ស៊ន ដាវីន ក្លាយជា កីឡាការិនីគំរូ មិនក្រាញតំណែង ជម្រើសជាតិ

ស៊ន ដាវីន ក្លាយជា កីឡាការិនីគំរូ មិនក្រាញតំណែង ជម្រើសជាតិ

រាជធានីភ្នំពេញ ៖ បើទោះជាកីឡាការិនី ស៊ន ដាវីន មានស្នាដៃរាប់មិនអស់ ក្នុងការប្រកួតតេក្វាន់ដូ កន្លងមក ក៏អ្វីដែលនាងទទួលបានមិន ស្ថិតក្នុងការចាប់អារម្មណ៍ របស់មហាជននោះទេ ចាប់តាំងពី ស៊ន សៀវម៉ី ប្អូនស្រីរបស់នាងបានតំណែង ជាបុគ្គលឆ្នើមថ្នាក់ជាតិ តាមរយៈការឈ្នះមេដាយមាស ពីកីឡាទ្វីបអាស៊ីកាលពីចុងឆ្នាំ២០១៤ ។

ទោះបីយ៉ាងណា ស្នាដៃទាំងនេះបន្ទាប់ពី លាតត្រដាងសាជាថ្មី ព្រមជាមួយនឹងលិខិត សុំលាឈប់ពីក្រុមជម្រើស ជាតិរបស់នាង កំពុងក្លាយជាចំណុចទាក់ទាញ និងមានការកោតសរសើរ ពាសពេញបណ្ដាញហ្វេសប៊ុក ។

អ្នកលេងហ្វេសប៊ុក លើកឡើងពីស្នាដៃជាច្រើនដែលស៊ន ដាវីន សម្រេចបានចាប់តាំង ពីនាងក្លាយខ្លួនជាកីឡាការិនីជម្រើសជាតិនៅក្នុង សហព័ន្ធកីឡាតេក្វាន់ដូកម្ពុជា។ នេះមិនមែនជាលើកទី១នោះទេ ដោយសារជីវប្រវត្តិរបស់នាងត្រូវគេ លើកយកមកសរសើរ និងបង្ហាញពីស្នាដៃច្រើនដងមកហើយ ដោយគ្រាន់តែការលាតត្រដាងហាក់មិនត្រូវបរិបទ ដែលធ្វើឱ្យមហាជនយកចិត្តទុកដាក់។

ការលាតត្រដាងស្នាដៃរបស់នាង ក្នុងរង្វង់ពីរបីថ្ងៃនេះ ត្រូវគេមើលឃើញថាខុសប្លែក ពីពេលមុនៗ បន្ទាប់ពីនាងដាក់ជំហរមិនអាចបន្តអាជីព ជាកីឡាការិនីជម្រើសជាតិបន្តទៀត ដោយសារតែហេតុផលមួយចំនួន ។ លិខិតសុំលាឈប់របស់នាង បានក្លាយជាប្រធានបទ ដ៏រសើបមួយនៅសប្ដាហ៍នេះ ក្នុងពេលដែល ស៊ន ដាវីន ត្រូវគេកត់សម្គាល់ថាមិនមានស្នាដៃ បើទោះជាបានចេញប្រកួតជាមួយ ប្អូនស្រីច្រើនដងក្នុងប៉ុន្មាន លើកចុងក្រោយ ។

នាងបានដាក់លិខិត លាឈប់កាលពីថ្ងៃទី១ សីហា ដោយអះអាងថាលែង មានពេលទំនេរគ្រប់គ្រាន់ ដើម្បីទៅធ្វើការហ្វឹកហាត់ ឱ្យបានជាប់លាប់ដូចមុន ។ ការសុំលាឈប់នេះ ធ្វើឡើងបន្តបន្ទាប់គ្នា នឹងប្រតិកម្មទៅកាន់គណៈ កម្មាធិការជាតិអូឡាំពិកកម្ពុជា ដែលមិនបានរាប់ឈ្មោះ បងប្រុសរបស់នាងគឺ ស៊ន អេលីត ថា បានដណ្ដើមមេដាយ មាសពីការប្រកួតវ៉ូវីណាម ពិភពលោកកាលពីឆ្នាំ២០១១នៅ ប្រទេសវៀតណាមមួយរូបដែរ ក្នុងពិធីប្រគល់រង្វាន់ឱ្យសែន រ៉ាឌី និង ម៉ាត់ ឆ្វេង ។

