ដោយសារ ទូរស័ព្ទខ្លួនឯង ធ្វើឱ្យជន ល្មោភកាមម្នាក់ ជាប់ខ្នោះ

ដោយសារ ទូរស័ព្ទខ្លួនឯង ធ្វើឱ្យជន ល្មោភកាមម្នាក់ ជាប់ខ្នោះ

ខេត្តតាកែវ ៖ ជនសង្ស័យម្នាក់ត្រូវប៉ូលិសចាប់ខ្លួន កាលពីម៉ោង៨ព្រឹក ថ្ងៃទី៧ សីហា បន្ទាប់ពីធ្វើសកម្មភាពប៉ងចាប់រំលោភកូនក្រមុំគេនៅលើផ្ទះ ខណៈនាងកំពុងដេកលង់លក់។

លោកមឿង សារុន អធិការនគរបាលស្រុកសំរោងបានឱ្យដឹងថា ជនសង្ស័យមានឈ្មោះសុខ គា ភេទប្រុស អាយុ៣៦ឆ្នាំ រស់នៅភូមិដូង ឃុំទ្រា ស្រុកសំរោង ចំណែកនារីរងគ្រោះអាយុ២១ឆ្នាំ ។ ជនសង្ស័យត្រូវបានឃាត់ខ្លួនតាមពាក្យបណ្តឹងរបស់នារីរងគ្រោះ។

លោកអធិការស្រុកបានបន្តទៀតថា ក្នុងពាក្យបណ្តឹងនារីរងគ្រោះបានឱ្យដឹងថា កាលពីម៉ោង១ និង៤០នាទីរំលងអធ្រាត្រ ថ្ងៃទី៥ សីហា ជនសង្ស័យបានឡើងទៅលើផ្ទះនារីរងគ្រោះហើយប៉ុនប៉ងរំលោភនាង ដែលកំពុងដែកលង់លង់ជាមួយប្អូនស្រីម្នាក់ទៀត តែពេលបម្រុងធ្វើសកម្មភាព នាងបានភ្ញាក់ដឹងខ្លួនឡើងហើយស្រែកឆោឡោផ្អើលដល់អ្នករស់នៅជិតខាង ពេលនោះជនល្មើសភ័យស្លន់ស្លោបានរត់គេចខ្លួនបាត់ បន្សល់ទុកទូរស័ព្ទមួយគ្រឿងនៅលើផ្ទះរបស់នារីរងគ្រោះ។

លុះព្រឹកឡើងជនល្មើសបានទូរស័ព្ទចូលទូរស័ព្ទរបស់ខ្លួនសួរនាំនារីរងគ្រោះស្គាល់ថា ជាជនសង្ស័យក៏ប្រញាប់ដាក់ពាក្យបណ្តឹងមកប៉ូលិសឱ្យចាប់ខ្លួនបានតែម្តង៕