ប្តឹងជនល្មើស ជាកូនអ្នកធំ និងមានលុយម្នាក់ ដែលវាយ នគរបាលចរាចរណ៍នារី

ប្តឹងជនល្មើស ជាកូនអ្នកធំ និងមានលុយម្នាក់ ដែលវាយ នគរបាលចរាចរណ៍នារី

សៀមរាប៖ យោងតាមការចុះផ្សាយ របស់គេហទំព័រអគ្គស្នងការដ្ឋាននគរបាលជាតិកម្ពុជា ថ្ងៃទី០៧ ខែសីហា ឆ្នាំ២០១៥ ឲ្យដឹងថា ឧត្តមសេនីយ៍ទោ សត ណាឌី ស្នងការនគរបាលខេត្តសៀមរាប បានចេញបញ្ជាឲ្យមន្ត្រីនគរបាលរៀបចំឯកសារប្តឹងទៅតុលាការ ហើយនៅពេលនេះ កម្លាំងការិយាល័យនគរបាលព្រហ្មទណ្ឌកម្រិតស្រាល កំពុងចាត់ការតាមនីតិវិធីច្បាប់ ករណីជនសង្ស័យម្នាក់ បានវាយនគរបាលចរាចរណ៍នារីម្នាក់ កំពុងបំពេញភារកិច្ច ក្នុងការអនុវត្តច្បាប់ចរាចរណ៍។

ប្រភពដដែលឲ្យដឹងថា មានបុរសម្នាក់ជិះម៉ូតូមួយគ្រឿង ម៉ាកហុងដាសេ១២៥ ពណ៌ខ្មៅឌុបប្រពន្ធដោយពុំមានពាក់មួកការពារសុវត្ថិភាព និងម៉ូតូគ្មានស្លាកលេខ ឃើញដូចនោះជនរងគ្រោះ ក៏បានកាន់ដំបងបញ្ជាចរាចរ ចេញទៅឃាត់ឲ្យឈប់ម៉ូតូ ស្រាប់តែបុរសម្នាក់នោះ អត់ឈប់ហើយជិះម៉ូតូតម្រង់មករកបុកនាង ព្រមទាំងយកដៃក្រវាសដំបងចរាចរណ៍នាងចេញ ពេលនោះនាងក៏តាមកាក់ម៉ូតូនោះ រហូតដល់ឈប់។ ប្រភពបន្តទៀតថា ក្រោយមកទៀត បុរសម្នាក់នោះ បានចុះពីលើម៉ូតូ រួចវាយនាងមួយដៃ ត្រូវដើមដៃខាងស្តាំ ហើយរត់ឡើងម៉ូតូប្រុងបើករត់គេច តែនាងរត់ទៅចាប់ម៉ូតូ កុំឲ្យបើករត់គេច តែបុរសនោះ បានវាយនាងមួយដៃទៀត ត្រង់ចំណុចដដែល បណ្តាលឲ្យដៃរបស់នាងឡើងជាំហើយស្លុតដៃខាងស្តាំ។ នេះបើតាមការបំភ្លឺរបស់មន្ត្រីនគរបាល ដែលជាជនរងគ្រោះ។

នៅពេលបន្ទាប់មកលោកអនុសេនីយ៍ឯក សាយ ឌីណា បានរត់មកជួយ ហើយលោកពលបាលឯក សាត ពឿន រត់មកជួយទៀត ទើបឃាត់បុរសម្នាក់នោះជាប់ ហើយរាយការណ៍ទៅថ្នាក់លើ ។ ដោយតាមបញ្ជាថ្នាក់លើ ក៏ឲ្យដកយកម៉ូតូនោះ ទៅរក្សាទុកនៅស្នងការនគរបាលខេត្តសៀមរាបតែម្តង ហើយបុរសនោះក៏គេចខ្លួនបាត់។ លុះកន្លះម៉ោងក្រោយមកបុរសនោះ ក៏ត្រលប់មកវិញម្តងទៀត បើករថយន្តម៉ាកកាម៉ារីហាយប្រ៊ីត ពណ៌ស មកដល់កន្លែងនាងឈជើង ហើយចុចកញ្ចក់ឡានចុះ ហើយស្រែកជេរយ៉ាងកម្រោលមកលើនាងថា៖ « បើង៉ែងមិនសុំទោសអញទេ! ថ្ងៃណាមួយនឹងងាប់នៅឡានអញជាមិនខាន!» ។

សមត្ថកិច្ចបានឲ្យដឹងថា ជនបង្ករហេតុនោះមានឈ្មោះ លឹម ស្នេហ៍គំនិត ហៅ ធូ រស់នៅម្តុំអាងក្រពើ ភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប ។ បច្ចុប្បន្ននេះសមត្ថកិច្ច កំពុងចាត់ចំណាត់ការ យ៉ាងក្តៅគគុកក្នុងករណីនេះ ៕