ការលើកឡើងនេះ ត្រូវគេដឹងស្របគ្នាក្នុងពេលដែលនាង ក៏បានបង្ហាញភាពសកម្ម ក្នុងនាមជាគ្រូកីឡានៅក្នុងវិទ្យាល័យឫស្សីកែវ និងទើបបោះទុនជាមួយប្អូនស្រី សង់រោងបង្កើតក្លិបតេក្វាន់ដូ ដើម្បីបង្ហាត់សិស្សរកចំណូលជំនួស។ យ៉ាងណាក៏ដោយ គេមើលឃើញថា លិខិតសុំលាឈប់របស់នាង គឺជាគំរូដែលកីឡាករជម្រើសជាតិ ទូទៅពិបាកធ្វើដូច ក្នុងពេលអ្នកខ្លះមាន កិច្ចការងាររាប់មិនអស់ នៅក្រៅសហព័ន្ធ ប៉ុន្តែនៅក្រាញ តំណែងជម្រើស ជាតិដើម្បីបានចេញប្រកួតយកមុខយកមាត់ ដោយសូម្បីតែខ្លួនឯងផ្ទាល់មិនមានពេលគ្រប់គ្រាន់ទៅហ្វឹកហាត់តិចពេលជាង ស៊ន ដាវីន នាពេលចុងក្រោយនោះផង ។

ការសុំលាឈប់របស់នាង ជាការបង្ហាញនូវការលះបង់មួយខ្ពស់ បន្ទាប់ពីនាងចេញទៅប្រកួត ប៉ុន្មានលើកចុងក្រោយ មិនទទួលបានជោគជ័យ ហើយបានដាក់បន្ទុកថា នោះមកពីខ្លួនឯងរវល់ច្រើន មិនដូចមុន និងមិនមានពេលក្នុងការ បំប៉នទាំងកម្លាំង និងសមត្ថភាពដើម្បី យកមេដាយជូនជាតិ ។ ការយល់ឃើញទាំងនេះ បានជួយឱ្យការសុំលាឈប់របស់ ស៊ន ដាវីន លេចធ្លោហើយក៏ជួយឱ្យស្នាដៃ របស់នាងត្រូវមហាជនទូទៅ ចាប់អារម្មណ៍ក្នុងប៉ុន្មានថ្ងៃនេះ ជាពិសេសនៅលើបណ្ដាញហ្វេសប៊ុក ចាប់តាំងពីពាក្យសុំឈប់ របស់នាងបែកធ្លាយ ។

ស្នាដៃដែលគេចាប់អារម្មណ៍ គឺនាងធ្លាប់បានមេដាយមាស កាលពីឆ្នាំ២០០៧ក្នុងព្រឹត្តិការណ៍ KOREAN OPEN នៅទីក្រុងសេអ៊ូល ។ បានមេដាយប្រាក់ក្នុងព្រឹត្តិការណ៍ ដដែលក្នុងឆ្នាំ២០០៨ ។ បានមេដាយសំរឹទ្ធិក្នុង ឆ្នាំ២០០៩ពីការប្រកួត ASEAN CHAMPIONSHIPS VIETNAM ។ បានមេដាយមាស១ និងប្រាក់១ កាលពីឆ្នាំ២០១០ ពីព្រឹត្តិការណ៍ KOREAN OPEN ។ បានមេដាយមាសពី ការប្រកួតASEAN CHAMPIONSHIPSក្នុងឆ្នាំ២០១១។

បានមេដាយប្រាក់មួយ ពីការប្រកួតកីឡាស៊ីហ្គេម (SEA Games) នៅប្រទេសឥណ្ឌូណេស៊ី កាលពីឆ្នាំ២០១១ដដែល ។ បានចំណាត់ថ្នាក់លេខ៤ ពីការប្រកួតជម្រុះអូឡាំពិក នៅប្រទេសថៃ ដើម្បីទទួលសិទ្ធិបានចេញទៅប្រកួតកីឡាអូឡាំពិក លើកទី៣០នៅទីក្រុងឡុង ប្រទេសអង់គ្លេស និងបានទទួលមេដាយមាស ចុងក្រោយកាលពីឆ្នាំ ២០១៣ ពីកីឡាស៊ីហ្គេម (SEA Games) នៅប្រទេសមីយ៉ាន់ម៉ា។ ស្នាដៃទាំងនេះធ្វើឱ្យ គេភ្ញាក់ព្រឺតនៅពេលដែលនាងទើបខកខាន បានមេដាយមិនដល់២ឆ្នាំផង ក៏សម្រេចចិត្តលាឈប់ ដើម្បីឱ្យអ្នកក្រោយដែលមានសមត្ថភាព បន្តទៅប្រកួតយក មេដាយជំនួសខ្លួន ហើយមិនក្រាញតំណែង ។

ធៀបនឹងកីឡាករជម្រើសដទៃទៀត គេប្រដូចនាងជាអ្នកមាន ការទទួលខុសត្រូវម្នាក់បន្ទាប់ពី នាងសុខចិត្តបោះបង់កៅអីជា កីឡាការិនីជម្រើសជាតិ ដើម្បីឱ្យអ្នកជំនាន់ក្រោយមានឱកាស ។ នេះជាជំហរផ្ទុយស្រឡះពីកីឡាករ និងកីឡាការិនីជម្រើសជាតិជាច្រើនទៀត ដែលសុខចិត្តក្រាញ បើទោះជាដឹងថាខ្លួន ចេញទៅប្រកួតលើកណាក៏មិនបានមេដាយ និងហៅភាសាការទូតថា ទៅប្រកួតដើម្បីយក តែបទពិសោធន៍ ហើយមិនឈ្នះគ្រប់លើក ។

