេខ២១៧ ទល់មុខសាលាបឋម សិក្សាភូមិឫស្សី ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។

ប្រភពព័ត៌មានបានឲ្យដឹងថា មុនពេលកើតហេតុ មានរថយន្តប្រភេទ កូរ៉េដឹក កម្ទេចថ្ម ពណ៌ខៀវ មិនចាំស្លាកលេខ ១គ្រឿង មានអ្នកជិះខាង ក្រោយ៤នាក់ ធ្វើដំណើរតាមផ្លូវលេខ២១៧ ក្នុងទិសដៅ ពីជើងទៅត្បូង ក្នុងល្បឿនលឿន ចំណែកម៉ូតូ ម៉ាកស្មាសរីវ៉ូ ពណ៌ខ្មៅ ពាក់ស្លាកលេខភ្នំពេញ១R-៨៥៨៧ ជិះគ្នា២នាក់ ឪពុកនិងកូនប្រុស ដោយឪពុកជាអ្នកដឹកកូនយកទៅ គ្លីនិកឯកជននៅ តាមផ្លូវលេខ២១៧ ក្នុងទិសដៅពី ត្បូងទៅជើង ដោយជិះបញ្ច្រាស ទិសដៅចរាចរណ៍ នៅខាងឆ្វេងដៃ លុះមកដល់ចំណុចកើត ហេតុរថយន្តបើក លឿនចាប់ ហ្រាំងមិនទាន់ ក៏ជ្រុលទៅបុកចំពីមុខម៉ូតូពេញ ទំហឹង បណ្តាលឲ្យម៉ូតូ ខ្ទេចផ្នែកខាងមុខ ជនរងគ្រោះជា ឪពុកខ្ទាតជិត២០ម៉ែត្រ ដោយបោកក្បាលស្លាប់នៅនឹងកន្លែង ចំណែកកូនប្រុស បែកក្បាលរបួសធ្ងន់ ត្រូវបានរថយន្ត សង្គ្រោះដឹកយកទៅ សង្គ្រោះនៅគ្លីនិកឯកជន រីឯរថយន្ត បង្កបានបើក រត់គេចខ្លួន បាត់ស្រមោល ។

សពបុរសជាឪពុកឈ្មោះ សុខ សាន អាយុ៣៥ឆ្នាំ ជាកម្មករសំណង់ ស្នាក់នៅក្នុងការ ដ្ឋានសំណង់ សង្កាត់ទួលស្វាយព្រៃ១ ខណ្ឌចំការមន មានស្រុកកំណើតនៅ ភូមិរបោះចឹក ឃុំព្រៃឃ្នើស ស្រុកមេសាង ខេត្តព្រៃវែង ។ ចំណែកកូនប្រុសរងគ្រោះឈ្មោះ សាន សាទ អាយុ១៥ឆ្នាំ ធ្វើការជាមួយឪពុក ។

ក្រោយពេលកើតហេតុ សពជនរងគ្រោះត្រូវបានសមត្ថកិច្ចប្រគល់ ឲ្យក្រុម គ្រួសារយកទៅ ធ្វើបុណ្យតាមប្រពៃណីនៅស្រុកកំណើត ចំណែកម៉ូតូ ខូចខាតយ៉ាងដំណំ ត្រូវសមត្ថកិច្ចប្រគល់ឲ្យសាច់ញាតិវិញ ៕