អ្នកកោតសរសើរ ស៊ន ដាវីន បានលើកឡើងថា នាងទើបតែចាញ់ការប្រកួត ក្នុងមួយរយៈចុងក្រោយ សោះបានសម្រេចចិត្តលាឈប់ ចុះហេតុអ្វីកីឡាករកីឡាការិនី ជម្រើសជាតិផ្សេងទៀត ដែលអ្នកខ្លះមួយជីវិត សឹងមិនមានមេដាយមកពីក្រៅមួយផង ហេតុអ្វីគ្មានការទទួលខុសត្រូវ។ វាជាការខាតបង់មួយដ៏ធំ ដែលមន្ត្រីថ្នាក់លើ មិនមានវិធានការដោះដូរ ឬកីឡាករកីឡាការិនីជម្រើសជាតិ ខ្លួនឯងមិនមានស្មារតីដោយ មិនសុខចិត្តសុំឈប់ដូចដែល ស៊ន ដាវីន កំពុងធ្វើជាគំរូ។

ក្រុមអ្នកលេងហ្វេសប៊ុក បានសរសើរពីការទទួលខុសត្រូវ របស់បងស្រី ស៊ន សៀវម៉ី រូបនេះ និងបានចំអកដល់ជម្រើសជាតិផ្សេងទៀតដែលគ្មានការ ទទួលខុសត្រូវ ហើយសុខចិត្តនៅក្រាញមិន បោះបង់កៅអីឱ្យអ្នកជំនាន់ក្រោយ ដោយមាន មន្ត្រីសហព័ន្ធបិទភ្នែកបិទច្រមុះ ។

ទោះជាមន្ត្រីសហព័ន្ធ ខំប្រឹងការពារថា ហេតុផលនៃការដាក់កីឡាករ ដដែលៗឱ្យចេញប្រកួត ក៏ព្រោះតែធនធានកីឡាករនៅកម្ពុជាមានកម្រិត និងមិនមានបេក្ខភាពម្នាក់ណា ធ្វើបានល្អជាងហ្នឹង ក៏មហាជនភាគច្រើន នៅតែចង់ឃើញពីការផ្លាស់ប្ដូរបេក្ខភាព អ្នកដែលគ្មានស្នាដៃរាល់ ពេលចេញប្រកួតក្រៅប្រទេស ដើម្បីជំរុញឱ្យអ្នកតំណាងជាតិបង្កើនសមត្ថភាពខ្លួនឯង ហើយមិនប្រើថវិកាជាតិ ទៅប្រកួតដើម្បីយកតែបទពិសោធន៍។

វិធានការដោះដូរកីឡាករជម្រើសជាតិ ត្រូវគេឃើញសហព័ន្ធមួយចំនួន ដែលមិនធ្លាប់ទទួលបាន មេដាយឈានឡើងគួរឱ្យកត់សម្គាល់ លើកលែងតែសហព័ន្ធកីឡាណា ដែលមានអ្នកក្រាញតំណែងទាំងថ្នាក់ដឹកនាំ និងទាំងសមាសភាពជម្រើសជាតិ ទើបគេឃើញទៅប្រកួតលើកណា ក៏បានត្រឡប់មកវិញ តែបទពិសោធន៍ ដោយមិនមានអ្វីប្រែប្រួល ។

ស្ថានភាពនេះ កំពុងធ្វើឱ្យដុះស្លែនូវមន្ត្រី និងកីឡាករអសមត្ថភាព និងបង្កឱ្យកីឡាករចំណូលថ្មី ដែលមានសមត្ថភាពល្អបាក់ទឹកចិត្ត មិនចង់ប្រឹងប្រែង ដោយមានអ្នកខ្លះបាន ទាំងបង្ហើរពាក្យថា បើខ្លាំងហើយអត់ខ្សែ គឺនៅតែមិនបានតំណាងជាតិចេញ ទៅប្រកួតនៅក្រៅស្រុកដដែល ។ ព័ត៌មានបែកធ្លាយចេញ ពីសហព័ន្ធដែលពោរពេញដោយកីឡាករ និងមន្ត្រីគ្មានមេដាយពី ការប្រកួតអន្តរជាតិ បានទាំងបង្ហើបថា គេមានរបៀបធ្វើតេស្ដ ជម្រុះយកបក្សពួកឯងដែល ជាកីឡាករជម្រើសជាតិដដែលៗ ឱ្យបានចេញទៅតំណាងជាតិ ដោយមានលក្ខណៈស្របច្បាប់ទៀតផង ៕